Il milenari dal cjscjel di Buje

983 - 1983

A ce puedial servî un milenari? A tantis robis plui o mancul util. Come a stuziâ lis curiositâz di qualchi studiât, a burîfûr lis ämbizions trionfalistichis di qualchi politic, a dismovi lis matetâz di qualchi mataran o l'estro di qualchi afarist. Ma al pò servî ancje a un fin unevore impuartant, ven a staj a judâ une comunitât a pensâ ae proprie storie, ch'al é come dî a scuviergi lis lidrîs dal propri jessi insieme, a capî la vocazion de proprie esistenze dal timp, a intuî il sens dal propri futûr. Buje, duncje, 'e celebre chest an il milenari dal so cjscjel parceche a' son juste mil ains ch'al ven nomenât pe prime volte tun document scrit. Dal 983, difat, l'imperatôr di Gjermanie Oton II al confermave al patriarcje Rodoalt il posses di cinc ciscjei, ven a staj chei di Buga, di Phagangna, di Groang, di Udene e di Braitan. Lis cinc localitâz a' son disponudis in ordin geografic comenzant dal Nord; par chel Buje 'e je la prime. La lôr identificazion no presente dificultâz pes primis quatri: Buje, Feagne, Sante Margarite dal Gruagn e Udin. Si discût su la ultime. Ma jo 'o pensi ch'a vedin reson chei ch'a sostegnin che Braitan al sedi il luc di Brede, dongje Puzzùi, disot di Udin; par chest il so cjscjel al é metût par ultin.

Confermant la proprietât di chesc' cjscjei al patriarcje, l'imperatôr jur dà, però, ancje gnovis regalìis, ven a staj gnûfs compiz, massime militârs, ch'a riguardin dut il teritori atôr dal

castrum par un rai di tre mìis, plui o mancul quatri chilometros e miez. Dit in altris peraulis — par chel che nus riguarde — l'imperâtor al ricognos al cjscjel e ae localitât di Buje une funzion teritoriâl che si riferìs a dute la zone centrâl dal anfiteatri morenic dal Tiliment. Cussì, cun chest at, di lì indenant, al ven metût in moviment un process storic ch'al tirarà daursi la storie dal paîs par dute l'Ete. di miez fin in dì di uè.

La storie nus spieghe, duncje, che Buje 'e je chê ch'e je, parceche di chel moment (e ancje di prime, come ch'e àn confermât lis ricercjs archeologjchis resint) 'e à vût une sô, sepûr limitade, funzion teritoriâl. E cheste no je une conclusion ch'e val nome par jar, ma ch'e val ancje par uè; anzi, par ué plui di mai. Piardût un cert nivel che il paîs al veve ancjmò te prime metât di chest secul, ancje Buje 'e sta cirint uè, come che si dîs, la sô vere identitât culturâl (sociâl, economiche, politiche... ); ma cheste identitât non sarà «vere» se ne tignarà cont de sô dimension teritoriâl. Tra San Denêl e Glemone, Buje 'e à di cjatâ la sô juste colocazion, cence cjoli nuje a dinissun, ma cence pierdi nuje de sô ereditât storiche, cence dineâ la vocazion teritoriâl che il timp, la geografie e i omps j àn ricognossût par passe mil ains.