Elio De Capitani, milanês, regjist dal spetacul teatrâl "I TURCS TAL FRIÛL", in te INTERVISTE A ELIO DE CAPITANI edit Selektarte (UD), al rispuint cussì ae domande su la atualitât dal test di P.Pasolini:

"Cierts tescj a rivin a azî a nivel profont, a sgjarfin fûr emotsions che a divegnin di èpochis antighis. I "Turcs" nus cjacarin in mût particolâr da l' idèe tremende da lis dôs muarts: chê individuâl, ma dentri dal grim, e chê etniche da la disparitsion di une identitât. Pasolini nol podeve scrupulâ che dopo 50 agn la sô intuitsion e sarès stade cussì atuâl, come idèe dal stâ in spiete di un maçalitsi che nol è une schirie di muarts, ma muart totâl di dut ce che al po murî. E cuant che o vin fat i"Turcs" za fa doi agn al jere teribilmentri atuâl. Po une part e rivoche une societât contadine che no esist plui, che e je disparide, scancelade par zonte cu lis cjasis tornadis a fâ sù. Se tu confrontis lis imagjinis di Buje, fra prin e dopo il taramot, tu ti stramaraveis par la dispertsion incredibil da la gnove edilitsie da lis vilutis, tant che la canae di vuê no podarâ mai capî in ce maniere che par vieri a jerin fats i paîs. Sigurametri si à di tignî cont che in chei agns no jere ancjemô salde la culture da la conservatsion e si lavorave in conditsions dificilis, ma salacôr si podevin cjatâ solutsions par no scancelâ l' architeture rurâl dai borcs lassant intate la lôr concetsion. Chest al è un dai regâi che o ai vût dai turcs: sintî come me il dolôr e il sbaldiment di Francesco U. par lis imagjinis vivis intai voi da la sô ment di un paîs che nol sarâ chel dai siei fîs. "

In tun incuintri cul public, De Capitani al sintetise cheste rifletsion disint che il Friûl taramotât al à cognossude la riedificatsion da lis cjasis no la ricostrutsion dal pais.

"...a Buje o vin tre robis" al diseve "Pieri " in tal lavôr teatrâl "BUJE" di A. Negro e L. Cjanton (1971): "la trute de Ledre, l' aghe de Cocule e la cjampane di Mont. Nus dan il gust de vite, il savôr des fiestis. No savìn parcè e cemût: ma cuissà che no séi tes vissàris de nestre tiare la reson di dut il nestri mût di jéssi..!" Uê 1997 al disares:" ... a Buje o vin 5 bancjis , 3 supermercatos, kilometros di stradis dutis ben asfaltadis e la trute de Ledre (salvade par miracul). Ma cuissâ che no séi tes vissàris de nestre television la reson di dut il nestri mût di no jéssi..!"

Ricostruî il paîs, recuperâ la memorie coletive, colmâ chei vueits tai borcs. Par che ai nestris fîs no sedin nome che vueits.