(Sucedudes a Ursinins Pizzul)

L’invenzion dal “catetere esterno”

Le storie dal mont nus insegne che simpri une scuvierte e tire a ruvede un altre, infati par agnoruns  les bicicletes e son lades indenant metint tal cercli di une ruvede un tubo di gome dure fin che une dì un om, sigûr stuf di sintîsi masacrâ les moroides che i fasevin za mâl par lôr cont, al à pensât ben di inventâ el coperton cun dentri un bugjel ch’al tignìs l'aiar sot pression fasinle deventâ cussì plui lisere e molegjade.

Une dì Rose, le femine di Vigj, no ti viodie so fi Lucio, che dopo vê ribaltât le biciclete cu les ruvedes paraiar al veve gjavât  el coperton. Di lì e jere jessude une bufule taronde colôr aranzon che so fi al sglonfave e podopo le inneave in tune podine di aghe.

“Po sêstu deventât mat - i disé, so mari - Tu as spindût une barcje di bês che altre dì a comprâ cheste nuvitât e cumò za tu le âs rote?”

“No mame - i rispuindé pront Lucio - no je rote e je dome sbusade”, e alore lui cun calme i veve spiegât che tes strades blancjes al jere facil che qualchi fier, rot el coperton al sbusas el bugjel che al tignive l'ajar.

“El bugjel al tignive l'ajar” e veve pensât fra sé e sé Rose e le robe e jere finide lì.

Chê sere Vigj al jere tornât a cjase dal solit gîr tal ostarie e je e veve scugnût gambiâi bregons, mudandes e cjalzùs di plante fûr, come che dispès al sucedeve.  Vigj al veve purtrop un problemut di tignince,  no jerin ancjemò stâs inventâs i “pannoloni”.  A dî le sante veretât ancje se ju vessin vûts, nissun ju varès metûts, pensait a ce vergogne se qualchidun fra une cjoche e che âtre i fos sbrisât di fâ viodi ce che al veve sot, si sarès vergognât in vite, non si sarès plui mot di cjase par pôre di sintîsi a cjoli pal cûl.

Tal indoman in tant che, cun vueli di comedeon e sflanchinave sule podine a lavâ i bregons, alc si e  impiât tal so çurviel, finide le vore e tornade in cjase e a domandât a so fi: “Dipo, Lucio ce costial  un bugjel?”.

Savût el presit el so cjâf al à començât a fâ calcui, “lavant ogni dì bregons, e mudandes  al va tant savòn e tante aghe, che moltiplicât par siet dîs al fâs… quindi ae fin dal mês!” no  veve nancje finît di fâ le ultime moltiplicazion che i jerin jessudes de bocje cence quasit nancje savêlu chestes peraules:

“Lucio cjò i bês e va lassù di Caj (el Mecanic) a cjoli un bugiel di biciclete”.

Je, ch’e cognosseve ben le “besteate” i veve spiegât trop che al vares di vê vût di diametro el bugjel, in pratiche un bugjelut fat par une bicicletute di frus. E saveve che se al fos stât masse larc nol varès funzionât a dovè, compagn no voleve che al fos masse stret, tignint lu su a lunc al jere pericul che i sabulis l'imprest, ancje se ormai al servive dome par disbevi, ma si sa, le sperance e je l'ultime a murì.

“Ma mame - al veve dite el frut - ce astu di fâ parie?”.

“Vâtu, vâtu -  i veve rispuindût - ti disarai che cumò no ai timp”, e cussì le veve sujade.

Quant che so fi i al à puartât,  je cun fâ sigûr e ciapâ les fuarfis in man e lu tajâ, un centimetro plui in jù e veve fates dos busutes te gome e lì e veve peât doi spalis, un par bande, ch’e vevin le funzion di rezi el bugjel.

Rose e veve clare tal so cjâf dute le secuence, i doi spalis e saressin lâs a cjapâsi in tun altri, plui in alt, che al varès fat di cinturie, le altece dal fisagjo al veve di fâle Vigj secont che i lave ben.

Cumò no i restave che di cjapâ un pâr di bregons dal so om, misurâ le lungjece de gjambe e taiâ el bugjel un pôc plui curt. Ae fin e veve ravajât su un tocùt e cun tun spali di chei grues e veve fat un grop ben strent... a tignude stagne.

Quant che si dîs le gjenialitât, le furbizie fate femine, in tun bot e sclop e veve inventât ce che altris agnoruns  dopo e varessin clamât “catetere esterno”.

Le dì dopo i veve fate viodi le opare dal so inzen a Vigj, lui dopo vele cjalade cun voli sospietôs, al à scomençât a pensà che ae fin nissun no si sarès inacuart se sot di une gjambe dai bregons cussì larcs, al stave ancje chel bugjelut.

Quant che Vigj al lave te ostarie, cumò si sintive un scjôr, nol scugnive plui interompi le partide di briscule a mieç e contâ simpri une bale par molâ dut a cause di chel spinel che al veve rote le guarnizion.

Dopo vê provât a metilu su al veve constatât che no i dave nancje fastidi ae borse come che invessit tal imprin al veve suspietât, e cussì di che dì indenant nol veve finît di jevâ dal jet che l'argancj al jere za al so puest, net e pulît parceche Rose ch’e jevave prime di lui lu veve za lavât e smondeât.

Quant che al jere tal ostarie, ancje se tal zûc al stave pierdint ogni tant lu viodevin fâ une muse ridulinte, i someave di sedi el om plui scjôr dal mont, fra un caric e une briscule lui ’ur e steve fasint a ducj, sot i vôi.

No stin a fevelâ di Rose che cun cheste semplice invenzion e veve sparagnât comedons e bês, cumò par di plui ogni dì e podeve stâ qualchi mieze ore in plui cu les sôs amies a contâsi che dal ors.

Di buine furlane abituade dome a fâ e tasê, no i jere nancje passât lontanamentri pal cjâf ch’e varès podût brevetâ l'imprest. I soi dissendents uê e vivaressin sigûr di rendite e e saressin i plui siôrs di Buje.