FOTO

Jo j soi Serena e j fâs le tierce.

Par dute le prime e par un mês de seconde j soi stade a scuele cun Gilda, ch'e ere une des mês maestres. Mi visi tantes robes di jê: par esempli di quanch'e diseve batudes che nus fasevin ridi. 'E diseve simpri "Orche Bete" quanche le fasevin rabiâ.

Buzzi, un gno compagn di classe, al à imparât di jê e lu dîs ancje lui. Quanche lu sint mi torne tal cjâf jê. Mi visi ancje di quanche nus à dite, un lunis dopo misdì, che tal indoman 'e veve di lâ tal ospedâl.

Nô j sin restâs mâl, ma j pensavin ch'e tornas. Une dì, dopo tornade dal ospedâl, nus à telefonât a scuele, ma nancje fâlu a pueste jo j eri malade. Cussì j soi lade a cjatâle a cjase, a Nadâl. Ancje se no steve ben, nus à mandât a scuele, par che si preparassin a lei te messe di Nadâl, les poesies di Guido Brini. Jê 'e à simpri judât a fâ chestes iniziatives. Mi pâr ch'e à lavorât ancje par "Buje Pore Nuje!".

No jè tornade mai pui a fânus scuele. Jo 'o pensi che le vèdin clamade a insegnâ ai agnulus, parceche 'e ere masse brave. Alore, pe messe di Nadâl dal '96, j ai scrite une poesie e le ai lete insieme cun chês di Brini, te glesie di San Florean, che al è el so borg là ch'e ere nassude. I soi sigure che jê nus viôt e che le à sintude. Sperìn che j vedi plasût.

A Nadâl duc' nô j sperìn di
stâ ben, serens, contens e a
Gjesù j domandìn pâs,
salût, boins sintimens.

Ancje jê ti domandave di
vuarî, satu Gjesù. Cuissà
trop che lu sperave, ma
cumò 'e jè cun te, lassù.

Nus faseve lei poesies in te
messe di Nadâl. Nus
contave ancje bausies
par platânus el so mâl.

Nô, spetant Gjesù Bambìn,
j speravin ch'e tornas. "Dopo
fieste le viodìn" j pensavin,
ma j erin mas.

Jê 'e fâs scuele ai agnulus
chei ch'e stan cul bon Gjesù.
Ere tant buine cui frus
ch'e an volût vêle lassù.

Ma nô no dismenteìn ce che
jê nus à insegnât: les poesies
j disarìn par Nadâl, come an
passât