Quant ch'al è nassût l'alpin" 'e je nassude ancje une divise gnove. Tai prins doi agn, il cjapiel al jere il "chepì" de fanterie fat cun feltro dûr e di colôr neri. Uniche diferenze, une napine di lane rosse cuside sore dal fregio a stele, cun cinc pontis e cun scrit il numar de compagnie.

La napine e sarà blancje pai prins batalions, rosse pai seconz, verde pai tierz, blu par chêi in servizi, 'zâle pal stât majôr. Tal 1873, il Regno d'Italia al met sul cjâf dai Alpins un cjapel a forme di cono, ancje lui di pano dûr cun tune fasse nere di tele cerade. Sul cjapiel si cjatave une stele di metal blanc e a man 'zampe une cocarde tricolôr di lane, dulà ch'e ven impirade une plume. Di corvat fin al cjapitani, di aquile pai ufficiai superiors. Dopo la varan blancje!

Tal 1880 il simbul dai alpins al ven insiorât dal fregio cun tune aquile, corone, cornete, dôi fusti incrosâz, armis, manarie e ramaz di orâr e rôl. Al centri dal steme il numar dal batalion. Tal 1910 la falde daûr si alce par semêa plui al cjapiel "alla montanara". Il vecjo fregio frontâl al jere masse grant e cussì al ven rimpizzulît come ch'al è cumò. La tradizion 'e ûl che la piume, lis reclutis la puartin simpri drete fintrimai al 'zurament! Dopo 'e puedin stuargile!

Il 15 di otobar dal 1872 al vignive fûr il Regio Decreto dulà che si fissave il regolament di dissipline militâr. Tal articul 14, chest regolament al proibive lis "basetis a la pretine" par no confondi i talians cui mucs. Par ripiche viers l'Impero, l'Italie 'e obleave i alpins a tigni lis moschetis: "Non è lecito ai militari di portare le fedine; essi debbono lasciar crescere i baffi e possono portare anche il pizzo".

Cussì si spieghin lis bielis moschetonis dai nestris vecjos. Tal 1883 si tachin a meti sul bavar de gjube lis "flamis verdis". Di lì a pôc dute la divise è sarà di colôr vert come le sperance e come i praz e i boscs che si slungin sui monz.