Friûl al ûl dî paîs

Editoriâl (BPN -1987)

Al pâr che cumò duc' a' sedin dacordo in Friûl che, fatis lis cjasis butadisju dal taramot, bisugne ristorâ l'anime feride de comunitât, comenzant de rifondazion de sô identitât etniche e culturâl. Si fevele ancje tant di fâ justizie al Friûl dantj dute la pussibilitât di madressi autonomamentri su la linie de sô vocazion storiche.

Ma si dîs ancje (e al é vêr) che Friûl al ûl dî paîs, ven a stâj culture di pizzulis comunitâz vivis, ingropadis cun antîcs peamps di famèe, imbombadis di tradizions milenariis, nudridis des rudis risorsis de int. Se si ûl, duncje, tignî salde l'identität furlane, tocje tignî vîfs i nestris paîs. l Po ben, chei di Ursinins Pizzul par chest cont no intìndin tirâsi indaûr.

E seancje chest an par Sant Josef no puedin fâ robonis, come tai ains passâz (ma a' stan 'za preparansì par fâ miôr chest an ch'al ven), istes no àn volût dismeti il lôr numar unic. Buje pore nuje!, infati, tal so pizzul, al ûl concori a fâ cressi l'autocussienze culturâl dal nestri paîs.

Chel al è il telâr ch'al ten su duc' i contribûz ch'a compàrin ta chest librut, ancje cun argomenz tant diferenz. Cà tocje dâsi dongje duc' a difindi la nestre culture, al scrif jentrant Meni Zanier. No si à di rindisi. 'E je vere che la cumunitât 'e je insiliôse par tanc' problems, come chei de difese e de promozion dal ambient (baste lei i articui di G. Ellero, di A. Baracchini, di M. Tondolo, ) o chei de pupilance dai bens culturai (lu ricuàrdin i contribûz di D. Missera, di G. C. Menis, di T. Baldassi e di E. Tessaro).

Ma 'e je ancje vere che Buje 'e à daûrsi une storie nobil che la console (une cerce nus 'e dâ la storie de glesie viere di S. Bortul scrite di G. C. Menis) e denant un presint plen di risorsis: la vitalitât inteletuâl de sô int (baste lei l'autoritrat di A. Nicoloso Ciceri e lis pagjnis di M. Ragagnin), lis virtûz di un popul di emigranz (provait a lei il studi di L. Nicoloso Pitzalis e il servizi di R. Covasso Comino, ), la braure dai soi artisc' (lu mutìvin cheste volte i articui di M. Comino Osso, e di E. Santi e di D. Santi).