LA FLABE

Une volte, une siorute di apartament e veve comprât un biel cjan: di marcje, pelôs chel tant, ben tressât su lis gjambis, vivarôs. E molât su la teraçute di cjase.

Tun cjanton i veve preparât un cusso di lusso e dôs padielutis di smalt, une pal mangjâ e une pal bevi.

La paronsine lu tignive di voli dal balcon par controlâ se si usave tal puest che al jere capitât, e si consolave a viodilu content a lapâ i tocuts di cicin e la aghe preparâts. E steve ancje atente se al alçave ogni tant la talpute come che a usin a fâ i cjans unevore daspès. Nuje, mai; nancje une volte.

Difat, tal indoman, il cjan al fermà di mangjâ cu la panze sglonfe.

Lì par lì clamât i vetrinari e spiegât il câs.

Il miedi des bestiis, dopo vê ispezionât la terazute:

- Siore - dissal - une robe di nuje: no sâe che i cjans, par alçâ la talpute e àn bisugne di un morâr, di un arbul. Se no, no ur ven.

Dut alì; al covente un morarut.

La siore, contente, e pajà vulintîr, ancje parceche al è miôr spindi in conseis che no in midisinis, e si invià di corse a comprâ la plante.

E puartà a cjase un biel arbulut vert, di plastiche, cul tronc cuviart di une pelande grese e colorade uso muscli, e cu lis fueis verdulinis, lusintis, di lamarin vernisât; che a tocjâlis a zinglinavin come une muzine e lu pojà su la teraze, tun cjanton, a disposizion de bestie.

Il cjan si vizinà, al nasà un pocjis di voltis di une bande e di chê altre e, dopo vê cjapade une spiçotade sul musìc tune ponte di fuèe, si ritirà tal so cjanton, avilît come prin, cul cjâf a pendolon.

Clamât in premure, al scugnì tornâ il vetrinari. E ancje cheste volte la diagnosi e fo