Rimpinâz sun tune scjale a man ch'e rivave fin su l'arc de cjampanute de glesie i 'zovins di Borghet di une setemane in ca a' scampanotavin in preparazion de sagre dal borc; par fâ dôs vôs '1 vevin tirât fin lassù un fiêr di uargine e lì a turno j davin-dentri fin a oris tardis: din - din - den, doi colps a la cjampane e un sul fiêr, opûr il contrari, doi colps sul fiêr e un su la cjampane.

Lis feminis intant 'a metevin in sest i curtii, a' freavin lis cjalderiis di ram, i cjaldîrs ch'a lusivin come aur, a' netavin di polvar, a' lavavin i plaz de gratule, i veris dai balcons. Pal dì de sagre il borc al veve di jéssi dut in regule e ordin, come a Pasche e a Nadâl.

'E jere chê l'uniche volte che a Borghet al vignive qualchi forest, la int dai paîs vizins; a' tornavin i parinc' e ogni cjase 'e veve i siei a gustâ. Tal dopomisdì de vilie lis fantatis a' preparavin lis 'zois di rosis frescjs di meti in glesie, dentri e di fûr, a' preparavin strecis di simprivert o di fueis di cjestanâr par tirâ di une cjase a chê altre o par meti su lis fereadis dai balcons dai fogolârs; a' scovavin la strade, lis andronis, la plazzute.

I 'zovins invezi a' preparavin il pâl da l'agnel, lis pignatis ce cu l'aghe e ce cu la cinise, fasint i pronostics pal doman. Ancjemò di scûr, il dì de sagre, dutis lis cjasis a' jerin sveadis, la campanele de glesie 'e sunave cence padìn e sul cuc de tese a' traevin i f alconez che si sintivin une mie lontan.

La prime a rivâ su la place de glesie 'e jere simpri la Morane cul so cjaruz a dôs ruedis ch'e tirave dibessole, cjariât de marcanzie di vendi in chê dì: pevarinis neris sporcjadis di sucar, "uês di muart" froî, pipinis di molene di pan, sucar di uardi, "sbiz" neris e blancs e colôr di rose f az cul sucar e blanc d'ûf, cussì boins che si disfasevin in bocje come nêf.

La Morane 'e jere une femenone roane, ma no beveve, cun tune vosate di omp e lis moschetis, ma che no faseve pore nancje ai fruz; prime di meti in mostre la sô marcanzie 'e lave simpri a saludâ il Signôr in glesie. Plui tart al rivave il concorint de Morane, Camin, un bocjon, rôs di pêl e cun moschetonis che j rivavin fin a lis orelis.

Al comenzave a sberlâ prime di rivâ lì dai cocolârs: "Done e putei... fora, fora... ". Al urlave e al scoreave il mus neri. Su la place al slargjave i sacs dai bagjgjs, chei des carobulis e chei de cevole cu la come ravaade e po i geis cu lis pomis di stagjon e dongje no mancjave mai une grampe di santonico profumât, une man di Diu pai mâi di panse.

I fruz di Fontanerosse, di Spilungje a' rivavin a Borchet discolz e si ingrumavin sot dal tei dongje de glesie, tirant la gole ai golosez metûz in mostre e magari complotant di daj ia gafe a qualchi robe; ma quant ch'a viodevin a rivâ il plevan a' corevin dentri in glesie, a' lavin a cjapâ puest, fis come ruis fin su la scjalinade dal coret...

Dal romanz: "Chei di Murae", Udin 1975