A Buje une volte 'e viveve, fra tantis tradizions popolârs, une che di tanc' agn 'e cjaminave su tun troi sflondorôs: IL CARNAVÂL DI BUJE.

A parâ vie chestis olmis al è stât "l'orcolat" dal 1976. Dopo chel disastro a' semeavin finîz i timps dulà che si viodevin i cjars mascarâz e di biele fate a risultât di lavôr e fadiis di int plene di buine volontât.

Buje no si è pleade al taramot e cussì di vot agn in cà l'esempli dai nestris viei al ven screât ogni an pe int ch'e à inmò l'anime dai fruz e la voe di divertîsi come chei di une volte. L'impen, ch'al cres simpri plui cul tirâ sù il cjâr mascarât, si dà padìn nome in te "joibe grasse", quant che si fâs la file cui lavôrs dedicâz soredut ai fruz e ai vecjos de cjase di ripôs.

La domenie dopo, Buje 'e cuche cun orgoliose ospitalitât i tanc' (une ventine) cjârs e grops di int in mascare ch'e rivin di ogni bande dal Friûl; ospitalitât ch'e ven rigambiade tes fiestis dai paîs vissins e dai amîs dal carneval furlan. Par creâ i cjârs 'e ven doprade "la cjarte peste" che cu la sô semplicitât nus jude dant un biel e svelt risultât. I sfueis folâz in te cole, fate cun farine e aghe, a' van a cuviergi, pes figuris plui grandis, i scheletros di fiêr prime tirâz sù par aiar.

I "mascarons" 'e son grums di cjarte e cole che si fàsin cui stamps di ges a lorvolte faz cun stamps di rigile. Par fâ semeâ plui vêrs i personagjos a' vegnin insiorâz di mecanisins e congegnos inventâz cun ingen e metûz in opare nome par chel carnavâl. A dâ lustro ae manifestazion 'e ven fate une mostre cu la partecipazion des scuelis elementars e mediis di Buje. I fruz 'e son coordinâz, cun ligrie e tante voe di partecipâ a cheste biele fieste, dai lôr mestris.

A ret di dut chest il librut "IL BAUSÂR", che chest an al rive ae sô VII stampe, al met a disposizion dal letôr un patrimoni sociâl e cultural di fotografiis e pinsîrs dal nestri paîs; chel paîs che par judâ a vivi cheste vecje tradizion al à di dâ une man cul dâsi dongje cun passion e costanze ogni volte che il "carnavâl bujat" al lassarà pes stradis lis sôs olmis coloradis.