Tal Doimil, a partî dal 3 di Lui, la Rai di Triest e metè in onde une rubriche intitulade "Shaker ", progjetade e direte di Giancarlo Deganutti e realizade di Gianfranco Ellero. Si tratave di sielzi trentenûf paîs, deventâts famôs o almancul cognossûts par vê dât la vite a cualchi omp impuartant, e di spiegâ il significât dal lôr non. Di resint o vin podût recuperâ il test ch ‘al rivuarde Buje, e o sin ben contents di publicâlu culì cul permés dal Autôr.

 

 

Saveviso che nissun paîs si clame Buje? Al è il Comun ch’al à chest non, e chei di Buje a stan a San Scjefìn e a Madone, a Ursinins Grant o a Ursinins Piçul, in Mont e a Urbignà, a Tombe o a Andreuce, a Pidicuel e Sacastoe, a Vile e San Florean, e cussì vie dilunc di borgade in borgade! Gino Molinaro, il Sindic de ricostruzion, al diseve che Buje e je une republiche cun corantenûf borgadis, e par chest aspiet e semèe a Montenars o a Sapade, doi paîs che... no esistin...

Il non, ricuardât pe prime volte tun diplom di Carlo Magno, al gambìe cui timp: tal 792 la localitât e ven clamade Boga, un secul plui tart Bugia, e intor dal Mil Buga: Angelico Prati al pense ch’al sedi imparintât cui toscan buca.

Dal sigûr antighe e je la plêf sul Mont, ma l’archeologjie e la toponomastiche nus disin che fra i cuei la presince romane e longobarde e je ben documentade.

Il paesaç si presente come un mâr di culinis terziariis e cuaternariis, cun flancs drets lis primis e flancs dolçs lis secondis, e, parmìs, lis aghis claris e frescjis dal Cuar e dal Cormôr, de Ledre e dal Orgelât: un paradîs biel pai voi ma dûr di lavorâ, che nol veve pomis avonde par ducj se, soredut prime de grande vuere, a centenârs i bujês a lavin a fâ modons vie pes Gjermaniis.

Sta a viodi, a disaran i scoltadôrs, che cumò nus fevele de monede false: sì, bisugne ch’o disi alc, par vie che Buje e je famose in Friûl par cheste reson, ma o scuen deludi la int disint che false no jere! Si tratave di biliets stampâts dal Comun tal 1918, che naturalmentri no vevin valôr dopo la vuere.

La vere glorie di Buje, rimetude in sest dopo il taramot cul domo rifat “dov’era e com’era”, e je l’art e la culture creade dai siei fîs tal Nûfcent: i madaiscj Giampaoli, Monassi e Pezzetta; i storics Menis, pari e fî; il pitôr Ursella; i fotografos Barnaba e Baldassi; l’etnografe Andreina Nicoloso Ciceri e tancj âtris.