Fontanis di Cjargne, di piere vive, ben lavorade in lavris slissoz come bocjs zovinis, ben doleade in pleis tarondis. Piere fuarte ch'e oblèe l'aghe di mont a fâ i ultins saltuz, dal pinacul al cjadìn, dal cjadìn a la concje.

Un zûc di lûs ch'al console i vôi tes musis strachis.

Piere vive e lavorade, dulà che il rifles de mont e dai pez si e inclapît e al è deventât sgrîsul di colôr penz e scûr. E jè alì, la fontane, come une ri-gjne, tal miez di une plazzute o su l'alture, ch'e cjale i cuviarz, a pandi la sô braure, une ricjeze di duc', dongje la miserie di ognidun.

Une piere ferme ch'e clame dongje la ligrie cjantarine dai cjaldîrs, lis feminis e lis zovinis cui lôr petéz.

Fontanis de Cjargne! Une zumiele di aghe pure a rinfrescjâ la bocje e il cûr e po' un salût e l'impromesse di tornà.