Real Tombe

di Ermes Taboga

Atôr dal '53 – ‘54, sot de guide di Tite di Fabio (GioBatta Pezzetta), president, cun gno fradi cassîr, i mui di Tombe, cun sacrificis che apene j podìn imagjnâ, 'e meterìn insieme, alc a la volte, i bês che coventavin pal coredo di une scuadre di balon: maes, mudandes, cjalcetòns, scarpes bulonades, parestincs, paregenoi e maneces di corean pal puartîr, balon di corean cu' le cjamare d'arie di pompâ (e di podê sblecâ, s'al ocoreve). 'E cumbinarin ancje di vê afìt un prât tai Comunai, dongje de Gravate, dulà che forin fates les puartes cu' les stangjes tajades di scuindòn tes cises.

Finalmentri un campionât di scombati, di patî come chei che nus faseve vivi Niccolò Carosio cui soi "quasi gol", di interpretâ imitant i campions des fígurines...

Le prime partide, a Damâr, dopo passe 20 chilometros di biciclete cu l'aiar cuintri, 'e fò une disfate: vot a un... Ma no mancjarin les sodisfasions, come cuintri el Glemone: vitorie in cjase e fûr. E soredut come cuintri l’Osôf, te ultime di campionât. L'Osôf al veve bisugne di vinci le partide par podê passâ di categorìe e i soi giuadors, cence ch'al sintiss l’arbitro, lu vevin fat capî clâr. Ma i Tombins 'e erin orgogliôs e onesç: 'e giuavin par vinci! A un cert pont l'arbitro al sivile un rígôr pai Osovans... Ma el puartîr dal Tombe lu pare!