Al jere già cinc sîs dîs ch’al ’ere rivât in te farme. El farmaiûl, cun passiensie al faseve viodi a Luigino un pôc in dì, cemût ch’al veve di netâ le stale, meti su el ledan sul carèl e svuidâlu in tal casson dal sliton di fûr de stale. Al ere in plen unviêr! Dopo fate gulizion, e cjapade une cjalde, si tornave in te stale par molgi quatri o cinc vacjes e fâ âtris lavôrs.

Quant che el farmaiûl al jemplave un seglot di lat, Luigino al veve di puartâlu ai purcits. Luigino si è fat spiegâ parceche al molgeve dome cussì pocjes vacjes e ancjemò a man, cun ducj i aparâts ch’al veve par molgi a machine. «Dutes chês âtres vacjes e son plenes, di conseguence cumò e restin sutes» i rispuindè el farmaiûl. E erin dôs bieles files di vincjecinc vacjes par bande, blancjes e neres, di rasse olandese “Holstein”. «Dopo ch’e an parturît – al continue el farmaiûl – i scomençarìn a molgiles a machine, ma par cumò e son dome chês quatri achì che bisugne svuidâ. Doman tu provarâs tu, tu âs viodût avonde cemût che si fâs!»

Tal indoman, dopo gulizion, i ordene di lâ in te stale a molgi chês quatri vacjes ch’al sa, che lui al sares vignût plui tart parceche al veve di lâ un moment in paîs. Luigino al cjape su i doi seglots, di “stainless steel”, lusinz, e jù pal troi ch’al puarte in te stale. Le nêf e cricave sot i pîs, el cîl al ere blu come in tes cartulines di Nadâl, el termometro al diseve trenteun sot zero.

Dut orgogliôs, al gjave el gjachetòn, al cîr el scagnùt: «Almancul chei scagnùts achì e an tre gjambes, no son come chei cjargnei ch’an dan une sole e bisugne stâ in equilibri par stâ sentâts - al pensave Luigino – par furtune!». Cjatât el scagnùt, si prepare. Lu met a plomp sot dal luvri, al prove a sentâsi, al fâs qualchi justament, al fronte el cerneli tal flanc de bestie ae altece dal luvri, al met un seglòt di “stainless steel” lusint jenfri i genoi, al cjape “timidamentri” une tete par man (le prime volte te sô vite), al siere i voi e…, barbotant tra i dincj une specie di avemarie, al scomence a tirâ. Le vacje e tache a smenâsi, e vâ di cà e di là. «Salacôr i fâs mâl», al pensave, e tirant el scagnùt plui dongje de vacje al torne a provâ: un-doi, tire-tire, un-doi, a ritmo cadensât… «Cemût no si sint nissun sun in tal seglot? I sune pursì al farmaiûl quant ch’al molç lui? Ao forsit di gambiâ tetes?» Al cjape âtres dôs e al comence a tirâ. Finalmentri al sint qualchi sun a vignî su dal seglòt. Al cjale e al viôt alc di blanc che si môf sul font. Cjapât coragjo, al comence a tirâ simpri plui, a ritmo, cun plui aviditât. Plui al tirave e plui, cence inacuargisi, al sfreolave el cjâf tal flanc de vacje e plui al tirave les tetes e plui al strengeve i genoi.

I sudôrs i corevin jù pe muse, el rumôr ch’al vignive su dal seglòt i deve coragjo. Luigino al tire a ritmo: un-doi, un-doi, cun dute le sô fuarce. I semeave di lâ su pe rive di San Denêl, quant che le tacave in biciclete, indulà che le meteve dute par rivâ fin sot dal portonàt!

Un-doi, tire-tire, un-doi… Dopo qualchi cinc minûts, inmedesimât di sei rivât fin sot dal portonàt, sfinît, cence flât, cjalant in tal seglot chel liquit blanc (e devi sei stade ancje une buine part di sudôr), al fâs une pause e, passant sul cerneli le manie de cjamese par sujâsi i sudôrs, al bute el cjâf indaûr tirant un grant suspîr a plene bocje vierte: «Haaah!».

“Sspatapunfff!”

Luigino si è cjatât par cjere. I semeave che une manone invisibil, tipo Carnera, i vedi menât un scufiòt di chei! Dut sturdît, al à començât a spudâ, nol viodeve nuje, al sintive le bocje plene di alc cun tun savôr e odôr plui che familiâr… Spude e spude… e spude! Ce isal sucedût? Ce isal stât? Le code del “pio bove”, cui siei bocui a pendolon imbombâts di frescje “fujace” ancjemò fumant, i veve dade une sgoreade in plene muse quant ch’al polsave cule bocje vierte. Forsit si ere svindicât dai dolôrs patîts par colpe di chel puar principiant di famei. «Le prossime volte tu savarâs miôr cemût fâ», i pâr sintî a cisicâsi tes oreles.

Spude e spude… Par furtune che quant che si sujave i sudôrs in tal cerneli al veve le manie de cjamese che i parave i voi, senò al sarès stât ancje svuarbât di “fujace”! Intant ch’al continuave a spudâ, al viôt el prodot dal so sudôr spandût sul pedrât de stale. Dut rabiôs, al dà une pidade al seglôt che cun tun glo-gloc, glo-gloc, si ferme jù pal curidôr. Al va par cjapâlu su, ma i dêts des mans no rivin a viergisi plui. I gnervs si erin ingrumâts, ingredeâts tes canolês, nol rivave a dreçâju. Al veve doprade masse fuarce par tirâ les tetes di chê puare vacje!

Belanç de prime molgiude di Luigino Cavalèt: par qualchi zornade nol à podût doprâ les mans. Le femine dal farmajûl e scugnive botonâj e disbotonâj le cjamese. Le buteghe dai bregons le lassave, un pôc imbaraçât, miege vierte. El seglot di “stainless steel” lu veve fat vignî come une sespe. Par un pôs di dîs al cjaminave cavalòt, come chei ch’e fàsin le prime cavalcade a cjaval.

D’in chê dì e an scomençât a colâj i biei cjavei riçots ch’al veve e par setemanes dut al saveve di bujace e nol faseve âtri che spudâ e fâ i gargarismos ad aghe e sâl.

E les tetes de vacje? Un bon sentesin plui lungjes!