I scioperos

 dal muîni...

Siore Camile, fin de prime sagre dal paîs, du là che ere vignude a stà dopo di vè comprât cjase gnove, e veve vidût di mal voli che tovae su le balaustre pe' comunion generâl mâl sopressade, contose, sbregotade di cere, maglade di rusin, cul merlo a sbrendul.

No veve ricevût vulintîr il Signôr su che canavaze; miôr sul marmul crût e frêt!...

— An farai une gnove... e biele, dute di lìn... no i párie une vergogne siôr vicjari une tovae di che fate?...

II vicjari che al cjoleve il cafè sot de vît tal curtîl nol si sbandà:

— Ce uelie mai fà siore Camile... o sin in t'un paîs di campagne...

In chel stes invier le gnove parone de «fatorie», dopo cene, opûr di fìeste dopo misdì, quant che du'c e levin al cine o a spâs, si met a ricamà une tovae pe balaustre de glesie; le varessin screade il dì de prime comunion de so frute, il mês di mai!

Ce fìestone! Dopo de funzions lis feminis dal paîs si erin fermadis in glesie par viodi le tovae ricamade di siore Camile, ben distirade su le balaustre.

— Un splendôr...

— Ce paziensie che siore... — Cjalait ce fineze...

— Nancje lis muiniis no fasin di ches'c lavôrs...

— Viodeit par gust, ce disen...

A l'ere stât propit chel, el disen, che a l'à puartade le scalogne a siore Camile!

Tal doman de sagre, il muini, tornant indaûr a 'e parochiâl il «piano», i cjandelîrs, il tapêt da l'altâr, e dut ce che al veve cirût par furnì le glesie, al mandà ancje le tovae gnove de balaustre.

— Parcé le veso puartade culì? — al domande el vicjari.

— Soio jò el muini o siore Camile?... Iè che pensi a 'e sò cjase che pe glesie a l'è qualchidun altri a pensà...

— Ma... — il vicjari che a l'ere di pôc timp in paîs e al veve pore un poc di dut, al si incjantà.

— ...al cjalât lui el disen?... Nancje une crôs e jè sù; rosis, ghirigoros, stemis,... stupidaginis... grandecis... cui sà cun cui che crodeve di vè da fà...

II vicjari al saveve che a l'ere pôc ce resonà cun chel «tomo»: al veve lis ideis, e strambèries, cussì ben inclaudadis tal zurviel che no varessin stât di miôr su di un toc di len; a l'ere dibant fai cognossi un tuart, come pestà aghe tal mortâr!... A fà chel servizi, nol ere fazil di cjatant un altri e par chest predis, e popolazion e lassavin cori...

A l'ere stramp. ma dopo dut, al servive ben. Saveso ,cè?... No vevin di dii vedran!...

In glesie al doveve passà dut pes sos mans: al podeve ben di il predi che la messe e veve di là fûr un quart d'ore prin o un quart d'ore dopo; a l'ore che al veve «tirât dentri» so pari e so nono, al tirave el campanel ancje lui.

Une cjandele a S. Florian se ere malade une vacje, fà dì une messe par un defont, publicà ce che a l'ere stât pierdût, ciri bês pal mâl di S. Valantin, puartà rosis a' e Madone, dut al doveve passà par lis mans dal muini.

Un monsignôr vignût cul vescul pe visite pastorâl al veve dite al vicjari di butà fûr chel altarut di lèn carulât, plen di polvar, imberlât, che al stave dapît de glesie.

Al à scugnût, biât predi, tirasal fûr besôl, cui frus de dutrine, fasint scjampà lis pantianis che vevin niât par dentri vie fin su pe statue di S. Roc.

Ogni an, ai prins di zenâr — mi pâr ai tre — fóssial di fìeste o disdivore, apene dentri de puarte grande si viodeve une cjandele impiade: parsore de puarte in t'une lunete uarbe al ere piturât un San Zuan vistît di piels, tal desert pal muini che piture e rafìgurave sante Genoefe, e ancje jé, e veve dirit a une cjandele impiade, almancul une volte a d'an...

Che si vessin provâs chei frus a distudale!

Vês bielzà capît parcé che le tovae di siore Camile e vigni butade fûr de glesie...

No saveve jé, biade siore, dut chest, che il « paron » in glesie a l'ere il muini,

Jó no sai se la fatoresse' jé stade cussì inteligente di capì e tasé, o se i vès dit alc in segret el vicjari; fat a l'è che nissun par tant timp al à fevelât, de tovae de balaustre.

Ma la sere dal prin da l'an, jentrant in glesie par sierà, il muini si fermà di colp tal miez come se i stes par vignii mâl; su le balaustre la tovae contose, mal stirade, sbregotade di cere, maglade di rusin, cul pizzo a sbrendul, no ere pui...

Une robarie in glesie di almancul cent ains no sucedeve.

Cui podevial vele puartade vie?... Nome le «fatoresse», par podè meti lì la so, cun chei ricams, senze nancje une crôs!... Al dà di clostri a lis puartis, e vie dret in canoniche, dal vicjari:

— Cà e son lis clâs de glesie... e si ricuardi che il «sottoscritto» nol farà pui servizi fin che no torne dongje le tovae...

— Cemût?... al domande il vicjari.

— Cussi... le tovae e è sparide... che al vadi lui de «fatoresse » e al vedarà che le cjate.

E fur lui di canoniche bruntulant come un temporâl.

Tal doman nissun sune, ne tal passadoman, e cussi fin a Pifanie; nancje sante Genoefe in chel an e à vût la so cjandele impiade su la puarte!...

II vicjari al repezave cui frus ma senze muini a l'ere un cjastic.

No podeve durá cussi! E difati il dì de Pifanie al sucedè el miracul tant che dut el paîs a l'è stat sot sore come pocjs voltis in te so storie.

Dopo messe grande il vicjari al veve batiât un frutin nassût in t'un carosson di singars fêr in te taviele, e chei che

vevin vedude le cerimonie e vevin viodût che il singarut a l'ere vuluzât, come un principîn, in t'une tele di lin, ricamade e blancje come le nêf ; le tovae di siore Camile fate pe balaustre de glesie e veve servît a visti un gnûf cristian...

Ce cjacaroná in dute le vile! Ancje il vicjari, al cjalave, sot dai ocjai, chel splendôr di ricams e di pizos.

Le sûr dal muini che veve viodût dut e côr a contà a so fradi:

— Stúpide... tu sês stúpide... nol è pussibil... un lavôr di che sorte dalu vie ai singars?!... Và vie... và vie, mate... no ti crôt...

Ma no ere finide cussì pal borg in che dì.

I frus lâs a cjoli soreâl par fà il burielon da l'Avent sul cuel, strucjant une cjape, ti cjatin sot un vuluz di robe blancje, sporcje e sanganade; la vecje tovae de glesie, parade a tocs...

E ce ti fasial chel bifolc dal Ros di Jácume dal Cjasâl?...