Giovanni Brondani (1878-1954), maridât cun Maria Aita, fornasîr a Geisolhöring in Baviere. In cheste fornâs al nas Franco, tal 1911, muart tal 1980 e soterât a Carrieres sur Seine. Franco al rive a Carrieres sur Seine tal 1922 e si maride tal 1940 cun Anute Tessaro Bolzon, che jere nassude a Ursinins Piçul tal 1913 e vignude a Parigj a servî...

Di cheste copie BrondanBolzon al nas, simpri a Carrieres sur Seine, tal 1944, Jean Claude Brondani, el nestri "Docteur Rhumatologue", specialist di Midisine sportive, medae di bronç tal "Judo Pesi massimi" a Monico tal 1972. Periodo spaventôs. I Palestinês e vevin secuestrât i Israelians e ogni tant an di copavin un. "A nô - al conte Jean Claude - no nus contavin nuje, o vin savût el fat comprant el gjornâl. " Al è stât par 29 ains dirigjent te scuadre nazionâl di Judo, vice President de Federazion, miedi de scuadre nazionâl e ancje selezionadôr. "Al è stât gno pari che mi à fat su" al dîs cun braure.

Franco, operari in edilizie, brâf pugjlist, brâf di biciclete, al molà adore el mistîr, cuant che a Carrieres j an domandât (une societât sportive) di deventâ professôr di boxe. Lì al tacà le scuele di massagjo. Al deventà ae svelte massagjadôr diplomât e diplomât ancje in "educazion sportive".

In chei ains al jere facil diplomâsi. Invessit in zornade di vuê...

Intant si faseve sù, come ducj i furlans, le benedete cjasute, a timp pierdût. E cussì, a sun di sacrificis, al à podût, lui e le sô Anute, fâ studiâ Jean Claude!

Jean Claude, restât unevore sempliç, mi conte des fornâs dulintôr di Parigj che di frut al visitave, de fieste, par cjatâ le parentât: fornasîrs bujaz.

Di Ursinins si vise de gleseute di Sant Osèf, di une ostarie dongje e di cusîns. Al varès gust di imparâ el furlan. Il sotscrit j darà une man...