A voltis tu cjatis tai slambris dai ricuarz une muse e ti nas une storie gjenealogjche; al puès finîsi dut alì.

Co’ ti capite un imprest o une situazion o un timp la robe ’e ven mudansi e tu tu ti metis in scolte, tal cidìn dal to cûr o te gnot dal to passât, e tu puedis, di une storie, rivâ a une flabe.

Mi è capitât chest partint di un discors fat a marcjât; cul gno amì mi soi sovignût dal 1952, cuant che duc’ e pardùt si lave a pît, di un funerâl in Arbe (ma no mi impensavi di cui) là che secont me ’e à finît la sô storie gloriose la caroce funebre. Jo no ’eri esatamentri un zovin anzit ’o vevi apene tacade scuele ma messes e funerâi no mi pâr di vent saltâz, par chest chê slangagnade di Arbe a Sa’ Scjefin e po’ a San Bortul no me smentèi.

Le caroce di proprietât di chei di Scòi ’e vignive fidade a Favìt ch’al pareve fat apueste par chê ofissiadure: un pôc spelât, moro di carnagjon, basetes ben curades, ni tracagnòt ni lungagnòn e ch’al saveve ben domâ la pariglie che ’e tirave.

La bielece di chel argagn’ sul cjâr al ere dome il misteri! Les colonetes par tignî su el sofìt dut lavorât cun insegnes di vescul cjavaliades e smierladures rivoltades in jù: scuâsit tindines come par mostrâ il grât de cualitât de opare.

Dentri, tal sît par chel destinât, el muart: figure di contorno pe belece di chel corteo.

Daûr ruvede grande (cui čocs di len par freno) denant plui picinine par tamonâ cence scossons pal ultin trasferiment.

El šofêr cence scorie: nol covente sburtâ, i cjavâi ’e san e tasint si capissisi miôr.

Cuatri ferârs ai cuatri cjantons dal cjâr simpri ben lustrât ’e tegnin impiade le lûs de sperance di tornâsi a viodi dopo Josafat.

Tanc’ predis (and’ere) e, denant de meste prucission, prin el ferâr e dopo il crocifis e po’ les zòes di famée; dut el rest, a pas, daûr. El borc chê dì si fermave.

Di Favìt nol covente dî: al è passât di denant sul comant a daûr, sul traspuart come che vite ’e comande.

De caroce ’o ài fevelât cun Marino Scòi e mi à contât che dopo lade in pension ’e jè stade par àins in dipuesit lì dal mulìn di Probo, a San Florean e cussì si è ruvinade e ’e jè lade di perdôni ancje jè.

Pecjât!

Ma ce che a mi mi è restât in tal cjâf al è che chêi di Madone e di Urbignà, par fâ le stesse funzion, ’e vevin un biroč di strissinâ a man cence cjavâi e cence Favìt e alore jo pensant a chêi-là mi soi simpri sintût il plui siôr.

Note:

El funerâl al è chel de none di Mariangela Ponta che mi à dade la documentazion fotografiche.