Quant che l'Aministrazion comunâl mi à invidât a proponi qualchi idee par meti su la Place di San Scjefin un monument 'o ài subit dite di sì, parceche 'o soi convint che un monument ben fat in chel luc al pò deventâ un aveniment impuartant pe comunitât, no nome sot il profîl artistic e urbanistic, ma soredut sot l'aspiet morâl.

La civiltât di un popul no si judiche nome misurant la sô incressite economiche, ma prin di dut calcolant la qualitât dai soi sintimenz, dai soi valôrs, dai ideai ch'e fòndin lis solidarietâz plui profondis di chel grop uman, tigninlu culturalmentri unît. Civiltât al è un stâ insieme no nome par interes, ma par passion dal omp, de sô dignitât e de sô libertât, dal so ingen e de sô vocazion, parsore di ogni ideologje e di ogni interes personâl; une passion ch'e parturìs stime e rispiet l'un da l'altri, ch'al è il siment di ogni convivence sociâl.

Un di chesc' sintimenz al è chel de memorie e de ricognossince par dutis chês personis che tal passât 'e an sfadiât par formâ, tirâ su, nobilitâ, insiorâ e difindi la comunitât, simpri animadis di un ideâl sincêr di servizi pal ben di duc'. E al è ben che chest sintiment di ricognossince al vegni pandût in public, cun segnos esternos che duc' 'e puèndin viodi e ch'e jùdin a tignî vive la memorie coletive tal passâ dal timp.

Il fín di un monument al è propit chel: un segnâl visibil par tignî vive la memorie e il sintiment de ricognossince par chei che si son sacrificâz pal ben di duc'! Cui sono chei? Par furtune ogni comunitât storiche ind'à tanc'. Chei ch'e son muarz in uere sacrifícant la lôr vite pe patrie siguramentri, ma ancje chei ch'e son muarz vie pal mont su lis stradis maris de emigrazion, chei ch'e son muarz sul lavôr, e ancje chei che no son muarz ma ch'e àn spindude la lôr vite pal ben di chei altris (aministradors, mestris, miedis, predis, lavoradors, paris e maris di famee... ), in pâs e in uere, su duc' i fronz, par un ideâl di umanitât, magari sbaliât, ma personalmentri sincêr e disinteressât. A duc' chei ch'e àn lavorât par costruî l'identitât culturâl di une comunitât al è just che la comunitât stesse ur disi grazie comunitariamentri!

Par chest si à di fâ i monumenz.

Un monument cussì, alore, nol pò sei ni retoric, parceche al à di esprimi sintimenz vêrs, ni militarist, parceche al esalte cui ch'al à lavorât pe pâs, ni segno di division, parceche nol è un monument ai "vincidôrs", a chei di une part sole, ma a duc' chei ch'e an crodût in un ideâl.

Quant che il Sindic al va a puartâ une corone devant di chel monument al à di esprimi i sintimenz di duc', al à di sei la vôs di dute la comunitât.

Par chel 'o ai proponude une scrite di meti sul basament ch'e dîs tun latin facil, ch'al pò sei capît di duc': FRATRIBUS - PRO PATRIA - VITA FUNCTIS. Ven a stâj: A DUC' I FRADIS: par dî che cussì Buje 'e ricuarde duc' i bujês esemplars dal passât, leâz ae int di uê cun strenz vincui di sanc; - CHE PE PATRIE: ven a stâj Buje, il Friûl, l'Italie, l'Europe, il teritori insome là ch'e àn vivût gjenerazions e gjenerazions di "paris"; - 'E AN SPINDUDE LA LÔR VITE: ven a stâj no nome murint ma ancje vivint in maniere esemplâr par creâ formis di convivence sociâl plui umane. Par chest l'opare 'e podares sei clamade un "monument ae anime di Buje", incarnade tai omps plui esemplârs de sô storie.

