Fieste grande iar pe inaugurazion dal gnûf agriturismo "Mulin de Roe" a San Florean di Buje. Ae presince di autoritâts de regjon, de province e dal comun, i proprietaris e an viert l'anbient rigjavât di une des pui vecjes e carateristiches strutures produtives dal teritori bujès. L'agriturismo al fasarâ sevi ristorazion, basade su le produzion agricule locâl, che acolience. vint cinc cjamares doples aredades seont el tradizional stil rustic des vecjes cjases rurâl de zone.

In cheste maniere si vierç un altri interessant capitul te storie dal Parco Comunâl de Ledre. Cheste zone protete, costitutide nome un an fa, e à madresût in poc tinp une schirie di iniziatives economiches e culturâls che stan trasformant Buje in tune autentiche capitâl dal "svilup ecocompatibil". El agriturismo si zonte duncje ae ativitât de cooperative "Le Lodre" che cure i percors dal parco e organize "eco-trekking" a pît, a cjaval e in biciclete e iessudes in canoe: ae isule di produzion agrobiologjche metude adun dai contadins cul iutori de aministrazion comunâl che fornis i prodots dal spacio rigjavât tes stanzies de latarie di San Florean, dulâ ch'al ven ancje produsût el formadi cul marcjo "Parco de Ledre": aes buteghes artigjanes di Andreuce (creps e ceramiches) e di Cjamp (fiêr batût e piere lavorade): al museo des fornâs e dai fornasîrs metût adun te cjase di Fasûl a Saramont. Chest nome par ricuardâ les iniziatives pui significative cence smenteâ el fenomenâl suces fat regjstrâ tal setenbar stât de rinovade "Sagre de trute" organizade a San Florean dal "Comitât di sostegno al Parco" in colaborazion cul ARS.

Dutes chestes ativitâts e son stades ricuardades dal sindic tal so discors di inaugurazion tignût tal curtîl dal agriturismo denant di un centenâr di persones. El prin sitadin al'à evidenziât l'inpuartance che inziatives di chest tipo si realizin in anbit comunâl creant tal stes tinp svilup economic e ocasions par cognossi le realtât di Buje. L'assesôr comunâl al anbient al à de so bande sotolineât come le atuâl aministrazion e vedi sinpri tignût come element di fonde de sô pulitiche el concet di "svilup sostignibil" batinsi ad ogni nivel par rindi concretes chest concet.

"Le bielece e le ricjece di Buje" al à dit "e son te sô nature: tes sôs culines. tes sôs aghes, tai soi cjamps. Volè lâ cuintri chest al vul dî sasinai le anime. Par chest no si sin sinpri batûts cun ardôr a pro de costituzion dal Parco". L'assesôr al à sostignût che nome cun sieltes di cheste fate al è pussibil creâ ocasions di cressite economiche e gnûfs puescj di vore cence savoltâ ancjemò un paîs che tant al à zà paiât pal taramot e pes sieltes de ricostruzion. Ancje l'assesôr regjonâl al anbient, che nol à volût mancjâ ae inaugurazion, al à ricuardât di sei stât di sinpri un sostenidôr dal Parco e di seisi inpegnât cun fuarce dentri de struture regjonâl par otignî el ricognossiment ufiçâl ae zone.

Al à ancje garantît un sostegno particolâr par iniziatives di chest tipo che al deventarâ concret cun tun emendament che al stâ preparant pal inseriment tal prosin belanç. Finît el discors al à taiât el nastro tignût di une copie di fruts in custum tipic furlan. Dopo de benedizion dal plevan les notes di une orchestrute e an conpagnât el buffet ofiert dai proprietaris dant le pussibilitât a cui ch'al voleve di fâ cuatri salts sul breâr prontât tal mieç dal curtîl.