In chê setemane al colave Santramacul (Sant Ramacul), sagre e
marcjât grant a Buie; une fieste che la spetavin in iunc e in larc, tant i pizzui che i grainc'. In chei dîs il vecjo borc di Sant Stiefin al gambiave la so filusumie contadine e strache. Su lis placis e su lis stradis si podeve cjatâ di comprâ di dut, di vistisi e di mangjâ, imprestamenz di cjase e di lavôr, golosèz e divertimenz. Spetacul che no si podeve viodi tun àn tornât!...
Sanlramacul al jere un aveniment par duc' e adat a ogni sachete.

Si sintive fin di binore e di lontan il sunsur de sagre che si spandeve di cuel in cuel, di borc in borc, vie pe campagne cuiete come d'astât une montane improvise su lis fueis di un bosc distant....

Si sintive, di volte in volte e, ogni tant insieme, pui o mancul fuart, come a fasi gare tra di lôr, lis vôs di chê gjonde anuâl... Il sglinghignâ cuiet des campanelis di tiere cuete... il pirlâ dai sivilôz c il slambri des trombetis di metal... pui fuarte la musiche strache des gondulis e de cavalarisse... oh la glorie di fâ un gîr montâz su un cjavàl di len!...

Po' il vosâ di chei che vendevin a dincjant... - "No, un... no doi, ... ma tre, braz un franc... ", tele fine di bombasine e di regadin... "Provare... provare... ".

E a turnos regolars le vôs cavernose rinfuarzade di un trombon ch'al clamave la int a viodi dentri il carozon la "donna cannone"... "il serpente boa... ".

Si sintive une armoniche sfladassade che compagnave la vôs strache e stonade dal cjantestories... "La cattura del brigante Musolino..., La partenza, fra suoni e canti, dei soldâz pa l'Afriche..., La Canzone di Pierina, una bella regassina di ricchesse in quantità... "

Dapît dal marcjât, dongje dai carozzons, daûr de cjase di Minine, un cainâ, un uicâ di purcituz fin che sparivin tai sacs dai compradors.

Dut faseve fieste in chel mont di flabe ch'al durave come une sflameade di soreli...

Di tant in tant, parsore chê sinfonie di vôs e di suns, si sgotavin i glons di une cjampane che clamave a preâ".

Sot lis navadis di Sant Stiefin e lavin-su messis, une daûr chê altre, di binore fin misdì passât e su duc' i altars...

Te frescure de grande glesie il profum dal incenz brusât al jere pui fuart e pui gradevul e lis stelis dal sofit dal coro e mandavin rifles come un cimiâ di lusignis di miez avost...

Devant Sant Visens, une statue fate di cere e di pezzot, in chê dì, che no jere la so dì, la int si intropave a preâ, a domandâ gracies; Santramacul e il sò compagn, San Fortunât, che stavin un di cà e un di là da l'altâr, ben modelâz di man maestre, su piere blancje, nissun ju cjalave... nissun si inacuarzeve di lôr...

Di pui di cent ains in cà i pelegrins e vignivin a Buje a San Visens Ferreri il dì di Sant Ramacul; un grant Sant ch'al faseve gracies, bastave cjalà il grum dai quadris, des cruchies e dai cûrs d'arint che erin picjâz sui murs de capele e linti atôr.

L "foresc's" e' rivavin a trops, a ondadis su de Basse, montaz su caretis e cjars tirâz dai cjavai, an vignive di là da l'aghe, a piduline, stracs, cui vistiz grîs cul polvâr cjapât-su in oris di marce, su lis stradis, sot il soreli.

Un aveniment simpri la messe grande; trops di predis e' jemplavin il coro, movinsi lenz e misteriôs, quasi grivîs, sierâz tai lôr aparamenz rôs e aur, ricamâz di perlis ch'e lusivin come gotis di rosade te lûs des cjandelis... e ancjmò predis cun piviai dorâz e altris, sui bancai in rie fisse, cu lis lôr cuetis glancjs, orladis di puntine alte e trasparent, dulà che fasevin spico flocs rôs, vers, blù, viole e rôse...

Sul lâ a mont il soreli, quant che dut il davoi de sagre si sbassave strac e glocjôs, la int e comenzave a ingrumasi su la place dal Munisipi par "viodi a gjavà la tombule".

Sul piûl dal palaz, un frut cui voi leâz, come a zuiâ di gjate vuarbe, al gjavave di un sacut i numars... un omp sorestant al cjalave la balute e po le passave a un altri ch'al clamave il numar jessût.

"Settantesiet... " al sberlave, e la place, sòt vôs, "Lis gjambis des feminis" - "Quarantequatri... " "Cjadreutis" - "Dîs... " - "I comandamenz" - "Novante... "Il nono" - "Disesiet... " - "L'an de miserie" - "Trentetrè... " "I ains dal Signôr" - "Un... " "Capo di mille" "Sessantenûf... " "Un su e un jû"...

Ogni numar al veve une sô imagjne... al ricuardave un fàt.

E vie cussì indenant fàn che une vôs gjubiâl e sberlave: "Tombule!... "

Alore la int e comenzave a lassà la place comentant... a pui di ùn le fortune j jere stade vissine; par un sol numar nol veve fate tombule!...

