Su la place di San Scjefin a' son doi ch'a si cjàlin di stos, un vecjo e un 'zovin. Il vecjo, dut squintiât, di un pôc in cà al é malât, al fâs fadìe a stâ in pins, cà e là ogni dì j cole alc. J àn dit che la medisine 'e jé pronte, ma ch'al é miôr spetâ prin di tacâ la cure. Ma lui si sint sgrisui simpri plui luncs ch'j còrin dentri vie e che lu fasin dut tremâ. La int j passe dongje e j dîs cun compassion: «Fâti coragjo!»; ma nissun j dà une man. E lui al devente simpri plui suturno. Il 'zovin, invezit, al è dut plen di morbin, al sint a pocâj dentri la voe di vivi, al cjale indenant

legri e sigûr. Duc' lu slissòtin, e lui al à simpri plui primure di fâ viodi a duc' cui ch'al é.

Jur àn dit a duc' i doi che di cumò indenant a' varàn di lâ insieme a bracet dentri dal secont milenari de storie di Buje. Ma il vecjo al pense: — Cemût, jò lâ insieme cun chel snacaòt impertinent e presuntuôs?! Lui al crôt di sei cui sa cui e al à nome chê di cori... Ma cun chês gjambutis lì, sot chel cjavon slavrât e sproporzionât, trope strade crodial di fâ?... E po, nol è bon nancje di cjalâ lontan cun chei voi sgragaôs

ch'al à —. Intant il 'zovin al pense: — Viôt lì ce tomo! Cemût si puedial lâ indenant insieme? Cun dute chê maserie di clapigne che si tire daûr, cun chês medais coloradis ch'al à denant e chei penacui sul cjâf al semee un bar-bezuan... Jò mi vergogni a lâ atôr cun tun cussì... —.

Sot sere, lât a mont il soreli, quant che su la strade nol passe plui nissun, il 'zovin s'indurmidìs a colp, cence pinsìrs. Il vecjo, invezit, nol rive adore di durmî. Tal so cjâf s'ingrùmin i ricuarz dai cent ains passâz lì su chê place; e lui s'ingrope. Si vise di quant ch'al jere 'zovin e che la int, massime i foresc', lu cjalavin come une maravee. Ce fieste i emigranz quant ch'a tornàvin a cjase de Gjermanie e lu cjatàvin simpri plui biel... Si vise di tantis robis sucedudis su la place di San Scjefin, di processions e di comizis, di sagris e di barufis... Si vise dai soldâz de prime e de seconde uere mondiâl, dai «mucs», dai fassisc', dai cosacs, dai partigjans... che simpri lì, denant di lui, a' vignivin a mostrâ la lôr braure. E si vise de int ch'è

vignive in fole mò a suplicâ cuintri i pericui, mò a fâ fieste... Fin ch'al é vignût chel spavent di taramot ch'al à gambiât dut...

Cussì cumò, su la place di San Scjefin, il vecjo e il 'zovin si cjàlin di stos. Nome ogni tant qualchi peraule di convenienze, qualchi rugnade rusine dal vecjo, qualchi uicade dispinsirade dal 'zovin.

Ma chê altre dì, par câs, mi soi cjatât a jessi lì, su la place di San Scjefin, intant che il soreli dut sflameât al leve a mont. 'O cjalavi impipinât chel spetacul unic che si pò viodi nome di chel sît. La lûs rosse dal soreli 'e veve impiade la fazzade dal Domo, ch'e balinave dute, massime lì dai mosaics, parsore dai puartâi. Quant che dibot une vosite mi à distrat. Al jere il 'zovin ch'al diseve al vecjo: «Ce biel che tu sês!... » 'O ài spizzadis alore lis orelis tal cidin. Nome un biel pôc dopo 'o ài sintude la vôs ingusside dal vecjo ch'j smurmujave: «Va là, snacaöt, che no tu sês po nancje tu tant brut!... ».

Cui sa che tal prossin milenari no rìvin a metisi dacordo?