La sagre di Sant Josef 'e je stade metude sù a Buje tal 1621 cun delibare dal Consej comunâl. Cussì 'e contin i documenz. Ma te nestre memorie di fruz cheste fieste 'e puarte il savôr des robis plui gjenuinis.

Mi visi ancjmò di chês sagris quant che nô mularie cun duc' i granc' si dàvin dongje su la plazzute de glesie di Ursinins Pizzul. Il segnâl de sagre 'e jerin soredut chel pâr di barachis ch'e vendevin lis "specialitâz" d'inchevolte: pastis, bagjgjs, carobulis, fìs secs... e massime lis pevarinis, un impast di farine e milaz, di forme ovâl, cuet tal fôr, ch'al faseve vignî Vaghe gole a duc' i fruz.

Veramentri, mangjant chês deliziis, dispes si visavisi di mandâ jù plui polvar che sucar parvie che chei golosez, vieris di setemanis, cui sa ce tantis voltis e ce tant a lunc ch'e jerin stâz esponûz sui bancuz. Il spetacul plui biel, però, el ere chel dai 'zucs e des senutis di ridi, improvisadis dai bulos dal borc. Dopo dal '46, intant che tanc' 'zovins 'e àn scugnût tornâ a lâ vie pal mont, la sagre di Sant Josef 'e je lade simpri plui al mancul.

Dut si limitave, sì e no, ae part religjose. Ma dopo il taramot, ancje cjapant slanz de ricostruzion de glesiute, un trop di 'Sefs si son metûz di uce par tornâ a tirâ sù la sagre. 'E jere une buine ocasion, se no altri, par stâ un pôc insieme, in buine compagnie. Cussì s't è lâz indenant par qualchi an. Fin che dal '81, Silvano Taboghe e Bepute 'e àn presentât a chei dal borc une propueste par tirâ sù une sagre in grant stîl.

'E àn preparât un manifest fat a man, si àn fatis riunions cun tune vore di int, si è discutût par mès, ma cjatâ la concuardie di duc' nol ere facil. Cussì, cence pierdi timp, il mês di 'zenâr dal '82, une cinquantine di personis convocadis nus àn dit, dutis dacordo, di lâ indenant distes e insieme 'o vin inmaneade la prime sagre di Sant Josef de gnove serie.

La sagre di cumò 'e cîr prin di dut, su la linie de tradizion, di meti insieme dut il borc, organizant diviersis iniziativis. Si è cirût di dâ ocasions di stâ insieme a duc', massime ai 'zovins e ai fruz, cun manifestazions sportivis e ricreativis. Si à decidût ancje di meti dentri une part culturâl, organizant mostris d'art e di vite bujate.

Si à vude ancje l'ambizion di publicâ il numar unic "Buje pore nuje", che chest an al rive ae sô setime anade; e culì 'o scuen dî un grazie di cûr al prof. Menis che nus à dade un man ben esperte. Né si pò dismenteâ il contribût tecnic e finanziari dal "Giornale di Brescia", dal grafic simpri cussì disponibil Franco Maestrini e dal nestri 'Sefin. Dut, insome, al è lât pal miôr lassant duc' i colaboradôrs (une otantine di lôr) sodisfaz e bramòs di continuâ. Il fat gnût di chest an al è chel de costituzion legâl de associazion "CHEI DI URSININS PIZZUL".

A non dai socios fondatôrs 'o ài, duncje, il plasê di dà il salût e il grazie a duc' chei ch'e àn sigurade ancje in cheste circostance la lôr patecipazion e la lôr colaborazion. Il fat che fra di lôr 'e sedin ancje une vore di 'zovins nus dà cunfuart e sperance che la nestre iniziative no colarà.