In chel istât vivût o insumiât (1)

Il dis di avost dal ‘96, in Mont di Buje, te milenarie Plêf di San Laurinç, la Companìe Sperimentâl di Vile e à rapresentât “IL TEI”, un lavôr teatrâl gjavât fûr da une conte di Marie Forte.

Origjinâl e sugjestive la regjie, puartade indenant cun mistîr de bande di Francesco Accomando.

O soi restade colpide dal mût dut gnûf di rapresentâ une conte par furlan, cun soluzions di zuc e scuasit magichis di certis senis.

Cui che al à viodût la rapresentazion si ricuardarâ dai efièts e dal sincronisim des vôs. Dut chest al compuartares une plui alte dificoltât di interpretazion pai atôrs, che invesit a son stâts unevore brâfs soredut rivant a trasmeti une emozion grande a dute la int.

Finît il spetacul, ur ai fat i compliments, po dopo o soi lade a mangjâ cun lôr, incurioside e scuasit strissinade da une fuarce che si sint in dut il mont da l’art, in particolâr chel dal teatri. Insieme ae companìe a jerin ancje lis lôr fameis, cui frututs plens di siump e chei che a lavorin, tal cidìn, daûr des cuintis. A vevin i voi lustris di strachece, ma sodisfats e contents parceche un’altre lôr creature e jere stade regalade a la int, dopo un grant lavôr fat di provis continuadis fin tal cûr de gnot.

In chê sere o ai domandât il permes di podê assisti a lis provis cuant che a varessin preparât un gnûf lavôr. La curiositât e jere tante, cussì il mês di mai dal ‘97 o ai tacât a staûr daûr in te leture des poesiis di Marie Forte.

Atôr di une grande taule, cui sfueis sot i voi, i atôrs a leievin, ducj atents a sintî il significât plui profont di ogni peraule. Un a la volte, planc, cence premure... cun calme. Ogni atôr al veve sielt la sô poesie cun cure amorose, come che si sielz il vistît de fieste; po dopo al tacave a cognossile ben, modulant la vôs su lis peraulis, par rindilis vivis. Il regjst di tant in tant ju fermave par fâur sintî un acento, une sfumadure, par cjatâ insieme une altre soluzion.

Ogni peraule e vignive cjareçade, nulide come une rose, scuasit a cirî la sô anime plui profonde.

Ducj a metevin dal lôr, cun sensibilitât e sintiment. Intant, te stanse, e steve cressint, planc a planc, une energjie, une magjie antighe che e saveve di robis bielis, di dolce malinconie, di valôrs pierduts che lì si tornavin a cjatâ...

* I umign

si cognòssin cui nons

de cunfidenze

dentri il cunfin de Roe.

E i fruz in tai curtîi

‘e àn sunetis di cozze.

Un lagn cence le malusèrie...

(Il paîs che i sai jo)

Cuant che ognun al veve ben imparât cemût lei, il regjist, cun estro e fantasie, ju faseve ripeti ducj insieme, cu lis vôs che si messedàvin, si leâvin, a fasevin “eco”. Planc, fuart, une pause. Une sole vôs, dôs, trê, po di gnûf insieme. E semeave une prove di orchestre.

Jo o vevi il cûr che mi bateve e o pensavi “ce brâfs”, e o crôt che ancje il spirt di Marie Forte al jere lì cun lôr, content che lis sôs poesiis a jerin tratadis cussì ben.

* Un frut sentât al friche

su la piere sclesade di un scjalin: lis lagrimis i lùstrin la musute e i slàrgjn il turchin dai vôi. Al vai Beput!

(Cja’ Forz)

Di tant in tant si faseve une ridade, si scherzave su cualchi situazion, tra di lôr e jere une grande armonie, une grande voe e plasè di stâ insieme a fâ teatri. L’amôr pal teatri... la lôr vite.

Intant si faseve miezegnot, une, e lôr a tornavin a provâ, cuant che e je rivade la sere dal spetacul, ancje jo mi sintivi part di lôr.

Tal miez da la int mi pareve di sei une privilegjiade parceche o savevi cemût che e jere nassude e cressude ogni peraule, ogni piçule invenzion di chel grant lavôr puartât indenant cul cûr e cu l’anime.

Tancj, a Buje, a varessin gust di podê viodi a scomençâ i lavôrs pa costruzion di un teatri, plui prest pussibil, se l’Aministrazion Comunâl a cjaparà cheste decision a saran beçs spindûs plui che ben.

La fuarce, la passion e l’impegno dai nestris compaesans dal Teatri di Vile a son la miôr garanzie di un futûr a salvaguardie de nestre culture. Jo ur soi ricognossint par tre robis: la prime, che mi an fat cognossî l’opare di Marie Forte, la seconde, che di cumò indenant o sint di gjoldi di plui il teatri in gjenerâl, e la tierçe, di veu viodûs a lavorâ insieme par une comun passion, che al’è un valôr uman che nol à confronts.

1) ‘E nas la dì quan’che dutis lis paveis si svèin e su lis alis je ànsime di svuel.