"… Preferirono perdere la loro autonomia, l'indipendenza, ormai ridotta a puro nome, ed aggregaronsi quasi spontanei ad un forte Stato italiano" (Ciconi).

Eco in ce maniere meschine che, seont cierz storics di une volte, i Furlans dal Quatricent si saressin sometûz ae Republiche di Vignesie. Nuje di plui fals!

Di reazions, ancje fuartis, cuintri l'invadence de Serenissime a'ndi jerin stadis un pôc par dut, sei prime, che intant, che ancje dopo de conquiste veneziane dal Friûl.

Un esempli contrari di ce ch' àn vût contât cierz studiôs di storie patrie, nus al ricuarde, duncje, la ricorence, che 'e varès di colâ chest an ch'al ven, dal 580ⁿ inovâl de disperade resistence dal ciscjel di Artigne cuintri l'assalt dai soldâz venezians e de sô tremende distruzion, che 'e à segnât la finâl disastrose di une spedizion militâr inmaneade di Glemone e dai siei leâz di Buje, Artigne e Montenars.

In chei ains i partesans de Serenissime dal ciscjel di Seorgnan, la lôr cove a plomp su la Tôr, si diramavin pes compagnis parsore Udin, robant, copant, brusant e cirint di fâ plui dam pussibil ae vissine capitâl dal Friûl che, assalide di ogni bande dai eserciz venezians, 'e restave pûr simpri salde te sô sclete contrarietât ae Republiche di S. Marc. Duncje, tra la fin dal 1412 e i prins dal 1413 atôr des culins ch'e coronin Tarcint, al jere dut un grant messedâsi di int a pît e a cjaval: compagniis di Glemonaz cun trops di armâz rivaz a pueste di Buje, di Artigne e di Montenars, a' jerin daûr a dasi dongje par plombâ, duc' insieme, sui squadrons nemîs, menâz, forsit, di chei stes Joachin des Cassinis e Varneri di Dartigne che a' comandavin il presidi dal ciscjel di Seorgnan.

In chê volte, in sumis, il Friûl al jere, si po dî, in bâlie di potencis forestis che a' saboravin barufis e svindics par dividi ancjemò di plui i Furlans e riduziju, cussì, in chel stât di eterne vuere civîl che, scancelant il credit e il podê di comant dal lôr Princip e dal lôr Parlament, ju varès obleâz, o prin o dopo, a rindisi denant de prime butade di invasôrs, pierdint, tal ultin, ancje chel fregul di indipendence che a' vevin simpri vût sot dai Patriarcjs di Aquilee.

Purtrop, bisugne ancje dî che a chei beâz dai nestris vons, simpri in tune barufe, no ur pareve vere di cjatâ, cun tante facilitât, dai "sponsor" foresc' pronz a furnîju di bêz e di armis pûr che a' continuassin a sbudielâsi fra di lôr, cence disturba lis lôr manovris di conquiste.

Tal 1420, di fat, il Friûl, sbrindielat in mîl partîz in pro o cuintri di chel o di chel altri sorestant forest, al scugnarâ rindisi ae fuarce dai eserciz venezians e scomenzâ di chê volte la sô lungje storie di sudizion. Se une buine part de colpe dal disfasiment dal antic Stât furlan 'e va metude in cont al turbolent sioram di chenti, no si à di smenteâ, però i meriz di gran part dai Comuns furlans, ch'e àn reagît cun fuarce ae invasion veneziane, inmaneant une braurose e disperade resistence, e si varès di onorâ la memorie di chei nestris vons lontans che, secui e secui indaûr, si son batûz pe libertât de lôr tiere.

Il dram furlan si veve, duncje, riprodusût su lis culins di Tarcint tal 1413 quant che i oms di quatri localitâz de Alte, diferentis par impuartance politiche e par interes economics, ma unidis di un stes spirt di fedeltât viers i legjtims sorestanz dal Friûl di ché volte, l'Imperadôr gjermanic e il Patriarcje di Aquilee, si jerin metûz cuintri une sdrume di soldadaz de Serenissime menaz di Pandolfo Malatesta, il trement cjapitani romagnûl mandât in Furlanîe de Republiche di S. Marc par judâ i siei partesans.

Cussì, dopo un prin violent combatiment, assalîz di ogni bande i colegâz de Alte 'e àn scugnût scjampâ vie de bande di Artigne, seguîz a rovede dai nemîs, che ur corevin daûr cence lassâju tirâ flât. E propit ad Artigne al è stât recitât l'ultin at di chê sfurtunade spedizion.

I squadrons scjampâz di Tarcint si jerin seriâz, cu la int dal puest, tal ciscjel di S. Martin, e là si jerin prontâz pe ultime resistence. In pôc timp, però, i Venezians ur àn cjapade ancje chê difese e, par ordin dal stes Malatesta, 'e àn disfat il ciscjel di plante fûr, volint, cussì, umiliâ chei che a' vevin olsât a faur cuintri. Si capis che, tal quadri de storie politiche dal Friûl, chesc' faz no àn vût nissun pês, soredut se si è usâz a tignî in cont dome dai "granc'" avignimenz che a' decidin dal destin dai stâz e des nazions.

Ma te memorie storiche di un popul come chel furlan, eco che cierz faz a' cuistin un valôr e une funzion ben precîs: prin di dut, parceche a' rapresentin dai esemplis nancje tant rârs di reazion cuintri di chei ch'e àn vût talpassât la sô tiere, e in secon luc parceche chesc' esemplis antîcs a' varessin di sburtâ la int di cumò a puartâ indenant lis sôs batais sacrosantis. Cence ricori, ben s'intint, ae violence e ai copamenz. Se no, i 580 agn che nus separin di chei teribii momenz de nestre storie passade a' saressin passâz dibant!

Note bibliografiche:

G. BALDISSERA, Artegna antico castello, comune e pieve del Friuli, Udine 1901.