Une volte, un luc maraveôs, cun culinutes lentes e fra jenfri prâz in plan, segnâz di riui di aghe frescje di sorgive, un picul paradîs de nature, al ere dut cuviert di arbui di ogni sorte, drez, robusc', che ae floridure o quant ch'e erin cjamâz di pomes 'e lusivin che les cjalavin cun no pocje amirazion ancje di lontan, fîn des monz ch'j fasevin di corone o di in font ae plane su chel ätri lât.

El pui preseât, però, al ere un vieri ulivâr, dut stuart, un grump gropolôs, che di insomp al cuc pui alt al cjalave cun severitât e distac dut atôr, e cun sapienze al meditave...

In mût particolâr di une bande ere cressude une fisse boschete di cuargnolârs, arbui no cuissà ce alz ma di len dûr, che nancje le tramontane pui rabiôse ju rompeve, cun biei flors žâi che po 'e deventavin cuargnui, di polpe un pôc gherbine ma golôse.

Pui disòt si ere sparnicade une gran quantitât di ambolârs, ancje tes varianz dal sespâr e dal brugnulâr; ancje chesc' cun floridures vivarôses e profumades, ch'e puartavin a geades ambui, brugui, sespes e sespons, duc' cun polpe ben gustôse.

E dut intôr e fra jenfri 'e cressevin ancje roi, cocolârs, cjastenârs e parfin qualchi vît.

Prin braure un pui di chei âtris, fìn che cuargnolârs e ambolârs 'e son rivâz a cjalâsi cun invidie, e qualchi volte fintrimai di stuart. In pui, a sticâ le nature dal puest, tra j ambolârs al è stât insedât un pôl blanc, che in pôc timp al è cressût alton, e lì ch'e rivave le sô ombre al à voltât i ambolârs in emolârs (une variant pui di non che di fat, ma lôr no lu savevin...).

Vonde in compagnie, ognun par so cont. Lant indenant cussì, insedansi dome tra di lôr, curgnolârs, ambolârs e dutes chês âtres plantes si son vie vie indebolides, comudes predes des mufes e dai pedoi; sicheduncje, un brut dì dute le val 'e fo tacade di un gran fugaron e ancje les culines e i prâz di chel sît 'e àn socombût, che si viodevin dome cjoces fumant e cinise: al sares stât ben dûr ripiasi. Epûr le vite 'e torne a flurî: e cui podevial vê vudes lidrîs vonde in profonditât di resisti pal miôr e di tornâ a sfiâ par prin? Ma el vieri ulivâr, ve'! Po, une frescje bueresine 'e à puartât semence foreste e, daûr l'esempli dal ulivâr, une gnove vierte 'e à fat riflorî chest zardìn.