Lassù dal Ricovero

Nô, borghesâns di Ursinîns Pičul j, sin parons de plačute e de glesie di Sant’Osef, di chê dal Sacrocûr (comprendût el Ricovero) e dal simiteri di San Bortul. No spieghi parcé me ’e jé cussì.

Mi impensi di une volte (si crodeve inmò in Domine Dîu) un taponut di femine, tarondute e contente, no sai fìe o agne o sûr di cui ’e faseve di parone e di fidanime lì dentri dal Ricovero; ’e veve non, par duc’, Mariutin. Jè ’e faseve ce che les muinies j domandavin; no à mai domandât parcé.

Qualchi volte ’e bruntulave cun Vire, grasse e ruàne di muse, ch’e contave che si va sù in Paradîs cu le scjale di sede.

Jo frut, pensant che chê scjale si pleàve, mi fasevi scrùpul di no podê par nìe lâ in chel sît e j disevi: Màte. Le sô matetât mi pâr, cumò, ch’e fòs dome le fan.

Insieme cun lôr ognitant si petečave Eme de Malvine ch’e ’ere a stâ jù pe rive lì di Cire Capelàn.

Dentri dal Ricovero no tante int come cumò che el mont al è lât indenant (par chest el Omp al è restât indâur) plui muinies ch’e cognossevin int e borc, ch’e preàvin cun devozion e che, come tes squadres di balon, ’e fasevin “el tifo” pe lôr congreghe.

Francescanes come chês dal Asilo di Sa’Scjefin ma plui dongje dal spirt di Checo par vie che lôr ’e vedevin de miserie de puare int e no come chês altres che invesse si tignivin plui sitadines e ’e vivevin veramentri in tun ambient di plui confuart no sôl spirituâl.

El omp “tuttofare” (si dîs cumò) al ’ere Gaetan; omp cence etât, spelât sule coce e che al vève doi pòmui rôs sule muse; ma no ruans di cjòc ma madûrs di soréli e lustrâz de buere di tramontàn. Lui al veve el “šaré” neri cules ruvedes neres e i rajs di len rôs e el cjaval, un sàuro ma no biel come el Gjgj di Pieri Cost, al ere instès avonde ben tignût parceche, co’ al coventave, Gaetan lu tacave, al montave sù dôs muinies su le briscje ben netade e les menave a Glemone te lôr Cjase provinciâl; po’ al tornave indaûr sul lâ a mont soreli.

Diretôre di dutes les fasendes di muìnies, di malâz e di besties ’e ’ere madre Arcangela (les muinies si metin intôr di chêi nons che Dîu nus vuardi trop bruz ch’e son) une femenute cui ocjâi, cun stature di muinie: inteligjente, energjche, cun autoritât e ch’e crodeve in Dîu.

Cule sô sapience no faseve nissune fature a sbarcjâ el lunari e a dâ rese di cont ai sorestanz prin parceche le miserie ’e à simpri dade une buine man al čurviel e po’ ’e veve le colaborazion di sorestanz ch’e vedevin le Cjase di Ricovero cun voli catolic: ispirât ae buine gracie de pietât e no a nujatri.

Jo j ài scomenčât a lâ a servî Messe al Sacrocûr e, par me, al ere come lâ a Rome in Vatican cul Pâpe.

Don Aldo par tant timp e po’ don Fulvio ’e spiegâvin el vanseli di domenie e, dopodimisdì, si lève a benedizion dopo el cjant dal Tantum ergo. ’E vignivin ancje i vecjos ch’e scomenčavin a dâsi dongje clamâz di Suor Margherita che, po’, ’e sarès deventade Madre e che si pojavin daûr de prime rìe di bancs jentrant de puarte de bande dal Ricovero parceche le prime rìe le dopràvin les muìnies.

Te gleseute si è sposade tante žoventût di Ursinîns: Silvia, Marta, Meneùte e cun jé ’e an fat gnòces d’arint Egle e Agnul in te stesse cerimonie e il viulìn di Gjovanni, roman e cugnât di Egle, al sunà l’Ave Marie.

E nô a servî messe par cjapâ i bêz e i conféz ch’e butavin dal corteo e che si cjapavin sù partiere (j vin fat anticorpi come vigjêi). No puès lassâmi lâ a prucissions di Corpus Domini, a gnoces, a scampanotades, a Messes, a Rosaris, cence fâ une riflession.