| Plevans
di Pietro Menis |
1973 |
| Il plevan gnûf di un paîs dal Friûl al veve savût che la zoventût di chel lûc 'e usave a balâ il dì de sagre, e a lui chê usanze lì no j lave jù. Alore al clamà in canòniche i plui in viste par dîur franc e net: « Se vualtris 'o balàis, jo no fâs la sagre! Messe pìzzule, e vonde... ». I fantaz j àn prometût di no balâ; ma une volte restâz di bessôi, si son diz: «Intant lui ch'al fasi la sagre, e nô, dopo, 'o balìn...». Il plevan, content de promesse, al à fat, a buinore, une messe di chês, cun cantôrs, organo, e un predi forest a predicjâ. Ma tal dopomisdì i gjéspui a' làvin pes lungjs, i cantôrs no la finivin plui; e la zoventût 'e veve primure di mètisi a sgambetâ... Al «Magnificat» il muini, puartant il fûc par incensâ l'altâr, j soflà sot vôs al plevan: «Siôr plevan, e' àn scomenzât cumò, che si sint la musiche fin in sacrestie... ». Il plevan j ven su la fote, e, incensant, invezzit di dî il cjant de Madone, al mungulave: «Ca a' bàlin, ca a' sunin, che il folc ur trai!». E al spacave il turìbul di rompi lis cjadenis! Qualchi zornade dopo, no vègnie, par cumbinazion, la tampièste! une tampieste gruesse come còculis, ch'e puarte vie dut il racolt! A plevan j displaseve, parvìe che, tal ultin, al lave di miez ancje lui; ma al veve ancjemò il madron sul stomi, e la fieste dopo nol podè tasê. Al va su sul pulpit e al dîs: «Domenie passade 'o vês vût cûr di profanâ la sagre, cui uestris bai dal diàul. 'O varês dit ch'o j 'e vevis fate al plevan. Ce braure! Ma al Signôr no si fàsie! Chel al cjate simpri i siei, e cheste volte nol à fat spietâ. La tampieste 'e à fiscât il racolt, e chest unviâr, quant che no 'ndi varês plui te panàrie e sul cjast, ce vêso di fâ? Vêso di balâ?... ». Il plevan al tâs, come par spietâ une rispueste che no podeve vignî; podopo al finìs cussì: «Us dîs jo ce ch'o vês di fâ: ca... », e al mostrave cul dêt la bocje viarte, «ch'al fasi il nît il cuc, e ca ch'al fasi la tele il ragn!... », e al mostrave cul dêt il daûr! |
