A' son juste 10 ains che il taramot al à talpinât il cûr dal Friûl e a' son 1O ains che i furlans a' navìghin par tornâ a meti-adun la muse des lôr comunitâz savoltadis. E cumò al é 'zà timp di comemorazions e di belanz. 'O sin sigurs che in cheste ocasion la int, a furlan vie, no si lassarà cjapâ nì de retoriche trionfalistiche nì de smanie contestative.

Ma 'e savarà cjalâ in muse la realtât come ch'e je par butâ la fonde di un doman plui sigûr. ln chest 10 ains une vore al é stât fat, tantis robis a' son stadis fatis ben, altris mancul, qualchidune mâl. Alc al reste ancjemò di fâ, e si à di fâlu ben sfrutant la lezion dal passât, e si à di fâlu in buride, cence pierdi timp, nancje a laudâsi. ln fonz la ricostruzion 'e je il spieli de culture furlane di uê, cu lis sôs virtûz e cui soi difiez, cui soi valôrs e cu lis sôs contradizions.

No sin nì miôr nì piês di chei altris, 'o sin nome diferenz. Buje, tal ben e tal mâl, 'e je un bocon di chest quadri plui grant. Ancje chì tant al é stât fat (come ch'al spieghe il sindic tal prin articul di chest numar), tant al é stât fat ben, alc al podeve sei fat miôr (come la ricostruzion dal domo), alc al reste ancjmò di fâ e si à di fâlu pal miôr (come la sistemazion de Ledre che si fevele in chestis pagjnis).

Si à soredut di lavorâ te prospetive juste par che il paîs nol deventi "forest" e alienant pe stesse int di Buje (come ch'al mutive tal so "autoritrat" Renato Calligaro). Gambiâ nol à di volê dî deventâ plui puars di prime, s'intint no tant in fat di bêz ma di chel patrimoni ideâl e culturâl che la storie nus à ingrumât.