No ducj i paîs e an le pussibilitât di vê un gjornâl come Buje Pore Nuje! indulà podê contâ piçules e grandes stories de sô int. Nus è vignût intal cjâf di continuâ su cheste riviste a fevelâ des persones di Buje che si son fates strade vie pal mont cuant che, l'estât passât, nus è vignût in man il disen in blanc e neri che culì al ven publicât: un orgul che al strenç tes sôs sgrifes il mont intîr, cui personagjos che si dan da fâ par mandâlu indenant (o indaûr).

Une opare datade, come che si dîs, ven a stai riferibil a un periodo storic, ae fin dai agns sessante. Le à pensade Calligaro Beppino, Bepin de Marcote, fî di Perin e di Mariute, che son a stâ a Cjà Martin su pe rive di Mont, inte sô prime zoventût cuant che al scometeve, cuintri les idèes di ducj, che le sô strade e sarès stade chê dal disegnâ par vivi, par contâ, par realizâsi creantsi un lavôr dibessôl, cul so inzen...

Bepin al è nassût a Buje intal 1950 e a cinc agns al è lât cui soi a Winnenden, indulà che pari e mari e lavoravin intune grande fornâs (passe cinc cent operaios) inmò dal '38, (che si son cognossûts propite sul pravilegjo): pari prenar e mari coghe. Si tratave de prime ondade di stranîrs che rivave a vore dopo le vuere. Cressût su le fornâs, al à studiât di eletromecanic, par vê un mistîr sigûr - come che volevin chei di cjase -. Intal sanc al veve le passion dal disen: apene che al à podût al à fat un cors di disen par corispon-dense: lavorâ di dì (i' fasevi chel biel mistîr - al conte riduçant) e disegnâ vie pe gnot, imparant les tecniches di fonde.

Le scuele privade e jè durade tre agns e subit dopo, apene che i vevin ufierte le pussibilitât di deventâ istrutôr pai students che volevin fâ i eletromecanics, al à molât dut par jentrâ intune agenzie di publicitât. Le à tacade cussì, le sô cariere di ilustradôr, vignetist, rivant a fâsi une strade come pôcs altris, se il gjornâl todesc Stern, inte edizion pai cinquante agns (1948-1998/Jubiläumsausgabe) lu à metût cui miôrs fotografos e vignetiscj te rubriche Denk ich an Deutschland... Calligaro/Geboren in Udine, Wohnt in Stuttgart. Si è metût dibessôl, come
che si dîs, dal 76, e nondi è voludes tantes par fâsi cognossi des grandes agenzies pe sô capacitât di lavorâ dai "cartoons" (caricatures, fumuts, disens realistics come di interpretazion de realtât, vignetes, satire di costum o pulitiche, e v. i.) ai calendaris, ai grancj manifescj publicitaris (come le dia luminose di 4 metros par 5 esponude, dilunc cinc agns, difûr de stazion dai trenos di Stocarde pal reclam di une marcje di motosèes).
Il computer lu à, ben si sa, ma lu dopri dome par scrivi les fatures: lui al disegne dut a man, come che al è te tradizion dai ilustradôrs di cualitât. Andi à fate di strade, di cuant che al partive a pît dal pravilegjo e al cjaminave par miezore, senò di plui, par lâ a scuele, dulà che al vignive tratât di forest, di stranîr e al sintive su le sô piel il pês de emargjinazion (che e jè deventade inmò plui pesante dopo, sul lavôr, posto che il livel socio-culturâl dai operaios todescs al jere chel che al jere). Les stesses peraules par lui, furlan in Gjermanie, di chês che in dì di vuê tancj furlans e disin culì ai forests: Ce vetu cà tu, che culì i sin parons nô; parcè âtu di cjapâ il puest di lavôr che al è nestri...

Par rivâ dulà che al è rivât, cul so studi a Stocarde, al à simpri cirût di nudrî e di mantignî vivaroses les sôs dotes naturâls cul tignîsi informât sul vivi dal mont di jar e di vuê, leint tant, di dut, costruinsi - te tradizion dai autodidats di vecjo stamp - chei struments culturâi che i permetin di frontâ cence pore il fuei blanc par dâ le sô interpretazion dai fats. (Naturalmentri dut dome in muc).
Si sin domandâts se al à ancjimò sens fevelâ de genìalìtà bujese. Nus pâr propite di sì, viodint chest personagjo.

Ma i pensìn che al sarès biel che ancje - soredut - a Buje e vignìs nudride, no lassade al câs o al bandon. Nus plâs pensâ di viodi nassi un'altre Accademia degli Accesi, indulà che le mularìe e podès cjatâsi par cressi, par imparâ diretamentri des mans e des vôs dai artiscj di Buje vecjes e gnoves modalitâts di espression, dutun cul cori e cul sgambio di idèes, di mûts di pensâ e di viodi: une farie indulà che il mestri al puedi dâ ce che al à cjapât sù de vite e dal mistîr a di chei che le an tal sanc di continuâ a dâsi da fâ, a fâ e a cirî di imparâ, intal segno de tradizion de inzegnositât de int di Buje. Intun puest dal gjenar Calligaro Giuseppe (o Bepin de Marcote, come che si ûl), al podarès fâ cognossi il so mût di lavorâ cuant che al torne a cjase, lì dai soi, chês tre cuatri voltes al an; come lui tancj altris di lôr, che i sin sigûrs che andi è inmò atôr pal mont.