Di France, cui soldâz di Luîs d'Angjò, al ere vignût ancje un sior che al veve vût di premi pal so servissi la localitât di Cjapestran, cjscjel no lontan de sitât di Aquile. A chel sior il 24 di jugn dal 1385, o ben 1386, j nassé un frut che al fo clamât 'Zuan. Di grant, il pari al mandà 'Zuan a studiâ dirit te universitât di Perugje. In chê sitât 'Zuan si fasé une inomine di jurist grandonône, tant che Ladislau d'AngjòDuraz, re di Napoli (1377-1444), lu nomenà governador de sitât.

Dopo la muart di Ladislau, ch'al bramave di cjapâ dute l'Italie, tune des solitis scaramucis cui Malatestis, 'Zuan al fo piât (1416) e tignût cualchi mês in preson a pan e aghe. Alore al nestri 'Zuan, ch'al ere un ghibelin ma galantomp, intant ch'al 'Zunave, j ven dal Cil une spirazion e cussì al stabilis di fâsi frari.

Apene molât di preson, al jentre tun convent di francescans. Al va a scuele di Bernardin di Siene; al devente so grant amî e cun lui al stroleghe di metiadun in perfete concuardie i francescans, midiant lis "Costituzions Martinianis" che lui al proponeve e che a' tignivin la strade di miez tra conventuai e osservanz. Tal 1425 al ven ordenât predi e tal an dopo nomenât incuisidor cuintri "Giudei e Fraticelli".

Parie cu la dutrine che al predicjave cuintri i eretics, fra' 'Zuan si preocupave e si messedave ancje pe difese de Cristianitât cuintri i Turcs. Parchel, sicu predicjador cuintri i Ussiz e sicu imbassador dal pape, al à girât miege Europe (Baviere - Austrie - Boemie - Ongjarie), saldant la fede catoliche e inviulant la crosade cuintri i Turcs. Al ere dal 1444 che 'Zuan Hunyadi si scuintrave cence soste cun chei de Miegelune, parceche lor a' vevin in ment di distrugi il Cristinanesin, físcant lis localitâz d'Europe plui saldis e di prestili, e lui al bramave di parâjuindaur fintremai dilà dal Mar Neri.

L'ultine grande imprese sô 'e fo la batae cuintri Maomet II che al tignive cenglade la fuartece di Belgrât par "mar e par tiere" e al faseve ogn'altre dì imburidis par cjapâle. Dal jugn dal 1456 l'Hunyadi al ere regent di Ongjarie e alore al cjapà la decision di puartâ a fons la uere, diliberant la fuartece di Belgrât.

'Zuan Cjapestran, talpetant pes contradis di Austrie-Óngjarie, al veve imborezzât i cristians e rincurât cavalirs e pedons tra la siorie e il T. o. f. (Tiez Ordìn Francescan) pe crosade cuintri i Mussulmans.

Te batae par Belgrât il Cjapestran al comandave l'ale zampe dal esercit cristian. Cun pocjs peraulis, in non di Jesù, al impiè il coragjo dal esercit che, al segnal dal Hunyadi, cun tune imburide disperade si bute cuintri i Maometans; a' pàrin a tocs il grant cercli e a' disfín l'armade di Maomet. Al ere il 21 di lui dal 1456. Pôs dîs dopo al mur di peste il grant cjapitani e pôs mês dopo (23-X-1456) al mur ancje il Cjapestran, a Vilac tal convent dai fraris, dulà ch'al ere lât a polsâ.

Il nestri jurist fra' 'Zuan, ce sicu pridicjador cuintri i eretics, ce sicu legat dal pape pe crosade cuintri i Tures, si ere inviât viers lis contradis di Gjermanie. La regjon plui dongje di chês contradis menazzadis de eresie e de Miegelune 'e jere la "Patrie" nestre e la strade macul periculôse e fur dal tir dai mussulmans 'e jere la Strade Carantane. Cheste strade 'e tacave a Glemone e a' finive a Vilac. Insomp e da pît si cjatave un convent di fraris dulà che fra' 'Zuan al podeve sostâ e fermâsi a polsâ come in cjase sô.

'O vin la prove che il Cjapestran, passant di chestis bandis, si é fermât tal convent di Sant Antoni di Glemone, ospit dai confradis. 'O savìn che a Glemone al à pridicjât, ma no savìn, pal moment, ce ch'al à pridicjât, ni cetant a lunc ch'a si é fermât in convent.

Il cumun di Glemone al veve il dirit di clamâ a pridicjâ la Coresime tal domo un francescan. Il timp che il nestri fra' 'Zuan si cjatave chenti (fevrar 1452) al podeve jessi la Coresime. Al podares staj che il consei, cognossût il Cjapestran pe grande inomine, lu ves preât di fâ dome une part dal coresimal, dato che une persone di tant prestili e di chê sante ativitât che lu cussumave, nol podeve restâ lontan dal puest che la vocazion e la diplomassie lu tiravin.

Ch'e sei come ch'e ul, il fat al é che il cumon di Glemone nus stramande dôs delibaris, une par scoltâ e chê altre par risolvi la litighe cun done Florense. Come di solit, il cumon al mandave il frari pridicjador tal convent di S. Antoni e il cjamerar dal domo al notave lis spesis incuintradis par lui. Par une persone di tante inomine e cualifiche — incuisidor, legât dal pape — i fraris si saran premurâz di fâj un biel acet e a' varan domandât a cualchi persone, magari notade tal T. o. f., un signal di blancjarie mancul mal.

Ma al é plui probabil che il cumon al vebi incaricât 'ù cjamerar, come chês altris voltis lu veve fat cun vescui e sorestanz, di domandâ la blancjarie a done Florense. Te prime delibare dal cumon si fevele dal passaz dal Cjapestran par Glemone: "15 febr. 1452.. quod tempore quo venerabilis ac Religiosus Fr. Johannes de Capistrano venit Glemonam" e che te ocasion al é lât perdût un par di linsui di done Florense: ' 'perditum fuit in loco S. Antonii de Glemona unum par linteaminum D. ne Florencie".

Ta seconde delibare (29-XII-1452) si fevele dal Cjapestran che al predicjave a Glemone (jo 'o pensi par plui sornadis) e de blancjarie che done Florense 'e veve prestât ('o scrupuli su domande dal consei): "Proposito pro parte D. ne Florencie quod alias tempore quo venerabilis Fr. Johannes Capistranus praedicabat in Terra Glemone ipsa D. na Florencia mutuavit".

Il frari Cjapestran al ere pardabon venerabil, ma nol ere ancjemò "santificât". Se done Florense 'e fos stade indivine 'e vares sigûr lassât, sicu relicuje, al cumon i linsui e i sujemans, unevore fíns e ricamâz, che jê 'e veve prestât a un sant.