Cheste e je une storie vere, di chês che e fasin pensâ e che al è biel ripuartâ par scrit, di mût che tal

timp e resti.

In dì di vuê, o cjatìn simpri mancul int cun chê nobiltât di cûr tipiche furlane di tantis personis

dignitosementri puaris di une volte!

A Bianca e a ducj i furlans che si son fats grancj denant dai oms e di Diu pe lôr onestât e umiltât.

Bianca, cumò e à 83 agns e di mistîr e fâs la none. E semee la classiche none des flabis: piçule e tarondute di fisic e di muse, cu la bocje simpri contente (des voltis cui dincj, altris cence..) e cui ocjai pençs sul nâs. Jê no va mai ator, il so mont e je la sô cjase dulà che le cjatìn dispès sentade dongje dal fûc a gucjâ o a cusî, a lei, o a preâ; ma ancje a scrivi lis sôs memoriis. Ricuarts di une vite di miserie dulà che il perni di dut, par sbarcjâ il lunari e tignîsi sù e je simpri stade la fede: “a glorie di Diu”, come che propite si usave dî in chei timps che a nô nus parin cetant lontans...

Bianca e jere une vore leade al nono paterni Marc, un om tant bon; e conte che la fede le à ereditade propite di lui.

Ogni sere, Marc plet di agns e strac di lavôr, nol faseve mai di mancul di tignî sù il rosari. Al jere deventât un rît di devozion e ringraziament sul finî de zornade.

Si inviave biel planc te sô cjamare e, rivât devant dal cuadri de Sacre famee, si gjavave il cjapiel in

segn di rispiet, po dopo si inzenoglave sul vecjo scagnel e li, dut cjapât, si faseve il segn de crôs e al tacave a preâ... (dis. 01)

Chest ricuart une vore dolç e biel, Bianca lu ten di cont tal cûr e spes lu à iniment.

Invezit, la fede che il nono i à savût trasmeti, le compagne ancjemò in dì di vuê in ducj i moments plui o mancul biei o faturôs de sô vite...

Al jere il 3 di Otubar dal 1960 e Bianca e steve par meti in chest mont il cuart fi, Mirco.

Aromai a jerin za tredis oris che e veve tant mâl e il part nol leve indevant. La zovine comari si jere rassegnade e, metintsi sù il spolvarin, e veve conseât al so om Enso, di puartâle tal ospedâl parcè che il part si presentave intrigôs e sigurementri e varessin vût di fâi il tai cesari. Chest al varès compuartât ae famee une spese onerose: plui di cent mil francs; un cost, par chei timps, une vore alt par un belanç familiâr za tant tirât. (dis. 02)

A chestis peraulis Bianca si jere sintude come a mancjâ... Une strane sensazion che no i faseve sintî plui nissun dolôr, al jere come se e fos intun sium: i pareve di sei in glesie, in zenoglon suntun frêt scjalin di marmul, propit sot dal altâr de Madone.

E li, sot di chê statue, si viodeve a preâ cun devozion e lancûr: “Madonute, judimi in chest moment! Nome Tu tu sâs lis nestris cundizions! No vin bêçs par lâ tal ospedâl! Ti prei, judimi a fâ nassi chest frut!...”

A interompi chescj pinsîrs e tornâ a puartâle ae realtât e jere stade la vôs clare di sô mari Jole che e clamave Enso e lu incoragjave a judâle ancjemò, doprant cheste volte il mût di fâ de vecje ostetriche, chê che e veve fat nassi chei altris trê fruts. Cussì, lôr doi e le zovine comari, che e jere ancjemò li, insieme, si jerin dâts da fâ par judâ Bianca te maniere miôr pussibil.

Di fat, pôc dopo, za si viodeve il cjavut dal frut.

Ma al jere volût ancjemò un lunc moment di lambic par rivâ a fâ nassi cheste creature: un altri mascjo di ben cinc chilos!

Ancje se Bianca e jere madure e ridote cence fuarcis par dutis chês oris di travai e soference, cul so pinsîr e ringraziave di cûr la Madone parcè che dut si jere comedât seont nature.

Il piçul, tai prins dîs, al steve bon e al durmive tant, ma cul lâ indevant des zornadis al veve tacât a vaî simpri plui dispès.

Pe grande batoste, Bianca no veve lat e cun di plui, cun grant displasê, si jere acuarte che il frut nol moveve il braç diestri: se e provave a alçâlu, al colave jù a pendolon, flap, cence tignince.

Cuant che al vaìve al moveve nome il braçut çamp.

