El 2006 al è un an di celebrazions. Prin di dut i trent’ains dal taramòt che dal 1976 al à distrute tante part dal Friûl fasint scuasit mil muarts, di cui cuarantesîs nome a Buje. Vuê i nestris paîs e son rifats a gnûf e un forest nol po inmagjinâ che lì che cumò e son bieles cjases, trente ains prime e jerin maseries e magari cualchi muart.

Ma vissìn ae ricostruzion materiâl, cualchidùn al’a pensât ancje ae ricostruzion culturâl e sociâl come “Chei di Ursinins Pizzul” che fin dal prin an de gnove Sagre di Sant’Osef, val a dî dal 1982, tra mil dificoltâts e cence nissun “fondo cassa” e an volût promovi des iniziatives culturâls. Cussì chest al è ancje l’an des gnoces d’arint di “Chei di Ursinins Pizzul” e di “Buje Pore Nuje!”.

Par solit i aniversaris e son le ocasion par tirâ les somes di ce ch’al è stât fat e par tentâ di strolegâ l’avignì. Scomencìn cun ce che “Chei di Ursinins Pizzul” e son stâts boins di fâ:

• e an decidût di no dispierdi a ploe i bês rivâts di Brescie ma di doprâju pe ricostruzion de glesie di Sant’Osef come ch’e ere e lì ch’e ere;

• e an comprât el teren là ch’e ven fate le sagre e metût in pins une struture fisse atrezade pai festegjaments;

• e an volût dimostrâ in plui formes le lôr ricognossince ai amîs Brescians; i ats plui significatîfs e son le intitulazion di une strade dal borg al “Villaggio Brescia” e il conferiment dal sigjìl dal Comùn al avocàt Silvio Pelizzari e a Franco Maestrini;

• e son stâts tra i prins promodôrs de ricostruzion de glesie dal Sacro Cûr, là che, fra l’âtri, e an pajât e metût jù el paviment in piere di Toreàn;

• e an volût e finanziât les dôs opares d’art che si cjàtin te glesie dal Sacro Cûr: el Crist di Pieri Galina e le grande statue in bronç di Enore Pezzetta finide di Gianfranco Malison;

• e an cirût e otignût i contribûts che ju an judâts a restaurâ le Ancone de Madone de Uve, fate dal Mago Bide ae fin dal 1800, e a recuperâ el cuadri ch’al rapresente le muart di Sant’Osef;

• e an promovude le realizazion di cuatri medaes di Arnaldo Baldassi: une par memoreâ Pier Paolo Pasolini e tre a ricuart de fotografe Tina Modotti;

• e an organizade le projeziòn, in prime nazionâl taliane, dal cine-documentari su Tina Modotti “Que viva Tina” produsût de television francese “Canal plus”;

• e an volût valorizâ i artiscj locai organizant, in ocasion de sagre, mostris d’art ch’e an simpri vût un grant seguit di public;

• e an butade le idee di tornâ a meti in pins le prucission dal Sacro Cûr;

• e an in adozion a distance un frut indian;

• e an ospitade, dal 1982, le presentazion dal libri di Pieri Menis, editât de Societât Filologjche Furlane, “Lejendis di Buje”;

• e an fate “politiche internazionâl” coltivant rapuarts cun persones e istituzions di Matrei in Osttirol (in Austrie), Rottenburg am Neckar e Vilsbiburg (in Gjermanie);

• e an metût adùn e stampât vincjecinc numars di “Buje Pore Nuje!”, cun passe 500 articui in plui lenghes: furlan, talian, todesc, francês, spagnûl, portoghês... Le riviste e jè jentrade in centenârs di cjases di Buje, e jè rivade vie pa l’Italie e vie pal mont: France, Gjermanie, Austrie, Svuissare, Canada, Stâts Unîts, Venezuela, Argjentine, Brasîl, Australie e parfìn su les spuindes dal Lât Baïkal in Siberie. El numar unic, in chescj ains, si è concuistât un spazi impuartant tal mont culturâl locâl, al è spietât cun ansie di tante int di Buje e al’è domandât e acetât cun tant agrât des pui impuartantes biblioteches de Province.