A chesc' criteris si è ispirât l'artist Lucian Ceschia tal creâ la figure simboliche pal monument di colocâ su la Place di San Scjefin, lì de fontane, propit di front ae fazzade dal domo. No covente dî che se Ceschia (che purtrop l'an passât nus è mancjât) al è stât un dai plui granc' scultors che il Friûl al vedi vût tal nestri timp, lui al jere ancje un artist umil e disponibil, pront a scoltâ e capî i desideris dal comitent. Cussì dopo ch'al à vude l'incariche, si è impegnât a fons, metinsi in plene sintonie cu lis domandis ch'j vignivin fatis di Buje. In cheste maniere 'e je saltade fûr chê figure ch'o cirarai cumò di descrivi.

La figure rapresentade 'e je unevore semplice e comprensibil. Si viôt une persone butade par cjere, scunide, feride a muart, vinte di un podê violent e disuman, ma che cun tune fuarce sovrumane 'e tente ancjmò di jevâ su, alzant i soi braz e la sô muse viers il cîl, dulà che i soi voi 'e viodin 'za alc di luminôs e di definitîf, alc ch'j dà il sens ultin de sô muart.

Il significât simbolic al è evident. La persone butade par cjere 'e rapresente il sacrifici, la soference, la muart, il faliment, la sconfite de pizzule esistence di un omp che si sacrifiche par chei altris. La tension viers il cîl, i braz alzâz, i voi ch'e cjalin adalt, 'e rapresentin invezit la passion pal ideâl che nol mûr, la fede tune realtât che no finis cu la fin di un omp, la sigurece tun futûr di justizie e di pâs, la libertât dal spirt che nissune pereson 'e pò incjadenâ.

Chest simbolisim al è ribatût ancje dal fuart basament ch'al ten su la statue, fat di doi nûz lastrons di piere metûz in crôs, ch'e ricuardin sedi la sacralitât de muart e dal sacrifici pal prossim, sedi la vitorie finâl dal ben su ogni forme di mâl; la crôs cristiane 'e je di fat, simbul de vitorie di Crist su la muart.

Tal comples de produzion artistiche di Ceschia l'opare, creade pôc prime di murî, 'e rapresente un pont di madurazion e di sintesi di dute la poetiche dal artist vulcanic e insodisfat, e pur cjariât di un umanism arcaic e sclet. Stilisticamentri il "colât" dal monument di Buje al torne aes sculturis dai ains '60 che "si situano tra le migliori del nostro artista", come ch'al à scrit Amedeo Giacomini. La figure umane ridote ae sô esenzialitât 'e ven come crevade fra une part basse, dramatiche e disarticolade, e une part alte, fìnalmentri calme e raserenade, tun misteriôs brazzacuel cul cîl.

La plastiche a dut taront si anime di gnovis sugjestions quant che si cjalile di un pont di viste diferent rent esaltant a l'infinît l'antitesi fra l'ingredei des forrnis bassis e la cuiete ch'e plôf dal alt. In plui cheste figure gigantesche 'e realize une grande tension congjeniâl a dute l'opare artistiche dal Ceschia, la munumentalitât. Justamentri Umbro Apollonio di lui al scrîf: "Da tempo si celava nel suo animo un incitamento al monumentale, non inteso, sia chiaro, nel senso che produsse tante e mai tante opere fornite solo di magniloquenza altisonante.

No, Ceschia aveva bisogno non solo di occupare spazi, ma anche di suscitarne nuovi, a bella posta articolati in modo non normale perché direttamente corrispondenti al corpo plastico e ad esso adeguati... Questo incitamento al monumentale altro non era che il desiderio di porre l'opera a disposizione del maggior numero di persone possibile... La scultura poteva così vantare come nei suoi tempi antichi una destinazione pubblica... poteva colloquiare con lo spazio umano circostante".

Par chest 'o soi convint che il "munument ae anime di Buje" colocât su la Place di San Scjefìn nol vegni nome a insiorâ la place e il paîs di une gnove opare d'art origjnâl e impuartante, ma ch'al puedi rapresentâ soredut un pont di riferiment ideâl par dute la comunitât.