Spaventade, Bianca e veve tacât a filâ sore che il braç al restàs paralizât. Cheste pôre no le lassave ni di dì, ni di gnot, e veve ancje pierdude la voe di mangjâ e il lat inmò no i vignive par colpe di dute cheste ansie... L’unic rimpin, come simpri, e restave la preiere: e preave ducj i Sants, l’Agnul custodi e la Madonute... Cussì, cul cûr in man, e veve fat ancje un vôt: se il frut al fos vuarît, cui prins bêçs che i saressin vignûts dongje e varès fate dî une messe.

Sigurementri, preiere e sperance le vevin judade e sostignude in chest moment di grande avilizion.

La comari le veve conseade di clamâ un pediatri par fâi viodi il braçut dal piçul; ma cun ducj i debits e cence un franc, cemût fâ?

E alore, l’unic confuart inmò une volte lu veve cjatât te preiere; e preave simpri, domandant la gracie par chel braçut che e tignive sfreolât e cjalt miôr che e podeve.

Dopo cinc dîs il braç al veve tacât a movisi e a stâ un pôc sù e, al pareve che ogni dî che e passave, al cjapàs simpri plui fuarce.

Ah, trop che Bianca cu la preiere e veve ringraziât la Divine Providence!...

Cualchi zornade dopo il part, vie pe gnot, al jere rivât un om a cirî Enso par domandâi jutori: il so camion al jere restât impastanât tal paltan intune stradele abàs di une culine fra Mels e Melesons. Enso, si jere rindût disponibil subit e lu veve tirât fûr des pastanis cul tratôr.

L’ om, une vore ricognossint, par disdebitâsi, al veve volût lassâi a ducj i coscj cinc cent francs. (dis. 03)

Chescj bêçs ju veve puartâts subit a Bianca par che e fasi dî chê messe imprometude ae Madone propit cui prins bêçs che i saressin rivâts.

Cussì, une sere dopo vê stât a puartâ il lat, stant che e jere di chê strade, Bianca e decît di lâ daurman in canoniche di Pre Fortunât Molinaro par saldâ il so debit di ricognossince.

Al predi, Bianca i veve contât dut ce che i jere capitât e i veve confidât di vê ricevût une vore di jutori de Madone, tant di fâ un vôt cun jê. Pre Fortunât, che al veve tante umanitât e al cognosseve la situazion misare de famee, al voleve lassâi i bêçs; la messe le varès dite distès.

Ma Bianca, fedêl ae sô peraule, e veve insistût par che al tignìs la sô ufierte.

Cuant che e jere jessude de canoniche, al tacave za a vignî scûr e al jere aiar.

Pe strade no jere anime vive. Bianca bessole cui siei pinsîrs, si sintive il cûr seren.

Aromai la sierade e cjapave pît cui siei profums e i siei colôrs. L’amont al veve tenzût il cîl cun sfumaduris che a levin dal colôr di rose al narançon e al viole. Dut chest i dave un grant sens di pâs. Lis fueis dai arbui a rodolavin di ca e di là, daûr des bugadis dal aiar... ma jenfri chês fueis al jere ancje alc di diferent: une cjarte che e voltolave simpri e nome devant di Bianca. Lu à fat par un lunc moment, rodolant di continui devant di jê, cence mai spostâsi o svolâ vie...

Dopo un pôc, la femine incurioside si jere sbassade par viodi miôr e, cun maravee, si jere acuarte che no jere une semplice cjarte, ma nie mancul che... cinc cent francs!... (dis. 04)

Il Signôr, Lui che dut al sa, al veve volût tornâ chei bêçs a cui che al veve plui bisugne.

Cuant che plui tart, Enso, finît i lavôrs te stale al jere tornât a cjase pe cene, al veve cjatât Bianca seneose di contâi, cuntune cierte conturbie, il fat miraculôs.

La preiere e la sperance tropis robis vevino fat lâ a bon fin?

Nol jere coventât il tai cesari tant cjâr, ni la visite dal pediatri e cumò a jerin tornâts dongje fintremai i bêçs de messe!...

Bianca e veve pensât che no si po rivâ adore a vê dut chest sorenuie.

Di fat, dopo chestis facendis, si jere imprometude di meti dute la sô buine volontât par lotâ cuintri lis blestemis.

E veve tabaiât a lunc cun Enso dai câs che ur jerin capitâts e lu veve conseât di no blestemâ plui, come debit di ricognossince pal ben otignût dal Signôr.

E di in chê volte, Enso nol à plui blestemât.