(...) Prin di rivâ ad Arromanches, piçule fete dai 80 Km di cueste indulà che il 6 di jugn dal 1944 a son sbarcjâts i alleâts, o tachi a pensâ a ce che o sai di chest fondamentâl moment de storie de II vuere mondiâl. Mi vegnin dibot tal cjâf, lis tantis imagjinis dai soldâts che daûr dai cararmatos e saltavin fûr de aghe... Chei che a son rivâts a fâlu.... Mi speti duncje di cjatâ in ricuart ciment, lapidis, crôs, tabelis...e invezit, denant dai miei voi, par cumò, di ca e di là de strade, dome un mâr di cjamps di lin, un mâr verdulin cun parsore vie il celestin de rosute di cheste plante. Cjamps dolçs che a trimulin cuiets, sclarîts dal soreli. Par chilometris e chilometris, chest mâr cuiet al lambìs la strade. E pensâ che si cjatìn za te zone cjalde dal sbarco, indulà che a son muarts 100.000 soldâts (40 alleâts-60.000 todescs), e culì cumò al è dut calm, net, cuiet, cuasit che la nature e ves volût autopurificâsi. Parâ vie lis maglis, lavâ il sanc, suiâ lis lagrimis, cjapâ sù lis pucis di brusât di cuarps e di robis, scjafoiâ i rumôrs, i colps di mortârs, lis rafichis des metrais, lis vaidis, i berghei, i ciulaments... Ma no i'nd' è sanc achì. Nancje un got. No si lu cjate nancje tal Musée du Debarquement, forsit il plui impuartant che al mostri in vie gjenerâl ce che al è sucedût propit in chês zornadis dal mês di jugn dal '44. Altris 28 museus tematics sparniçâts dilunc de cueste de Normandie, in France, a jentrin pl·ui tal specific dai diferents aspiets di cheste operazion militâr. Lant intant indenant tai salons des esposizions si jentre tal cûr de progjetazion di cheste machine di vuere: la costruzion di puints artificiai che a àn permetût lis operazions di sbarco ver e propi. Plastics grandissins, videos documentaris, tocs recuperâts, nus judin a rindisi cont de complessitât dai elements in zûc in chê volte. Podopo però, cuant che si lasse in bande il fascino de sfide tecnologjiche e si tache a cjalâ di dongje, dal veri des bachechis lis mudis dopradis dai palombaros, paracadutiscj, aviators, fatis cul material plui "tecnic" che al jere tal '44, si rindisi cont di trops soldâts che, cun intor chês "uniformis" a son lâts incuintri ae muart. E di fat, dopo vê bevût un cafè denant a di "chel mâr", cu la sensazion di vê fat alc che nol leve, o lin a Colleville sur Mer, un dai 27 cimiteris militârs di cheste zone de Normandie. Al è un dai doi cimiteris americans. 9386 sepolturis, 1557 scritis di "dispersi". Puedial jessi biel un cimiteri? Al pues cjatâsi denant de spiaggia Omaha, intune bielissime baie (jerie cussì ancje tal '44?) al pues slargjâsi su 70 etaros, la plui part a prât verdissim e ben tignût, al po zovâsi di ombrenis e frescuris dongje dal mâr, al pues vê tantis crôs dutis blancjis, 9386, tant piçulis, che a somein frutins dal asilo, o "acuilons" poiâts par tiere in spiete di svuelâ vie. Al pues tignî cont des diferencis: i soldâts ebreus a àn la lôr stele tal puest de crôs; al pues vê un segno, tancj segnos, rosis frescjis poiades tai pîts: a testimoniance che cualchidun, 64 agns dopo, al à svuelât parsore dal Oceano par vignî fin culì. Al pues, ma al baste, sbassâ un pêl il cjâf, e tacâ a lei i nons. Fâ un pas e leint altris, e cussì par oris e oris: alore, in chel moment, lis gjambis si fasin pesantis, si visisi di colp che si sta cjaminant sul futur a vignî che Richard, Thomas, Ben, Jhon, Paul, Jack, Joshua, Richard, Dean, Nicolas, Steve, Peter.... no àn mai vût... Come che no lu àn vût, "KNOWN ONLY TO GOD", i soldâts cognossûts dome a Diu, come che no lu àn vût i 1557 militârs muarts, cence cuarp ni cjatât ni ricognossût, ma cul non scrit parsore dai murs a semicercli di chest cimiteri.

Un dai 27 cimiteris. Cimiteris, inglês, francês, polacs, canadês, todescs. Intun cimiteri todesc, une vore dongje a un puest tant turistic, Le Mont Saint Michel, a Huisnes sur Mer, 11.956 colomberis, chi no son dome i nons dai soldâts e i lor rescj, ma ancje lis datis.

0 cir di meti a fûc ce che o viôt. 0 lei nons, cognoms, datis di nassite e di muart, o calcoli, facil fâlu par centenârs di noms. La difarence tra lis dôs datis dispès no je stade plui grande dal n. 20. Anzit, in chel toc di cimiteri che mi soi fermade di plui la difarence e jere di 16,17,18.

Di fat mi soi visade che ae fin de vuere a vegnivin reclutâts ancje chei plui zovins. Par chei che nol è stât pussibil savê cui che a jerin, la scrite e je "EIN DEUTSCHER SOLDAT". Diferente la nazion di origjine, diferent ancje il mût di ricuardâju. No rosis frescjis ma coronutis di rosis secjis tipichis dai lôr paîs. Scritis su nastris verts scûr, e une poesie batude a computer, imbuluçade sù e peade intor di une colombere di un soldât cence non, cu la firme di une visitatrice inglese dedicade a ducj chei che a son muarts. Di un front o di chel altri. DI FRONT UN A DI CHEL ALTRI. Saltìn fûr, saltìn fûr di corse. Prin però, si nacuarzm che tal atrio de jentrade a son trê panei, cun parsore trê musis di zovins soldâts, un inglês, un todesc, un francês; sot tre storiis, la lor curte biografie, il non dal paîs indulà che a jerin a stâ; cuasit compagnis lis datis di nassite, lis sperancis o lis poris: compagne la date de muart.

Mi rive intor come une ondade di aghe frede la consapevolece che chestis storiis dome in chest puest a puedin jessi moltiplicadis par cuasit 12.000 voltis. E in Normandie a son altris 25 cimiteris che no ai inmò viodût e che no rivarai a viodi. Intant che o salti fûr, cuasit a cjapâ flât, mi domandi e i domandi cjalant viers il mâr: cemût puedial l'om, dopo dut chest, continuâ a fâ fûc sot de intolerance, de discriminazion, de mancjance di rispiet dai dirits di ducj i oms, grancj e piçui, cemût puedial dopo dut chest?(...) Chestis notis di viaç no tegnin cont di logjichis economichis ni di strategjie militâr. Ma dal sigûr nancje chei che a son muarts, sparâts a altece di om, no àn vût la pussibilitât ni il timp di fâlu. Ad altece di om si pues ancje come culi in Normandie, costruî trois di pâs pe convivence: int di dut il mont a tignî vierts i museus e zovins di dutis lis bandis de Europe a tignî in ordin i cimiteris:

ARBEIT FUR DEN FRIEDEN, WORK FOR PEACE, TRAVAIL POUR LA PAIX, WORK DOOR DE VREDE, LAVORÂ PE PÂS, LAVORARE PER LA PACE.

Dal diari di viaç di Nadia Rottaro Fotos di Stefano Santi

Par savênt di plui