Nol è dificil o impussibil che un artist al fasi un'opare par tigni impiade la memorie di une persone famôse, ch'e culpìs la fantasie e 'a stice il fûc de cretivitât. Ce no àno fat in onôr di Napoleon e Garibaldi. Ritraz, statuis, medais, libris. Si calcule che su Napoleon 'a sedin stâz scriz cinquantemil libris!

Ale dal gjenar, ma plui in pizzul, al sucêt ancje par Pier Paolo Pasolini e Tina Modotti, doi furlans deventâz famôs tal mont fasint cine e fotografie. Jò stes 'o ai vude l'ocasion di documenta, su "La Panarie" e su "Ciasarsa" (numar unic de Filologjche), une part de produzion artistiche dedicade a chesc' doi artisc' e no varès nissune reson par maraveâmi de medae presentade al Green Hotel ai vot di dicembar stât.

In chest câs, però no si trate dome di un colp di estro di un artist, o di une opare nassude par comitince. La medae che Arnaldo Baldassi al à fat in memorie di Pasolini 'e jè il risultâi di une rafinade operazion culturâl ch'e partìs di lontàn e si inquadre te biele tradizion de "bujesitât culturâl". Par contâle dute, bisugne partì dal gustà de Deputazion di Storie Patrie pal Friûl dopo il congrès di Cjasarse.

No masse par câs 'o cjatai puest dongje di monsignor Menis e Sefìn Tonino, che di autun 'a tàchin a vê fan di articui par Buie Pore Nuje!. E cussi, fra un plat e chel atri, 'a butàrin là l'idee di un articui su Pasolini pal numer unic ch'ai sarès vignût fûr par Sant Josef, come ogni an. E jò, no sai parcè, no soi bon di dî di no, in chesc' câs!

Mi metei alore a scrivi e dopo un mês 'o inviai a Buje il contribût compagnât dal disen dal simbul de "Academiuta", ven a stai l'ardielut (par talian dolcetta), un pâr di documenz sui ains furlans di Pasolini e qualchi biele fotografie di Deborah Beer, une bravissime fotografe ch'e faseve fotografiis sui "set" dai films girâz dal poeteregjst.

In qualsiasi altri puest, il miò articui e lis fotografiis 'a saressin restâz un episodi isolât, ma no a Buje. Chei di Ursinins Pizzul, in fat, cun tante sensibilitât e inteligjence, 'e an volût che il miò contribût al ves un seguii, e cussi 'e an dit a Arnaldo Baldassi di fâ une medae. E, meracul tal meracul, al pâr che a Buje ogni artist, ancje se pitôr come Arnaldo, al sedi bon di fâ medais di alte qualitât!

L'artist si è fat stria dal profîl di Pasolini ch'ai comparìs tune foto di Deborah Beer, e sul metal al à dât eternitât a une forme che, come che si sa, no dure masse a lunc su pelicule.

'O soi tant content ancje pal dotôr Piero Colussi di Pordenon, President di Cinemazero, ch'a mi à dât chê fotografie, e par Deborah, muarte masse adore.

La vere culture, come ch'e si viôt, 'e à lidrîs lungjs e 'a prodûs ramàz unevore luncs. La medae 'a sarà tal timp il ricuart di Pasolini, di Deborah e di duc' chei ch'e an lavorât.

Si pues ben dî che, in chest câs, la medae 'e jè une opare coletive, ancje se il mert pe composizion plastiche al è e al reste dal pitôr Arnaldo Baldassi.