Dulà saràal vuè chel frutìn de muse tarondute e ridint? Si visaràal, s'al lei ce ch'j scrif, di chel lontàn 1946? Alore, dopo les ultimes burascjes de vuere, si veve tornât a tigni d'istât la "Colonia elioterapica" tes Scueles di San Scjefin, pe' canae pui poarine. Un po' di soreli, un po' di gjnastiche, ma soredut un bon plat di mignestre. Jo j eri apene laureade e j fasevi di diretrice. A mi sdì, su lungjes taules, al jere pront di mangjâ. Jo, insomp dal salòn-refetori, ur fasevi dî une prejere e dopo duc' si butavin sul plat. Tal ultin, a un segnâl, si jevavin sù e s'inviavin a dùrmi tes brandutes. Al jere chel el moment che mi sintivi tirâ pa l'ôr de cotule: al jere un frutìn, simpri chel... - Ho fame anche... - al sgnaulave. E tocjave dâj le prionte!

Une dì (ce spavent!), 'e vevin apene tacât a mangjâ ris tal brût che, un a la volte, si voltavin e - cun rispièt - 'e tornavin-fûr robe rosse rosse. Ce saràal? Sanc? Une maestre si met a vai e 'e conte che à puartade le sô scuadre a spas tal bosc. 'E vevin mangjât saût! Alore j vin spesseât a metiur i dés jù pal cuèl e a fâur tornâ fûr ancje l'anime. Cussì, prime immò ch'al rivàs el miedi Budinis (vignût come interìn, dal ospedâl dai maz), dut al jere finit in glorie.

Manco mâl: ché lui al deve laudano par ogni sorte di mâl, pìzzul o grant ch'al fos. A la fin, chestes 'e son scuasit robes di ridi a front di ce che si veve passât fin a'e ultime dì di vuere. Propit in ché dì i Todescs a Vile nus vevin tignûz in ostagjo, su le place, sot de ploe, fin ch'e àn cjatât i cjavai robâz ai Cosàcs. Si, ancje jo e gno pari j erin stâs cjapâz dentri. E dut parceche i fruz de nestre "scuelute di vuere"'e jerin scjampâz spaventâz a viodi un uficiâl todesc cu le pistole puntade. Jo e mé mari, in chel ultin an di vuere, posto che les scueles 'e funsionavin si e no, j fasevin une seconde medie e j vevin par studenz Maria Polizzi, Lietta Guerra, Giuliana Caramaschi, Gilda Barnaba (poare frute, finide cussì mâl...), Enzo Forte, William Nicoloso, Armando Miani. J vevin propit furnît une stanseute par fâ scuele, ma mé mari dispes 'e preferive fâ lessiòn tal bosc, par sei dongje dal rifugjo tal câs che l'ucelàt al tornàs a molâ jù bombes. Che ànsit 'e veve cjolt in afit une cjamare lì dai Tonéi pes gnos di lune, buines par "Pippo". Ma jo j vevi pui pore des suris, ch'e corevin di un sac a chel atri, te cjamare che jere ancje le "dispense" di ché famèe.