Une dì a si presentà sul puartòn dal paradîs un toc di omenàt cunt’une ghigne ch’al pareve un di chei ch’a i an metût in crôs il Signôr e a si metè a sdrondenâ il batâli.

San Pieri, ch’al ere drenti mieç indurmidît, al dè un scjass e al spesseà a viergi la puartelute par cucâ fûr cui ch’al ere chel malincreançât.

Conch’a ti viôt chel imprest a i sberle: «Ohelà, galantom, ce us duèlial? Ese maniere di fâ cheste?»

E chel âtri: «Vièrgimi.»

«Vièrgius? Cun chê muse di gjudeo ch’i veis!»

«Là dentri and’è di pieis da mê! Tire chel clostri, mòviti, se no ti buti jù il puartòn.»

«Cui à dite ch’and’è di pieis cà dentri? In paradîs a nol è mai entrât nuje di sporc.»

«Po ben; tire i voi e tu ti ’nacuargiarâs. Cumò vierç; e une sièt!»

San Pieri, cence dî nujaltri, al siere la puartelute su la muse e si invìe fur pal paradîs. Al ere un pôc sore pinsîr par chel ch’ai veve dit chel maçacento; e cussì lant indenant a si cjalave atôr e... corpo di biu! ca e là ai tocjave di viodi certis musis e di sintî a fevelâ cussì malamentri e fintrimai di sintî ancje a colâ cualchi croste di chês pelosis, che al scugnì propit persuadisi che chel altri al veve dite la veretât. E al pensave: «Cheste a jè biele! Horpo di ducj i corpos, ce ao mai di fâ jò cumò? Se Diu si ’nacuarç mi dà la colpe a mi dal sigûr. Puar mai te Pieri, cheste volte i tu ti cjatis a jessi in tun biel imbroi!»

A ti scontre San Pauli: «Ce ûl dî, Pieri, di chestis bandis? cun chê sere di lassimi stâ!» «Ah Pauli! s’i tu savessis ce ch’a mi tocje!»

E ai conte la part. E biel ch’a lavin cussì indenant cjacarant pal paradîs, no ur vegnial incuintri juste chel tâl che San Pieri nol veve ’olût viergi un moment denant!

«Ben ce mût ese ca? – dissal San Pieri – sòio o no sòio jò il puartîr dal Paradîs? Disèimi di ce bande ch’i sèis vignût ca dentri, vô.»

«Ce t’impuartial a ti? Culì i soj e culì i stoi.»

Alore San Pieri e San Pauli si conseàrin di mandâ une companìe di agnui a spiâ atôr par dut il paradîs, fûr e dentri. Subìt al tornà dongje svolant tan’ ch’al podeve un agnul e ur disé: «Lajù da pît dal paradîs a jè une scjalute e par lì al è Sant’Osef ch’al fâs vignî sù cui ch’al ûl.»

«Cjò mo – dissal San Pieri – viostu ce mût ch’à jè?! Ben, ma no jè maniere di fâ! Jemplâ il paradîs di cjochelis e di ladrons! Cà bisugne proviodi dormàn e di bessoi parceche no si pò lâ a contâj al Signôr chescj afârs.»

Dal dit al fat intun lamp a màndin i agnui a clamâ dongje chei altris Apuestui, ch’ai an vude dal Signôr la autoritât di judicâ lis dodis tribùs di Israel e t’implantin il tribunâl; ai dan l’incariche a Sant’Ivon di presentâ l’acuse e a ordènin a doi agnui di lâ a cjoli Sant’Osef e menâlu denant di lôr.

Sant’Osef, puâr vieli, al rivà con’ ch’al podè e, cjatansi a jessi denant di chel sinedri al domandà: «Ce ’oleiso cumò?».

San Pieri, president, ai rispuint: «Cjalait mo, Sant’Osef: a nus displâs propit di vei scognût clamâus in judizi, parceche vô i seis il plui grant sant dal paradîs. Ma no podìn fâ di mancul. Cà i si sin ’nacuargiûs che vô, cun t’une scjale ch’i vèis metude jù da pît dal paradîs, nus fasèis jentrâ dute le canajate dal mont. Alore al è dibant che nô i sèin lâts a insegnâ ai popui che par lâ in paradîs bisugne jessi bogns e fâ buinis oparis... Sielgèisi un avocat ch’a us difindi e rispuindeit a di ce ch’i us domandarìn».

«Po ben, i rispuindarai. Crodèiso veramentri di fâmi pôre? Avocàts non mi covente e po! in paradîs non d’è nissun di chei, fin ch’al no vignarà sù Cjasesole.» (*)

«Ben, alore diseit, parcè veso fate chê scjale lajù?»

«Ao di stâ simpri di bant jò? I savarèis che jò i soi simpri stât un puar omp, ma i soi usât a no stâ mai cence fâ alc e l’ozi a no mi va.»

«E parcè fasèiso vignî in paradîs di chê bande, int ch’a no merte di jentrâ a chi dentri?»

«Parceche chei ch’i fâs jentrâ jò a son ducj miei devòts.»

«Benòn! E i conti jò ce rasse di devòts! Maçacentos a son, altri che devòts! Ise clientele di tignî, chê alì?»

«Afâr gno! A vualtris no us impuarte»

Al jeve su alore Sant’Ivon e al fâs la sô discorse, mostrant che la justizie di Diu a va rispietade in dutis lis robis e che se ogni sant al ’orès fâ in chê maniere a si podarès brusâ i vanzelis e meti soreâl tas gleisis. E al concludè domandant di tirâ vie chê scjale e di meti un agnul di vuardie in chel cjantòn.

«Po ben – dissal Sant’Osef – se vualtris i la ’oleis al vuestri mût, parons! Jò i cjapi su cun me la mê femine e il gno frut e i voi a plantâ il paradîs in t’un altri puest e fieste finide!»

Ce vevino di dî i Apuestui, puarèts? Un Paradîs cence dal Signôr e da Madone nol vâl un carantàn mat e cussì ai an scugnût risolvisi di lassâi fâ a Sant’Osef ce mût ch’al ûl. E la scjalute da pît dal paradîs a jè ancjemò.

Note:

(*) Vincenzo Casasola (Drìgul) nassût a Buje tal 1845 e lì muart tal 1948, avocàt di grant non, figure singolâr, omp dut un toc, contrari aes nuvitâts e difensôr des causis massime se di devoziòn.