Dut chest al è stât fat grazie al lavôr di un grup unevore unît che, pûr te dialetiche a voltes ancje dure, al à lavorât par otignî i obietîfs programâts. Un ricognossiment particolâr al à di lâ a chei ch’e an vût el coragjo di pensâ in grant (a dispièt dal non dal borg) e le capacitât di guidâ el Comitât, ven a stai i presidenz: Agnulìn Cragnolini, Sefìn Tonino, Armando Nicoloso, Dario Ciani.

Insome vincjecinc ains fats “alla grande”, tropes Pro Loco puedino vantâ un palmarès come chest comitât di borg?

Vincjecinc ains e son tancj, une ete. Tancj colaboradôrs no son plui cun nô, âtris si son ritirâts, e cussì ancje a Ursinins Piçul al è in cors un inevitabil gambiament gjenerazionâl.

Le memorie di ce ch’al è stât fat al è ancje par chei ch’e cjaparàn in man el Comitât tai prossins ains, par ch’e sepin ce che le int di chest piçul borg e jè stade buine di realizâ, cule sperance che i zovins e puedin continuâ, cun idees e fuarces gnoves, su cheste strade. A lôr, e no nome, cule fuarce dal lavôr fat in chest cuart di secul, mi permet di proponi cualchi riflession.

Fin cumò chel ch’al à fate diferente le sagre di Sant’Osef e jè è stade le cualitât: chê dal mangjâ e bevi bon e gjenuin e chê des iniziatives culturâls, in particolâr le publicazion dal numar unic. Ma se pes primes si po pensâ di rivâ a mantignîles ancje pal futûr, pe riviste i dubiz e son tancj e fuarz, no par mancjance di volontât e di int disponibil ma “nome” par scjarsetât di bêz, parceche le publicazion e coste, tant. Al è concret el riscjo che le riviste e deventi une imprese masse grande, ma nome dal pont di viste finanziari, par “Chei di Ursinins Pizzul”.

Isal pussibil che l’unic sponsor su cui si po fâ afidament ogni an par “Buje Pore Nuje!” al sedi un forest, un che nancje nol capìs el furlan, che nol fâs nancje une pagjine di reclamp, ch’al dâ e vonde cence cjapâ in considerazion trôs numars che si stàmpin, target di letôrs e âtres naines di marketing, ma nome sule bontât de iniziative? Cemût mai chest forest, ch’al sarès el “Giornale di Brescia”, in pui di fânus di editôr, nus pae ancje une part des speses di stampe e culì nus tocje bati tantes puartes par podê cjatant une che si viergi in sfrese? Ise nome mancjance di bêz o mancjal alc âtri? O le riviste no valie? Ma se cussì e fos le int no metarès le man tal tacuìn par comprâle dantnus une man a ricuperâ part des speses.

E i contribûts pe lenghe e culture furlane? Zero! E pûr ducj nus disin «ce brâfs, ce brâfs».

Alore se i volìn che le publicazion e puedi continuâ nus tocje pensâ a dai gambiaments. El prin par “Chei di Ursinins Pizzul” ch’e varàn di cirî di coinvolgi chês âtres Associazions di borg e, parcè no, ancje le Pro Buje ch’e varès di sintîsi onorade (jo i disarès in dovè) di jessi in prime file. Parceche cheste riviste no fevele nome di Ursinins Piçul ma di dut el paîs e alc âtri e e jé une des iniziatives ch’e tègnin alt el non di Buje, almancul cussì nus dìsin.

Le promozion di un paîs no ven fate nome cun spêts, polente e lujanie cun contorno di mazurche ma ancje e soredùt cun iniziatives culturâls di spessôr, e une valide publicazion e jè une di chês. Un piçul sfuarçùt par omp nus permetarès di pensâ al futûr cun plui serenitât. Nol fasarès onôr a chei di Buje se un domàn cualchidùn al disès «e an pensât tant al bugjèl e pôc al çurvièl».

Ae fin de predicje al è dovè ringraziâ di cûr dutes le persones che in chescj vincjecinc ains e an lavorât, colaborât, e judât. Nô, fin che les condizions lu permetaràn, i continuarìn a fâ le nestre part e po, come ch’e diseve mê agne recuie, «al sarà ce che Di’ orà e no ce che el Gjaul al pense».