Grandes contradizions. Dut e'l contrari di dut. 'J sin tun periodo di grande confusion, tai valôrs di guide e tai riferimenz morâi. Al pâr che ognun al puedi dî qualunche robe, al semêe che si vedi le pussibilitât di fâ ce che si ûl: ch'j sèdin in tune situazion di libertât assolude. Ma, sino sigûrs di chest? Pensant ben...

No volìn dî ce ch'al è ben o mâl, just o sbagliât; si limitìn a riclamâ l'atenzion su qualchi aspiet de vite dal dì di vuè, e che ogniun al tiri les sôs conclusions.

Un pari di famèe, dopo une setemane di lavôr, salacôr ancje dûr e sfadiôs, si ferme ta l'ostarie a bevi un got, al cjate un pâr di amîs e i tais e devèntin quatri o cinc; fìsic robust e ... alenât, al è lêgri ma plenamentri in sé, però se lu gàfin, ancje s'al è a un tîr di sclope di cjâse, 'e son qualchi miâr di euros di multe e un biel pôs di mês cence patente: di ruvinâlu, lui e le famêe. Par cuintri, duc' 'e san trope droghe che gire atôr, di ce tante žoventût che le consume, ma ancje ce tante ch'an gire tra j altolocâz (politics comprendûz); duc' 'e san ch'al è un marcjât inlegâl, cence tasses e cun tante delinquence; epûr cetantes di mancul ch'e son les "pattuglie" cui cjans antidroghe rispiet a chês cui "palloncini"! E no saressial oportun che ae visite pe patente al fos proviodût ancje el test antidroghe? E par chei che fâsin mistirs delicaz o ch'e àn incarics impuartanz, che decìdin de vite dal prossim o le gestion de societât, parce nò si proviodial di fâu controlâ periodicamentri?

Par controlâ (o molgi?) comercianz, professionisc' e imprenditôrs 'e àn studiât (no tant ben!) i reditometros, parametros par defìnî se ce che un al guadagne e al declare al è compatibil cule vite ch'al fâs; no rientristu, ti contròlin e ricontròlin fin che alc 'e cjàtin simpri (cui rive a sei apuest el cent par cent in dut chel casin di normes?). Ma parcè nissun aplichial el stes principi par controlâ tante gjarnazie che gire atôr nullafacente e no si pratìndial di cognossi di ce che un alvîf?

Jusc' dibàtiz e lotes cuintri les discriminazions des femines a ogni pît alcât, "quote rosa" in politiche, e ancje tai parchegjos a Udin 'e son dai puesc' riservâz pes femines; ma in tanc' Paîs 'e continuin a sêi sclavizades, e tes moschèes ancje in Italie 'e contìnuin a sêi esclududes. Però... trôs fasino alc di concrèt, almancul aculì, par difîndi tantes femines islamiches, par fâles jessî dal medioevo?