Pasches di une volte

di Ermes Taboga

Soredùt quant che si fasin dongje les fiestes, mi capite, come ch'al capitarâ a tanc', di lâ indaur cul pinsîr, di cirî tai ricuars di frut les diferences cul presint, di vê l'impression che une volte al ere dut, o quasi, pui biel, che si ere pui serens e pui contens... No crôt ch'al sei simpri vêr: forsit j stramugin le bielece de etât cun che de realtât passade; forsit i ricuars, ancje chei brùs, si sfantin te dolcetât de lontanance; forsit j savevin contentasi e gjoldi di pôc quant che scuasi duc' no vevin nuje...

E cussì mi tornin te memorie le mes pasches di une volte, pasches di frut, di paìs..., situasions vivudes di tanc' di vuatris che, leint, i fasarês cun me un tuf tal nestri passât.

Nô frus j spetavin cun brame le Pasche. Le sintivin visinasi tes funsions in glesie, simpri cusì plene, cui piciui in coro tai bancus, le frutes insomp des femines ingenoglades tai bancs de file ciampe, cul fassolet sul cjâf, i omps tai bancs de file gjestre o a tôr dal bussul de aghe sante.

El puestin al puartave pes cjases cartulines che mostravin el Signôr trionfant o prâs in flôr dulà che un agnelut al saltave come un zupet dongje di un riul di aghe frescje in tant che les cjampanes 'e spandevin le lôr gjonde pe resuresion in tun cîl seren plen di sisiles, o geùs plens di ûs, circondâs di vispos polecius...

Le domenie ulive, in te glesie già cui crucifis in luto, el predi al benedive l'ulîf in tun nûl sprofumât di incens e nô clericus i smicjavin le ramace pui biele di puartâ ai parinc' par qualchi francut di giontâ a chei che 'i vevin parât dongje cun pasiensie e ingèn, fasint servisis, vendint fiers e peciòs al peciotâr, vuès, pêl di purcit, piels di cunin a "chel de varachine".

Te buteghe 'e vendevin uvus di sucar colorât e, a dîs francs l’un, ûs di ostie colorade cu' les decorasions di sucar e, par sorprese, un mateciut di bande indorade; ma nô i spetavin soredùt che les coves si emplassin di ûs di gjaline e che nestre mari 'e fos gjenerose e nus permetès di fâ biele figure cui amîs el dopo misdì di Pasche, quant che 'i saressin lâs a fau cori tai comunai dopo veu decorâs cun tant amôr.

Te joibe, prime dì di vacance, già a binore duc' su le place, blancje di soreli, cu le craciule o el batacul prons par fâ el gîr dal paîs di sere a sunâ le Avemarie. Si parave vie el timp alenansi, provant at urno une craciule a forme di cariole che vevin Ivo e Silvio, si dave une menade al craciolon di Pieri Crac. Dopo misdì si giuave di serlo o di "Alt Pieri" dongje dai pins dal Siôr, si invadeve le place cun acanides partides di bale...

Le joibe o el Vinars Sant, ogni tant, 'e passavin maris cun geis plens di fuaces di Pasche apene cuetes tal fôr dal Siôr o di Pesete: el profum nus lave al cûr e si auguravin che qualchi mari e cedess a les insistences dal fì par cerciâ, dopo, duc' insieme, un frucion par omp... Ma s'al ere Vinars Sant, no 'I ere nuje ce fâ: 'e ere vilie di pûr vuèli!

In glesie, distirât in coro, un Crist plen di dolôr al spetave che duc', a turno, 'i lassin a bussaj les plaes e a butâ qualchi franc in t'un cestinut poât dongje di un lumin ch'al ardeve te tace miege plene di vuèli.

El Vinars Sant, prime di gustâ, j lavin a comprâ un miez eto di sgombro che 'i slungjavin a cjase cul vuèli e 'i fasevin une vilie di siors. Te cantine 'e travasavin e no si lesinave sul vin che in chê dì... al lave dut in sanc!

Tal dopo misdì le glesie si emplave di int. Le funsion 'e ere lungje, el latin no si lu capive, ma el çjant dal “Stabat mater" e les riflesions dongje des stasions de Vie Crucis nus emplavin el cûr di dolôr sincêr.

Nissun in chê dì al lavorave le cjere e nô frus 'i erin un pôc pui libars di giuâ su le place e di partecipâ a duc' i girs che coventavin par anunciâ dutes le funsions... Pùar chel frut che nol veve nancje une craciulute par fâ part dal grop de mularie insuperbide di chel grant compit!

