Samartin

Sul preliminâr firmât di Carlin e dal Podestât al jere stabilît che la vecje cjase dai Murae 'e veve di jéssi libare pal mês di lui par podê adatâle a scuele dal Borc.

Par lôr cont, Carlin al veve cjatade une cjasute a Fontanerosse, une càisse in Borc di Cente: il pûr sotet e un blec di ort tant di semenâ un strop di lidric e forsi une cunvièrie di patatis. Te gnove abitazion no stave di sigûr dute le robe ch'a vevin a Borghet, ven a stâj imprestamenz e mòbii; e alore ti àn scomenzât a vendi il soreplui.

Prime di dut e' àn scomenzât a vendi i impresc' agrìcui, la uàrzine, la grape, il cjâr, il cjarugjel, la carete, la "gurizzane"; il caretin cul folo lu veve puartât vie un forest ch'al cirive antigais. Podopo 'e vignì la volte de robe di cjase, de cusine e des cjamaris: armârs e vetrinis, taulis e cjadreis, cjantonâi vecjons e cassons: un di chest, menât a marît di une ave di Carlin, di cocolâr e intajât come un ricam, al jere lât a Udin. Il telâr di agne Menie requie, di tanc' agn fêr? si jere finît di carulâ, e cussì a 'nd' àn voludis pocjs a fracassâlu par fâ lens di brusâ. La cassefuart di barbe Mateo, dopo che Carlin la veve viarte cul picon, la vevin puartade al fari che la butàs te feraze. La scrivanie, ancje chê intajade e cu lis segretis, la vevin prometude al plevan; cussì chel mobil, ch'al podeve stâ in qualunque cjscjel o palaz di siôrs, come ch'a disevin duc' in cjase, al è stât l'ultin a lassâ Borghet. Quant che il predi al visà che al varès mandât a cjòlilu fra qualchi dì, Carlin al è lât a preparâlu, liberanlu di chei scartafaz ch'a jerin in duc' i scansei. Di frut in su al veve viodudis chês cjartis e si ricuardave ancjmò quant che i barbis, i « siôrs barbis » j disevin: « Lasse chê robe tu, no stâ a tocjâ. Di grant tu capirâs... ».

A' jerin vecjos contraz di compris, sentènziis di cunfin, cambiâls scjadudis, notis di spesis par cjase, boletis di prediâl, disens di lavôrs faz dai vecjos cuissà dulà pal mont, tantis letaris a macs e leadis cul spali, aventaris di dote dade 'es feminis Murae ladis a marît. L'ultin aventari al jere chel di puare Tunine, Di' perdoni: « Aventari di contesse », 'e diseve simpri sô mari Done Pine...

Cjartis, cjartis, che a Carlin no j disevin nuje: robe di butâ tal ledan o di brusâ. E al scomenzà a sbregâ, a fâ flics e ingrumâ sul caminet cul larìn di piere zale e il cjavedalut cui pòmui di leton; un grum di cjartis ch'a varessin bastât par cuéi une polente.

Quant che, impiât il fûc, al alzà i vôi par cjalâ la flame ch'e businave e la nape ch'e tirave su flocs di cjarte impiade, par lassâju colâ ju subit come paveaz neris e senze vite, al si inacuarzè dai ritraz dai barbis ch'a jerin un di ca e un di là dal caminet: doi ingrandimenz ch'a fasevin une figurone tes lôr suazis indoradis. Ancje chei, aromai, a' jerin di plui e senze scopo lì. Carlin nol pensà dôs voltis: al tirà ju i ritraz, ju fâs a tocs e ju bute tal fûc. La flame e tornà a alzâsi come prime sclopetant...