Un pôr predi par rivâ a sbarciâ el lunari cu' la so mìsare prebende, al si ere inzegnât a meti tal so ort, adues de Canòniche, un biel stròp di râs par podê fâsi un biel brancièl di broade pa' l'invier. Se 'o vessis viodût ce râs che erin vignûs sù tal ort dal Plevàn!... Une raritât: luncs e grues come braz, blancs e ròs e verzelâs che fasevin le biele voe...

Difàt une gnot t'ai àn fàs sparî duc' quanc'.

El predi apene che la massàrie lu à visât al va jù a viodi chel disastro. Si sint a strenzi el cur, poarèt: adio broade!...

Ma tornànt a ciase si inzopede, e quasi al colave, in t'un ravòt buluzzât te jerbe dal cievezzâl.

Lu vevin pierdût i laris s'ciampànt vie pe gnot.

Alore chel predi al à un lamp che lu ilùmine: lu ciape sú e lu puarte a ciase cun dute devozion...

— Po ce âl di fâ di chel râf? 'i domande le Perpètue.

— Ma... 'o vedarìn... Lasse fâ di mê, tu...

Le fieste dopo lu puarte in glésie, chel biel ravòt, e lu poe, cu' la vis'cie a pendolòn, su le balaùstre dulà che al leve a prediciâ.

Le înt in glésié 'e ciale e riduce e cisiche; si domande ce intenzions che al à el Plevàn. Al ere un pôc stranlbòt chel predi, ma lâ a Messe cu t'un râf e jere masse gruesse!...

Al Vanzeli el Plevàn si volte e si met su le balaùstre e al comence cussì:

— 'O savês ce râs che 'o vevi tal gno ort, e 'o savês che ju vevi metûs par podê rivâ cu' la tele; parceché 'o savês àncie che cun chel che mi dais ualtris no si jemple avonde el bultric... E chei râs, siorsi che àn fate gole a qualchi biel tomo, che al crodarà di vê fate cui sa ce biele bravade... e ancimò al à el coragio di vignî in glésie sperànt che nissùn al sepi ce che al à fat... Ma jo si che lu cognòs... Velu lajù che al è!... Tiraisci di bande, che 'i buti te muse àncie chest râf che al à pierdût s'ciampànt...

E cussi disint al ciape sù el râf de balaùstre e al fâs el moto di tirâlu a qualchidùn, lajù tal grop dai omps, in fons de glésie.

Alore dut t'un momênt si viôt un omenòn che si fâs larc in te fole cui comedóns e al s'ciampe fur di glésie a giambis puartaimi, come se al vès viodût el diaul...

Al sucêt un batabui d' infier come se si fos dismòt un bôz di âs...

El Plevàn, che nol veve crodût a tant sucês de so prêdicie, al ciale un momènt, al riduce. Po si volte e al intone el Credo...