Chest an al sarà in Friûl l'an dei Longobarz. No par ch'al sedi qualchi aniversari impuartant te storie di chê int, ma parceche la Regjon, in ocasion dai "Mondiai dal balon - 1990" 'e à volût insiorâ il Friûl cun tun aveniment culturâl di grant respîr internazionâl.

Si sa, di fat, che i Longobarz, vignint in Italie, j àn dade une gnove muse ae penisule taliane, preparanle cun tune mude gnove a metisi insieme cun chei altris popui che te Alte Ete di Miez 'e son vignûz a dâ dongje l'Europe moderne. Une grande mostre sui "Longobarz in Italie" 'e vignarà vierte ai 2 di jugn a Cividât e te Vile Manin di Passarian.

Documenz di ogni gjenar (bilisiis, tesaurs, manufaz d'art e di artesanât, documenz di architeture, di sculture, di piture, miniaturis) 'e vignaràn esponûz tune curnîs rafinade ma ancje adate al visitadôr plui sempliz. Pe prime volte une documentazion cussì complete su l'art e su la vite dai Longobarz si podarà viodile insieme, colegade dentri un discors storic organic.

ar dut l'astât Cívidât e Passarian 'e saràn un luc di apontament pe culture internazionâl. Insieme cun chei altris reperz si podarà viodi in mostre ancje qualchidun ch'al ven di Buje. Dôs crôs d'aur, spadis, resc' di scudos e di coredo personâl. Si trate di materiai cjatâz in Colosoman tal secul passât e che cumò 'e son in mostre tal museo di Udin.

'E fasevin part di un tre tombis, situadis sul ôl de strade romane che di Sale 'e leve viers Colosoman, San Scjefin e Mont. Lì dongje, in Sale (non longobart ch'al ûl dî aziende agricule) si jèrin dislocadis 'zà tal VI secul (no tant dopo il 568) un grop di faris (altre peraule longobarde ch'e significhe famêis) par tignî a mens la strade e par coltivâ i cjamps lenti atôr.

I Longobarz, di fat, 'e jèrin soldâz, ur plaseve di lâ a cjaval, 'e vevin une lungje barbe, i cjevei bionz e une grande voe di messedâ la spade. Cussì, stabilîz in Sale, 'e àn sigûr tal prin spaventade la int dal contorno, robazzât atôr pes cjasis, fatis malis graciis ai parons, ocupadis lis campagnis.

Ma pôc dopo si son cuietâz, 'e son deventâz cristians, e 'e àn tacât a lâ in armonie cu lis fameís di Colosoman, e di dute Buje, ur àn tornâde une part dai cjamps e si son metûz insieme cun lôr a fâ i contadins. E dopo ancjmò un secul 'e son deventâz ancje lôr... furlans, anzit bujàz!