La file des mascaris 'e vignive jù pe strade principal dal paîs, jenfri dôs sdrumis di fruz ch'e corevin, ch'e si pocavin, ch'e sberlavin a fuart la lôr maravèe: « Viôt chest... Cjale chèl... ».

La int si jere intropade su lis puartis e sui balcons, su lis andronis e sot i puartis e duc' e' vevin ce dî: sul « corteo » des mascaris al jere dut un neveâr di curiandui, un sfusetâ di galis di cjarte colorade.

Un spetacul che al clamave ogni an int di duc' i contornos.

Une mascare 'e vignive indenant a cavaloto di un cjaval blanc, cuviert di une cussine rosse ch'e sbrendolave di cà e di là come flamis ta l'aiar; il « cavalîr » al jere vistît a neri, cun cjemese blancje e sul cjâf al veve un cjapiel dûr a cane, la muse le veve pastrozzade di colôr blanc, rôs e neri; passant al saludave la int e a lis fantatis al mandave basins cu la màn vistide di guanz neris. Il cjavàl lu tignive pe brene un frutat vistít a blanc, cun tune frece metude a tracole, cu la muse frosenade.

« Dut Tite de Roste chel mostro » 'e smurmuià la veje dai Gjâi, alzant il cjâf par vjodi miôr chel quadri.

« E cui saressial stât chest Tite? » 'e domandarin lis frutatis che vevin sintude la vecjute.

« Jò lui ai cognossût... ualtris o sês zovinis.. e' jerin chei altris timps... Timps che no tornin... ». E la femine si mèt a contâ la storie di Tite de Roste.

Siôr Tite al jere un bulo, un balarin c'al bateve duc' i breârs... le so sostanze 'e jè lade cussì: bài, zucs e feminis; un cjavestri simpri stât che al à fate murî sô mari prime dal timp... Al veve une sante femine, a la buine, ma lui, chel brut mostro, le lassave a cjase cui fruz che no podeve nè lènzisi nè parâsi di moscis, e lui cjocàt e quant ch'al jere in chel stât ancje le bateve... botis di ueli sant, poarine... Una volte, però 'e à vût coragjo... un coragjo che nissun lu verès crodût... No veve un boro par cjoli el pan 'e sô canae e chel omenat al jere lât al veliòn, no sai di ce societât... Catine si viest di mascare, jê e une sô amie, e su al veliòn.

A vjodi chel spetacul si sinttì a tremâ i 'zenoi. J pareve di jessi jentrade tun altri mont... J mùrs e' jerin fodrâz di ghirlandis di elare e sempreverde, di curiandui, di balonuz a « la veneziane ». Tes nicjs ch'e jerin atôr de sale 'e vevin metûz pipinàz, omps e feminis, a colôrs, ch'e balavin o ch'e bevevin, che si bussavin o ch'e ridevin a plene bocje. Daûr de plonche, dute la siorîe dal paîs, sentade atôr di taulins plens di tacis e bicjerins, duc' vistîz di lusso e profumâz, cun rosis chei omps sul golâr e lis feminisi sui cjevei. Lampadis a caraburo e' ardevin pardùt, mandant-fûr un pivòt di flame vive, blancje ch'e inceave. I sunadôrs su la orchestre si viodevin fra lûs e scûr e fra di lôr sioris sbrazzadis ch'e butavin filainis di cjarte colorade sui balarins... e duc' rdi e duc' contenz... No cussì jê poarete...

A viodi chês dôs mascaris duc' si fasin dongje par volê balâ cul lôr, e vê la braure di savê i prins cui che jerin: qualchidun al à ancje tentât di tirâjur vie al vel denant de muse, ma dibant... Siôr Tite, che nol steve te piel ancje lui, al rivà a fâ un zir cu la so... femine! 'E balave ben, che mostre di mascarine. Di un àn fasin doi, di doi tre... po la invide a bevi un got e dopo a... ciapâ une bocjade di àiar di fûr...

« Mai plui tant bèn «, al diseve siô Tite ai amis tornant in saîe « une pipine chê mascare; 'o sarès stât dute la vite cun jê...».

Quant che al lè a durmî a straoris, poiant la canute su l'armâr de cjamare, ce ti viôdial?, doi « napoleons » d'aur ch'e lusivin come dôs boris di fuc.

«Catine » al domande « ce bêz sònin chei culì? ».