Parcè e par cui si sino metûts a dâ dongje chest progjet? Parcè che une date nus al sugjerive? Par tignî vive la Memorie? Pe int che ur plâs lei libris, par chei che a àn simpri vude la passion de storie? Pai zovins che no àn vût paris in vuere?

Al jere zenâr e o vevin pes mans il manoscrit

dal Plevan Bernardis di Madone, che nus contave dal

an dai mucs, che al cjalave cui voi imbombâts di "pietas" oms e feminis, patiments e mudaments de sô int, dai "nimîs", dai

profugos, lassânt cori peraulis tant che un romanç verist. Lui a Buje.

Parimentri tai crets dal Carso, tra berlis e maçalizis, il soldât Bepo Pavêr di Ursinins Piçul, al viveve la vuere e, sbalotât de Bosnie a Belgrado e a Mauthausen , la prisonie, atent a dut ce che i passave sot dai voi: un cine scrit a peraulis, su dusinte pagjinis di un cuaderno.

Parcè no scompartîlis cu la int di Buje in prin e po cun tancj altris, lis emozions che o vevin provât nô?

Parcè no zontâ chei bossui batûts ancje tes trinceis e di sigûr plui di cualchidun tes retroviis, che se tu ju cjalis a fevelin di inzens pierdûts, di voie di sperâ o di contâ la vite, doprant un imprest che al jere stât pensât pe muart?

Parcè no dâi mostre al talian cussì ingardeât

di Garzoni che nus contave la nassite fadiose di une

lenghe, nassude de bisugne di comunicâ di zovins mandâts

a scombati tes trinceis: scrivi par no deventâ mats, par savê di

jessi vîvs.

"Buje al è un pont di chest mont" al scriveve Alviero Negro. O vin cjapât coragjo e di chest paîs, de vite vivude de sô int, o vin pensât di partî. Par fâ cognossi. Par strussigâ la curiositât che e puarte ae cognossince. No di batais, no di nemîs, no di storie scrite sui libris "stampâts".

Une Altre Storie. Chê de int.

Che dopo la vin tornade a viodi lant in Bosnie: simpri un flum di passâ, simpri paîs invadûts, feminis di une bande, oms di chê altre, cjasis bandonadis brusadis, prucissions di int plene di pore, cui muarts tai fossai a cjalâ cun voi scocolâts il vueit dal cîl.. Storiis sintudìs cu lis nestris vorelis. Patidis insieme a lôr che nus contavin.

Cheste induzion volontarie dal dolôr dal om su un altri om: cheste la vuere. Lis vueris tasudis e platadis. Simpri compagnis pes personis che lis vivin. La television nus es mostre. Imagjinis di veri. Lontanis.

Se dome cualchidun in cà e in là, vude cognossince dai patiments plui prossims, plui "nestris", al rivarà a vivi cun empatie o a sintîsi cori un sgrisul o ben un riviel, cjalant lis imagjinis di veri che ogni dì nus passin, alore o podaressin dî che nol è stât dibant,

Nol è stât dibant vê cirût di cusî sensibilitâts e personis, competencis e lengaçs difarents, dilunc ducj chescj mês.

Nol sarà dibant cjapâ cun cunvinzion la strade di un impegno par che torni la PÂS. Ancje tal ultim cjanton di mont dindulà che a scjampin cirint padìn intes nestris contradis, par vignî, magari cussì no sierâts tun CPT o cjapâts a sprangadis dal prin bulo che al passe pastrade.

E invessit il lôr dolôr al podarés cjapâ colôr di sperance, savint di sei rivâts tune tiere ancje je cetantis voltis tibiade de VUERE.