La fin dal 1991 'e à viodût la realizazion di un progjet che a Buje di un grump di timp in cà si sintive la dibisugne: la rifondazion de Pro Buja, associazion che in timps no tant vissins 'e veve fat cognossi cun onôr, cu la sô ativitât, il non di Buje par dute la nestre Regjon.

Tai ultins ains, la Pro Buja, no faseve plui nissune ativitât e viodût che a Buje 'e son une schirie di associazions culturâls, sportivis e di borg, si sintive la bisugne di coordinâ lis iniziativis ch'e vegnin fatis in tal Comun e di dâur une immagjne rapresentative a cui che par câs o par sielte si cjati a passâ pal nestri paîs.

Al è cussì che ai prins dal 1991, si è dat adun un Comitât provisori cul fin di ricreâ lis cundizions par che la Pro Buja 'e podes tornâ a lavorâ su la base des gnovis esigjenzis che ogni singule associazion 'e esprimeve. Al è par chest che il Comitât provisori al à lavorât par dut l'an, organizant incuintris cu lis variis associazions dal Comun, par cognossi i problems, lis necessitâz, lis propuestis e il pinsîr di duc' i Comitâz sul fat di fâ resurî la Pro Buja come pont di riferiment par dutis lis ativitâz che vie pal an si tègnin a Buje. La rispueste che duc' 'e an dât 'e jè stade pusitive, un grump di plui di ce che si vares pensât.

La dimostrazion si è vude cu le assemblee, tignude ai 30 novenbar dal 1991, che à stabilît la vere e proprie rinassince de Pro Buja cun tune partecipazion popolâr un grump incoragjant. Di chê assemblee si son metudis lis fondis par une schirie di inziativis che il gnûf Consei di Aministrazion al varà di puartâ indenant bielzà chest an, ancje se cence gruessis ambizionis, ma tignint in considerazion duc' i contribûz ch'e vignaràn dâz in maniere costrutive de bande de variis componenz.

 'O crodìn che la composizion dal gnûf Consei di Aministrazion 'e puedi garantî, sedial dal pont di viste anagrafic che di rapresentance des variis associazions, un lavôr in linie cu lis finalitâz che si jerin dadis. Il Consei al sta 'za lavorant, par miez di cualchi grop di lavôr, e al sta proponinsi ae atenzion de nestre comunitât cun iniziativis ch'e scomenzaràan a concretizâsi in tai prossims mês.

 I prins impegns 'e rivuàrdin l'organizazion interne de Pro Buja, e in particolâr l'agjornament e la modifíche dal statût par adatâlu aes gnovis esigjenzis de comunitât e aes lez ch'e dirègin la materie. Une impuartance fondamentâl pe esistence de Pro Buja al sarà il jutori ch'al podarà vignî de bande des Associazions ch'e lavòrin a Buje, e dai singui citadins, di cui nô'i sperìn di vê contribûz costrutîvs e ideis par presentâ chê imagjne che Buje si merete.

Il Consei di Aministrazion de "Pro Buja":

 President: Bruno CATTARINO

Vice President: Antonella PONTONI

Tesorìr: Vanni NICOLOSO

Segretarie: Laura FACINI

Conseîrs: Adrìano BASSO, Roberto BORTOLOTTI, Sonia BUGINI, Maurìzio GIACOMINI, Luca MARCUZZO, Giuliano NICOLOSO, Carlo PERSELLO, Marco PIEMONTE, Andrea TONDOLO, Loris TONINO, Março TONINO, Leopoldo VACCHIANO, Raffaele VENTURINI e par statût il Sindic Aldo BARACCHINI.