"No si podaressial fâ une mostre di documenz di San Florean?" 'I erin dal '89 e l'ARS al stave preparant la sagre dal mês di Mai. L'idee 'e jè vignude fûr di Guido Brini, che, come tanc' di chei ch'e an scugnût lâ vie pal mont, al mostrave cussì la sô atenzion pal so borg, pe sô storie, par chês robis ch'e semèin pierdudis, ma ch'e vìvin dentri di ognun di nô.

Mi à butade la bale a mì, e jò j ai dite che mi semeave une buine idee, e che lu vares judât a dai vite. Ancje l'ARS, il nestri Comitât di borg, le à cjatade juste e Aldo Calligaro, il president, le à sustignude te cunvinzion che si podeve scomenzâ a pensâ di fâ sagris no nome par mangiâ e bevi, ma ancje par cognossi pui ben i tesaurs di vite e di storie ch'e son tai nestris borgs e te nestre int.

Alc al comenzave a movisi ancje in cualchi âtre fieste di frazion: i prins libris storics e fotografics di Buje, vignûz fûr dopo tanc' agns, e soredut une gnove lûs tal sintiment di tante int a' vevin inviadis iniziativis unevore interessantis, come publicazions e mostris fotografichis. Alore si sin metûz a l'opare ancje nô. Prime di dut 'i vin decidût di interessâsi di fotografie, lassant di bande, pal moment, âtris documenz.

Gilda Ursella e Marisa Comoretto, d'acordo cui nestris progjez, 'e an metût a disposizion il lôr timp libar e la lôr passion pe storie e pal paîs, e insieme 'i vin scomenzade cheste aventure che ancjmò vuê, a distance di cinc agns, nus robe momenz tant biei. 'I sin lâz cjase par cjase, in dut San Florean, e in ogni famee 'i vin domandât: "Vêso fotografies di prestânus?".

Duc' nus an dite di sì e ansit, si son faz in cuatri par 'zontâ dongje informazions, descrizions e datis ch'e dovevin completâ il contignût deimagjne. Fat il prin gîr, nus 'ere vignude dongje tante di chê robe ch'i vin capît subit che no varessin mai rivât a sielgile, ingrandîle e esponile in te sagre di chel stes an, che ormai 'ere pronte dì par dì. "Nuje pore", si sin diz, "al volarà dî che 'i fasarìn un pas a la volte e 'i preparìn dut cu le calme ch'est an ch'al ven. " Cussì, sgjerfant ta chel grant grump di memo riis, 'i vin tacât a dividilis par sogjet: paesagjos, ritraz, mistîrs...

Dal '90 il nestri patrimoni di storie fotografade nol 'ere 'za pui in embrion, ma al tacave a vê une muse clare, là ch'e si 'zontavin dì par dì lineamenz gnûfs, cun gnovis imagjnis che la int vulintîr nus portave dongje. Bisugnave alore pensâ di tignî cont dut chest ben di Diu: ingrandî nome i cuadris pui biei per metiju in mostre e tornâ chei âtris ai lôr parons al voleve dî strassâ tanc' momenz impuartanz de vite dal paîs.

Alore 'i vin pensât a ce tant ben spindûz ch'e saressin stâz chei bêz ch'i varessin doprât par fâ lis negativis di dut, propit dut ce ch'al 'ere vignût dongje. L'archivi fotografíc vêr e propit al è nassût cussì, e cuanche si cjate int che capis chest tipo di lavôr, come che lu capis Alvio Baldas, ancje lis spesis no fàsin pui tante pore.

Cumò lis imagjnis de storie di San Florean, di che part di storie ch'e pues jessi fermade sun t'une pelicule, 'e son dutis al sigûr in tun racoglidôr di cualchi decine di pagjnis. Une tabele gjenerâl 'e informe su la division di massime dai argomenz pui impuartanz:

1) Ritratti di famiglie,

2) Ritratti con due o tre persone,

3) Ritratti di singoli,

4) Foto di gruppo,

5) Attività lavorative,

6) Emigranti e militari all'estero,

7) Cerimonie religiose e civile,

8) Attività sportive e ricreative,

9) Paesaggi con persone.

Ogni setôr al à la sô tabele ch'e dà un numar e un titul aes sôs negativis; ogni negative 'e à la sô etichete cu le date de fotografìe, la descrizion in dôs peraulis di ce ch'al è ritrat, i sorenons o lis denominaziôns toponomastichis cuanch'e son, l'ambient di sfont.

Ogni setôr al è ancje sistemât in mût che la storie di San Florean 'e sedi vierte ancjmò a duc' chei ch'e an voe di puartâ la lôr part cun âtris imagjnis. Invessit un "indice" computerizât al è in grât di tignî note di dut il gnûf materiâl ch'al ven dongje un pôc a la volte.

La Ledre, i fruz ch'e 'zùin tal campo, la glesie, lis grandis fameis dal borg 'a son lì ch'e spètin ch'e vegni la lôr volte di lâ in mostre o di sei util a di chei ch'e cìrin di tornâ a scuviergi un mont pui o mancul lontan. Cumò nus spetarà une grande butade di lavôr cun dut il materiâl ch'al sta vignint dongje des ricercjes de Pro Loco su Don Luigino D'Agostini, di cui 'i vin 'za tant par dut il ben ch'al voleve a San Florean, ma no di sigûr dut ce che 'i vin viodût a meti adun tai ultins timps.

No l'è stât, in ogni mût, e no l'è par nuje un lavôr che si scuegni vê tre laureis o ch'al puarti vie il sium di gnot: al baste organizâsi un pôc, vê metodo e pasienze, vê passion. Nô an di vin tante che 'i vin slargjade l'idee ancje a chei di Mont, pensant che ancje le mari des nestris frazions 'e vedi dirit a vê il so album di famee.

Ma 'i pensìn ancje: se duc' i Comitâz di borg di Buje 'e fasessin altretant? Pensait: agns di storie di dut il nestri paîs fissâz par simpri in tune pelicule, e vê bisugne nome di un numar par tornâju a puartâ ae lûs. 'I pensìn ch'al sares pardabon un grant segno di afiet, ma ancje un grant servizi culturâl par chest paîs ch'al è fat, sì, dut a tocuz, ma al è un paîs là che si po ricognossi une muse e une storie ch'e va ben par duc'.