Le sabide, tôr des dîs, dopo un cussì lunc silensio, les cjampanes si sleavin finalmentri tal Gloria ch'al liberave el paîs di un sens di angosce e al rinovave dai... meracui: si lavavin le muse cu' l'aghe frescje par scancelâ i pecjâs e qualchidun al provave a parâ vie les pivicjes cui disgòs des vîs.

Finalmentri 'e rivave Pasche! El sun des cjampanes si coreve daûr di paîs in paîs e al emplave el cîl primaverîl.

Gno pari al veve un gran dafâ a cusî e jò, subite dopo messe piciule, 'i lavi svelt a consegnâ i vistîs par che a messe grande chei furtunâs 'e podessin screau...

El dì di Pasche le glesie 'e ere stracolme. Cetanc' 'e fasevin le cumunion e un clericut al distribuive santùs a ciampe e a gjestre sot el voli sodisfat dal predi.

Dopo messe grande les ostaries si emplavin di jnt legre e ben vistude che si intropave

dongje dai mies litros; nô frus j fasevin el gîr de parentât a fâ i augurios (par cjapâ su qualchi franc!) e dopo 'i corevin a cjase e, intant che les maris 'e spignatavin dutes indafarades, 'i decoravin i ûs cun chei pôs colors che nus restavin di une scjate di sîs "Giotto" comprâs i prins dîs di scuele, o cun qualchi erbe fate boli insieme ai ûs...

A misdì su le taule, dongje dal cicin, 'e comparivin les fuaces e finalmentri si disniciave el salam; ma, se ere in program le mirinde tai prâs, si lu sparagnave par che ocasion.

E dopo el gjéspui, a trops, nô frus, braurôs, 'i lavin tai cumunai, dongje de Merie, vie pai trois cui ûs te sachete, a fau cori. Pe strade 'i fasevin qualchi pivetute cu' le scusse di un ramaciut di ornâr sbregât tes cises e 'i fasevin a gare a chel c'al rivave a fale sunâ pui fuart. E finalmentri 'i rivavin tai prâs dulà che a binore les odules e jevavin in svuel e si pierdevin in tal cîl, cussì lusorôs ch'al inceave, a spandi le lôr melodie, par butasi jù dopo di colp, come becades di une sclopetade. 'E rivave le volte dai ûs. Ju butavin prime planc, tignint el flât di pore che si rompessin subit; po dopo 'i cjapavin coragjo e 'i slungjavin el tîr e j çjalavin cun ansie se si viodevin saltâ les scjeles blancjes dal ûf rot fra i ciufs di erbe frescje, sprofumade di guano. I cirivin di tirâ el gust pui a lunc pusibil, e dopo 'i rivavin fin te Gravate, dongje dai Fituai, dulà che giravin le gjostres e les gondules e semeavin sfidâ le lez di gravitât, intant che sunavin le cjanzòns di Sanremo. J vevin pôs bês te sachçte e 'i cirivin di sparagnau par l’indoman, sornade di grande fieste ta che borgade, di merindes, e alore, al massimo... un girut o qualchi tîr al tirasegno cu le sperance di brincâ un jojò... e dopo a cjase cui voi lustris di goles rimandades e cul cûr plen di progjès.

El lunis di Pasche scuasi duc' 'e lavin a fâ le mirinde e a tirâ i ûs, se no lu vevin fat le dì prime. A trops si sgjernavin le famees pai prâs de Gravate: fuaces, salam, ûs durs, salate gnove, formadi, vin in bondance, voe di cjantâ, di fâ les marcules...

Lâ de Barache o di front di Bocalon une orchestrute si ingegnave a tirâ dongje le zoventût cui balabii pui di mode; nô 'i svuelavin su ies gjostres o su les gondules; i ansians e fasevin resse tes ostaries di Tic', di Toful, di Bocalon, tai chioscos fas ae buine tai prâs cu les damigjanes sui cjars.

'I compravin, di solit, robe che no costàs masse e che duràs a lunc: bagjgjs, fîs di barîl, carobules, steches di tiremole o scjatutes di caricatù. Si scambiavin fra di nô qualchi alc par parâ vie le gole cence scuignì cjoli dut, posto che i bês, scjars, 'e sparivin a le svelte.

Quant che el soreli al lave jù, bisugnave tornâ a cjase, magari a dâ aes vaçjes une grampe di fen de trombe già emplade.

Te ostarie dai mei nonos le int che tornave indaûr viers Buje si fermave a bevi ancjemò un tajut, cu le gasose par ches femines. Di sere qualchi grant al tornave te Gravate a balâ, ma nô frus 'i scugnivin là a durmî adore parceche tal doman 'i tomavin a scuele.