In chel atom in Cjargna i Cosacs a fasevin di parons. E cussì a cjasa mê!

Piotr, so pari, Alexander a erin comparîts una dì coma fantasmas tal gno curtîf e a si erin fermâts dut l’inviêr.

In cusina a vevin pojât i paions par tiera, il fiasc dongja par bevi un cluc spes e volantîr e alì a fasevin fûc dì e gnot. A fasevin tant di chel fûc che par un pêl no si è brusada la cjasa; mê nona, una sera, lant a meti “la muinia” in tal jet, a si è nacuarta che i trâfs inta cjamara a erin za inluminâts das flamas. I oms (gno pari, gno barba, gno fradi) a erin ducj sparîts e jo no rivavi a capî dulà; si lu domandavi a mê mari jei a si faseva seria e a mi diseva di tasei.

Tal gno curtîf grant e plen di lobias i Cosacs a vevin peât i cjavai e Alexander, ogni sera, cul seglot da l’aga al lava a beverâju. Sentada di fûr, su la bancja, tal braç di mê nona, i cjalavi curiosa.

Alexander al era un zovin scjaldinous, al barufava cun ducj, guai a contradîlu!

Una sera che mê mari a jentrava dal porton cu la sêla da l’aga (chê gnova ch’a la tigniva coma un deit madûr) lui, par dispiet, cun tuna mitraiada a tradiment ai l’a duta sbusada: l’aga a vigniva fûr coma da un coladôr! A mê mari a jerin vignudas jù las agrimas, ma no a podût dî nuja.

Ogni tant i lavi cun jei intun prât in fons dal paîs a cjoli fuea di stierni e alora i mi fermavi alì di Dina, una fruta da mê etât. A cjasa sô al era un cosacùt di cualchi an plui grant ch’al vigniva a zujâ: al era un biel frut, cui cjavei clârs, slanciât. I corevin intal prât dulà ch’al era un cuargnulâr, plen coma un scus di cuargnui, ch’a nus plasevin di mats. A vevin un savôr garb e a parâju jù a ti leavin la bocja; ma in chei agns di miseria dut al era bon par cuietâ la fan. Encja al cosacùt ai plasevin, parceche an parava jù a ciafas.

Una volta al veva puartât ta sacheta una spila, una vêr biela: a era una mora (di morâr) cu las perlinas al puest dai grignei e cu las fueutas verdas.

Ce maravea!

Il cosacùt a nus a fat capî ch’a la vares regalada a una di nou, ch’a sares stada la sô murôsa. I speravi tant ch’a mi scielgès (par vei la spila) ma lui ai l’a dada a Dina. A è stada, di sigûr, par me la prima delusion e j crodi ch’a mi vebi marcât. I mi soi sintuda refudada e chest intal gno jessi (infantîl) a era una rouba ch’i no vevi incjmò imparât ad acetâ.

Inta cusina da nostra vissina di cjasa, Livia, i Cosacs a cueèvin intal saìn dut il dì fritulas; a erin como “las piadinas” sutilas e largjas, cu la marmelada tal mieç. Cuant ch’i no vulevi mangjâ la mignestra, j cjatavi simpri cualchi cosac ch’a mi slungjava un toc di fritula: ce buina!

Mê mari a diseva ch’a erin ducj pouc di bon e a tocjava soportâju como un cjastîc di Diu; di lôr a veva una paura mata.

Dispes a si necuargeva che a lavin sul taulât, di gnot, a portâ via il fen e jei a scugniva gloti, cença lamentâsi. «Se no vevin pi fen pa la vacja, cemût podevino passâ l’inviêr?» a diseva duta avilida. A l’era il problema da soravivença, una lota dì par dì...

M’impensi ch’a mi veva mandât a cjoli il pan cul bolìn da tessera e jo, pa strada, zujant i lu vevi pierdût, a mi era golât dentri il tombìn: a cjasa in d’ai cjapadats di vueli sant!

Una buinora mê mari a mi veva sveât di colp; a tocjava lâ a platâsi pal fat ch’a passavin i Todescs cui cjars armâts, a lavin a brusâ Fors di Sot. I sin ladas jù in cantina, mê nona a tigniva sù Rosari e chês atras feminas ai rispuindevin. Par furtuna nou fruts no capivin, lafè no, la gravitât dal moment e i continuavin a zujâ, coma simpri.

Un dopomisdì da vierta, cul soreli ch’al inceava, ducj i fruts dal paîs, in fila, cu las bandierinas in man i spietavin su las “Tarabanas” i soldats ingleis-americans. A rivavin da banda di Caprizi sui cjars armâts, besteons grancj como una mont. I soldats a nus butavin bombons, cjocolatas e nou a gara a cjapâju al volo. Ce fiesta! Las feminas a saludavin sventulinant il fassolet tra i «Hurrà!» dai presints. Plui tart, cuant che a scuela i ai studiât la Storia, a mi pâr di vei vivût chel timp como una flaba.

Cualchi volta a mi ven intal cjâf il cosacùt: ce fin al voraia fat cun duta la sô famea?

A disin che tancj Cosacs, pitost che jessi fats prisonîrs, an vût miôr scielgi la muart e, passât il cunfin da l’Austria, a si son butâts jù inta Drava!

Chesta a è stada la fin di tancj di lôr; sarai stada cussì encja par chel frut plen di vita e sfurtunât?