Intant tes primis ombris che si ingrumavin tal bosc e tai cjantons e che vevin ancjmò tes pleis rais cjalz di soreli e jentrave, a ondadis, la musiche de orchestre di bàl; par Santramacul nol mancjave il breâr sot il baldachin vert di fuèe fisse dai castagnolârs dal Marcjât...

Ben planc si mostravin lis stelis sul cîl turchin e atôr dai lampiòns e dai globos impiâz e comenzave la cjoche di lús des paveis e dai paveaz...

Done Pine e agne Menie e sòn rivadis a Santramacul cu la "gurissane" tacade al cjaval Baio, une bestie cuiete, inteligjente che j mancjave nome la peraule. Le "parone" di Borghet che veve cjapât puest in serpe 'e semeave une matrone romane, cussì petenade a slìs e ben tressade che cjapave pui di miege sente, senze contâ i! cotolon, sàl e pevâr, che si slargjave intôr come un manto; dongje di jê sô cugnade Menie, picinine e cun che musute di pipine, buluzade tune cotule di siet telis 'e semeave un zugatul...

Ce dafâ a passâ in jenfri a tante int vignude a sagre; a rèt la glacere Done Pine 'e cjapà il cjaval pe brene e cussì e à podût rivâ ta l'ostarie di Scoi; lassu nol jere propit un stalo ma i amîs, come che jerin i Murae di Borghet, 'e cjatavin simpri un sotet pe bestie, magari sot la lobie, in somp dal curtîl.

Des puartis spalaincadis des Ostaries e des Tratories al vignive fûr un profum di robe cuete ch'al viergeve il stomi; tripis cul formadi, rost cu lis droghis, vigjel in umit; nome a rèt dal Bacaro al jessive un tuf di bacalà cuinzât cun ueli e ài... an-di preparavin une podine e non'di jere mai avonde in chê dì...

Stacât de carete il cjaval, Done Pine e sveà Primo, il fameut che si jere indurmidît, apene partîz, sul sac dal fèn sul scjalâr... poàr frut le strachece 'e veve vût il sopravento a la gjonde de fieste che lu spietave!...

Prime di dùt i nestris "pelegrins" e son lâz a messe... Ie zornade e va simpri camenzade cul "dominepatris"... jessint di glesie lis feminis 'e an fatis lis primis spesis; Done Pine un mac di sedano e doi di capûs di impastanâ pa l'unviêr, agne Menie invessi 'e veve cjôlt un vasut di canele e une pivide di sclopon par meti sul balcon de cjamare la che filave... E jere la sô passion chê magle di vert flurît. Primo, poar frut, ch'al tirave la gole par une cjampanute di tiere, al è stât contentât subite de parone... e ancje une cjapiele di stranc che costave une palanche j veve comprât... dopo dut lu meretave, ubidient e rispctòs come ch'al jere!...

Done Pine e veve, come simpri, preparade la liste de robe di comprâ a Santramacul.
- "lntant che jò e agne Menie 'o lin a comprâ, tu tu stâs vissin de carete... tu tegnis a mens che nol mancj nuie... cun tainc' foresc', no si sa mai... Astu capît, Primo?!.."

Biadin le sô sagre e jere finide... fiinide cu la cjampanute di crep e chê cjapiele di stranc sul ciâf; nol veve mai vût alc di so intorsi e no j pareve vèr... si cjalave tal laip, ta l'aghe, lì dongje il poz e il mont j pareve gnûf...

Done Pine e agne Menie 'e jerin tornadis-sù pui voltis lì di Scoi cjariadis di robe comprade su lis bancarelis... tante robe di jemplâ il scjalâr de "gurissane"...

- "Ben... par uè al bastarà... " e si jerin sentadis tal tinel, là che podevin viodi la cjarie... e controlâ...

No vevin nancje finît di mangjâ il plat des tripis, che siore Anute Scoi, la parone, 'e vignì a saludâ e a scusasi di velis trascuradis:" -O savês ce zornade che jè cheste... " jur à dite - "bisugne cjapâ i ucei cuant che passin... Ti spietavin, sastu, Pine... ".

Le "parone di Borghet" 'e à capît subite che a la Scoe j bulive alc tal stomi... Lì si sgotavàn duc' j petèz dal paîs...

Sigûr, 'e pensà, Carlin, il fì cjevestri, al veve fate une des sòs e cussì, sintint che la bile j vignive-sù brusangj lis venis 'e disè al frut:"-Primo, finis di bevi il vin che tu as te tace e và dongje de carete... o vignin subite ancje nò.,. ".

La canae, i fruz - sorc senze panole - nol è ben che sintin, che sepin certis robis...
Primo al ubidis cence bati cei, ma... cu la presse al urtà la cjampanute ch'al tignive dongje di sè, cjare come un tesaur e,... patapunfete, a tiere in cent tocs!

Il poaret al restà imbambinît e cence peraule come se al vès cjapade une legnade deventant rôs come une bore di fuc, po i soi voi, restâz fis su chei creps, si jemplarin di lagrimis gruessis e cjaldis...

" - No stà vaî par chèl... ti cjolarai jò un'altre cjampanute... " - I dîs siore Anute "Va vie e spiete che vegnin subite ancje lôr... da bravo... vonde vaît.,. "

A Primo, poar frut, no j lave jù chel grop che si jere fermât sul stomi; si visave di ce che diseve sô mari, quant che no podeve pui di stenz e di miserie: " - Baste jessi poars par che ti capitin dutis... une daûr che altre.,. "