FOTO

Tal 1992 la Societât operae di Buje 'e finirà 100 ains! 'E je la plui viere associazion dal paîs e il fat al merte ricuardât. Ancje parceche la societât in dì di uê no si puarte daûr nome la grande cjame dai ricuarz, ma ancje une voe 'zovine di cjaminâ cuí timps.

Par chest la Presidence cul so atuâl President Ugo Cappelletti 'e sta 'za studiant la forme par comemorâ l'aveniment concretamentri secont lis miôr tradizions dal sodalizi. Tra l'altri 'e àn ancje pensât di stampâ une storíe serie dai lôr cent ains, ch'e meti in mostre i faz i lis personalitâz plui significativis ch'e àn caratarizade la vite de societât.

Mi àn dade a mì l'incariche di scrivile e jo 'o àí acetât par amôr di chest nestri biel paîs. Dopo, paratri, mi soi nacuart che l'imprese no je facil, parceche i documenz massime pai prins cinquant'ains 'e mancjn quasi dal dut. E si sa che la storie (sientifiche) si fasile nome cui documenz.

Distès alc fin cumò 'o ài tirât fûr scrusignant fra lis cjartis lassadis di gno pari. In ogni mût, 'o vorès ancje preâ duc' chei ch'e vèssin qualchi documentazion (scriz, fotografiis, memoriis) su la Societât operae di Buje di fâmal savê par ch'o puedi scrivi une storie plui complete e meretorie. Intant mi soi 'za fate une idee des circostanzis ch'e àn puartât ae nassite de associazion, dai ideai e des contradizions ch'e à vùt, dal svilup e dal significât che la sô presince 'e à vût te vite sociâl dal paîs durant chest secul.

Mi soi cunvint, in particulâr, che tes vicendis di chest bocon di comunitât si son spegladis puntualmentri dutis lis grandis trasformazions culturals ch'e àn segnade la vite di Buje, dal Friûl e da l'Europe tai ultins cent ains. Ancjmò une volte al reste palesât che la plui modeste mícrostorie 'e je simpri intimamentri leade (condizionade, determinade) de grande storie.

O miôr ancjmò, che no esist une storie grande e une storíe pizzule, ma une sole storie dal omp, unitarie e universâl. Baste savê leile. Par cumò, l'unic document ch'al prove la date di nassite de Societât operae di Buje al è il confenon sociâl origjnari, salvât par meracul dal ribalton dal taramot. Propit lì, ben inquadrade dentri doi stemas, si lei la date "1° GENNAIO 1892".

Ma dute la decorazion di chel confenon 'e je un document de culture ch'e ispirave i fondadôrs a dâ dongje la Societât. Prin di dut lis dôs mans che si strèngin l'une cun l'altre come par judâsi. E se si cjale be si viôt che une 'e je la man di un siôr (si indovine le camisole e i polsins de cjemese blancje) e chê altre chê di un operari (si viôt nome la cjemese). Il "mutuo soccorso" al à duncje di unî insieme parons e sotans (contadins, fornasîrs, muridors) tune grande pâs sociâl.

Al è chel il grant ideâl liberâl e paternalistic ch'al ispire la borghesie progressiste de fin dal secul. I mistîrs po 'e son rapresentâz duc' cui lôr simbui: il contadin cu la sesule, il batali, lis fuarpis di cuinzâ, la curcjele e naturalmentri cu la uve e la panole; il muridôr cu la square, la rie, i disens, i plomp; il pitôr cui pinei; il marangon cui scarpei e il compas; il fornasîr cu la fornâs. Il alt la stele d'aur 'e je simbul dal progres (la grande peraule mitiche dal secul passât).

Sot de steme di Buje e dal simbul des mans si lei: "HONESTAS ET LABOR", ch'e semee la traduzion de detule plui usade de retoriche par descrivi il furlan: "salt onest lavoradôr". Fondadôr in chê volte insieme cun altris e president de Societât par 34 ains fin al 1926 al fo il geometra Cavalîr Umberto Barnaba, plui cognossût a Buje come "Siôr Umberto". Personalitât di spico tal mont locâl, soredut come representant de tradizion risorgimentâl e liberâl.

