Predis di une volte

Monsignor Bulfon, sant omp, dute prejere e caritât di lui, tante caritât che dopo 47 ains di file passâz in plêf nol à lassât nancje avonde bêz par fâj il funerâl, al voleve ben a duc', e quant che un de sô parochie al mostrave di jéssi bon di fâ alc, lui al jere il prin a gjoldi, a laudâ, a judâ in ce ch'al podeve, come un vêr pari di famèe. E la sô grande famèe e jere Buje. La cognosseve in lunc e in larc come cjase sô, e, di vecjo, al diseve: «Ju ai batiâz duc' jo».

Quant ch'al à viodût che mi plaseve la storie locâl, mi à viart il so archivi e mi à dite: «Chi 'e je une miniere di notìziis, ma sta atent al latin. Viôt di no fâ come chel tâl che al crodeve di jéssi cui sa cui parvìe ch'al saveve lei il Paternoster. Pe inaugurazion di un monument a San Cristòful al veve preparade cheste epigrafe: "Cristoforus es iste, cui portabat Jesu Criste, et acquae fluvius uius, non tangebat uius cuius". Opûr sta atent a no cjapâ Rome par tome, come chel muini che, parvìe ch'al ploveve simpri e la campagne 'e lave in deperiment, tal puest de tabele dal timp liturgjc al veve metude chê ch'al jere scrit: "Orate pro tempore belli"».

Monsignor Bulfon, in dutis lis circostanzis, al veve simpri la rispueste adate, bonarie, spiritose, inteligjente, ch'e rifleteve il so caratar pacjfic e risiarvât.

Une volte, cun tun parochian di chei ch'a stavin pluitost dongje di lui, za madûr e prossin a lâ in zemenzâl, j disè in confidenze: «E a maridâti no pènsistu? ».

«Monsignor » j rispuint chel «'o viôt ancjemò par un pôc cemût ch'e va, e po... 'o voi frari... ».

«E tu tu crodis» j dîs pront Monsignor «che i fraris ti tégnin? Ti diran: "Là che tu âs lassade la flôr, puarte ancje la sèmule"».

Durant la uere dal 15 a Buje a' jerin simpri soldâz in distacament: riclamâz par istruzion prime di lâ al front, reparz in ripôs...

Une dì a buinore Monsignor al lave a fâ la sô cjaminade dopo messe, e j càpite di passâ dongje une Compagnie ch'e stave fasint manovris.

Qualchi soldât al fasè bocjatis (in chê volte 'a jere di mode bocjassâ sui predis), e un al disè a fuart a di un altri: «Cjo', paisan, chel nol va in uere di sigûr ve'... ».

Monsignôr lu cjale e po j dîs: «Fiozzut, quant ch'al va in uere to nono, 'o voi ancje jo...».

Monsignor Bulfon al veve vivût di capelan 17 ains cun Monsignor Venier, un predi plen di vitalitât, di coragjo, ch'al veve fat su il domo e altris costruzions in quasi quarante ains di plevanât, e partant al jere naturâl ch'al vès une venerazion par lui: lu veve inniment dispès e vulintîr.

Une dì pre Saul Noacco, che Monsignor al tignive in canòniche come «sacro ministro senza portafoglio», ven a stâj senze nissun tìtul o decret di Curie, par stuzzicâlu j disè: «Ma, Monsignor, cun chel Venier simpri in bocje... nol jere mico il Vanzeli il Venier... ».