I polvarìns dal miedi

Une volte in montagne si inmalà un omp: dolôrs di panse di murî. Lis fèminis di ciase e chês des ciasis visinis si metin a confabulâ: bisugnarès fâigi chest e chest altri, prova cussì e culà: ché 'e dîs un decòt di sinz e madriàrie, ché altre impàcs di flor di savût, un'altre un trat di ûf cu' la stope, e une quarte un sotratîf che al ere

di dut, cun aghe di malvis.

'0 crôt che vepin provâs duc' chei pastròs, ma dibànt; alore chês babis finîs i lor rimiedis e viodìnt che chel omp al leve denànt daùr ogni dì plui si decidin a clamâ el miedi.

Chel al va sù, al vìsite el malât e dopo di vê dite che nol ere propi mal di murî, al scrîf le ricete sui zenoi par vie che nol ere dulà pojâ la ciarte in ché ciàmare di pore înt; e sicome c'al veve premure di tornâ jù, par sujâ ce che al veve scrit su la rècipe, al gratà cul penâl un tic di cialcine, e dopo, consegnanle a la fèmine dal malât, 'i disè:

«Ogni quatri oris 'i dais une sedòn di chest polvar in tune tace di aghe... veso capît? ».

«Sior sì, dabòn» 'e rispuìnt che fèmine e ti cor jù a cioli un gremâl di cistinis, che met sul caretìn dal miedi.,

«Ogni quatri oris, eh?... 'O vês pur sì capît?».

«Sior sì, sior dotôr... Patròn... ogni quatri oris une sedòn di polvarìn...».

'E passin quindis dîs e el miedi une dì sul marciât al incuintre le fèmine dal malât.

«E alore? Cemût el nestri omp parone?... îsal uarît?...».

Ché lu ciale e devente rosse e pò platansi la muse cul gremâl si met a vaî».

«Ce isal sucedût mai?... - al domandà el miedi - Parcè vaîso?... ».

«Al è muart lui por biât el gno omp...».

«'I vèviso dâs i polvarìns che us vevi dite jo?...».

«Po sì, sior dotôr, che 'i ai vin dâs... 'O vin gratât fin sul clap... ma nol à zovât... al leve 'gni dì piês...».

«Ce veso fat... » al domandà el miedi, spalancànt i voi. -