La sô famee di Vile 'e menave glorie par vê partecipât in prime linee ai movimenz pa l'unitât d'Italie e dopo dal '66 'e jere riveride de pizzule borghesie come la plui potente dal paîs. I sotans, invezit, la puare int e massime i "clericai" la cjalavin di stos, come une cove di sfrutadôrs e "framassons".

Siôr Umberto, paratri, al jere ben olût di duc'. Sef di Cai ch'al è stât par miez secul il poete de Societât nol piert ocasion par laudâ "chel Siôr ch'o vin vût simpri par ben nestri President". E 'zà ch'ò ài nomenât Sef di Cai, al sarà il câs di dî daurman che massime par miez des sôs poisiis nô 'o podìn cognossi ancjmò alc des vicendis de Societât tra il 1892 e il 1937. Propit a traviers i soi componimenz par furlan si pò viodi cemût che l'associazion dai prins ideai umanitaris si sedi trasformade in tune organizazion parafassiste.

Provìn a lei une poesie dal 1912. Il poete al cjante cussì l'opare sociâl dal "mutuo soccorso": In chesc' ains ch'o sin insieme tanc1 sussidios son pajâz simpri a socìos tributaris quant che lôr son stâz malâz. Jsal vêr mo che je biele cà la nestre societât di judâsi a vicende quant che si à necessìtât? E insomp, par finî la sô lungje filastroche nol lasse mai di fâ i auguris a duc' i socios: A duc' po' culì de taule jo augùri ogni ben augurant di tornâ insieme duc' culì chest an cu ven.

Ma sintît invezit ce maniere ch'al finìs la poe sie tal 1926, quant che ormai l'Italie e ancje il co mun di Buje 'e son deventâz fassisc': Cumò prin di lassâsi prin di partî di chest paîs duc' un salût a la romane, 'zovins, vecjos, ancje lôr fîs. Il prin Ministro da Vltalie l'è temût par dut il mont, un alalà a Mussolini, al Re, al Princip di Piemont...

Li poesiis di Sef di Cai, paratri, 'e son interessantis parceche lui nol mancje mai di fâ riferimenz a faz e personis di Buje di chei timps, dantnus cussì preziosis indicazions sui sintimenz e su lis sperancis dai bujaz dal ultin secul. Al ricuarde la costruzion des gnovis scuelis sul Cuel di Baldo, de strate ferade, il prin implant de lûs, il tôr, il domo... Dal 1937 al note: "ma i timps critics ch'o traviersìn, costrìngin duc' a stâ fermìns... ".

No màncjn nancje pontadis polemichis o cuintri i socialisc' (metûz in rie "grazie a l'energje dal nestri Duce") o cuintri i clericai (ch'e vevin metude su une cuintri associazion di mutuo socorso clamade par ridi la "societât dai beduins"). 'O ài dade nome une cerce des poesiis di Sef di Cai par fâ capî ce maniere che fasint la storie de Societât operae si scuen fa la storie integrâl di Buje par dut un secul.

Al è chel ch'o cirarai di fâ in forme plui organiche e sientifiche pal 1992. Intant, però, 'o scuen culì 'zontâ i lineamenz essenziai de vite de Societât, dopo la presidenze di Siôr Umberto. Dal 1926 al 1945 al fo President il Cav. Matteo Savonitti (Siôr Teo Cinai). Dal 1945 la Societât 'e îo commissariade dal CLN e metude sot il President Domeni Ragagnin (Menegheto) che la tignî fin al 1953, quant ch'al è muart.

Dal '53 al '57 al fo elet President Pieri Menis e dal 1957 al 1968 Pieri Nicoloso. Dal 1969 al cjapà la presidence il Prof. Enore Pezzetta ch'al puartà gnove vite te Societât, rinovant ancje il Statût dal 1971. Dal 1984 fin in dì di uê al è President Ugo Cappelletti e benemerit segretari Celerino Felice.

Ogni sorestant al à dât l'impronte de sô personalitât, intant che la vite de Societât pierdint i fins origjnaris de mutue assistence economiche 'e je lade simpri plui deventant une forme di solidarietât morâl e di agregazion sociâl. Su cheste linie si pò misurâ l'atualitât de associazion e la sô capacitât di lâ indenant dentri dal gnûf orizont culturâl che si davierz denant dal 2000.