Il taramot, si sa, al è la plui grande disgracie ch’j puedi capitâ a un paîs e ae sô int. Cjasis e monuments distruts e soredut pes fameis i muarts ch’a no tornin plui... Ma chest malefin al è ancje l’ocasion par tancj di lôr dal disveâsi te lôr cussience dal sintiment plui biel ch’al sevi, la solidarietât umane, parsore di ogni cunfin creât dal egoisim dal omp. Lu vin viodût propit a Buje tal câs dal taramot. Ancjimò vuê, dopo trent’ains, la cjadene dai rapuarts formade in chê volte no si è rote, ma anzit e ven tramandade di pari in fi.

Chest al è il spieli plui biel ch’al anime i rapuarts che corin ancjimò cun tun grant amì di Buje dopo il taramot dal 1976, il Vicjari Episcopâl de Diocesi di Rottenburg Stocarde Monsignor Eberhard Mühlbacher. Lu viodìn ancjimò, la prime volte ch’al vignì a Buje di persone, dal 1980, a benedî il tôr restaurât di San Scjefin cu lis cjampanis rifondudis. Al ere chel un segnâl impuartant par dute Buje de rinassince de comunitât.

Chest e voleve dî la delegazion de Parochie di San Laurinç al Vescul Mons. Moser cuatri ains dopo puartansi a Rottenburg am Neckar, dulà che fo ricevude cun ducj i onôrs. Ma il regâl plui grant al vignì dopo cui setante milions di liris che Monsignor Mühlbacher al fasè rivâ ae Parochie pe sistemazion dal presbiteri dal Domo. No erial chel il cûr de comunitât cristiane di chenti?

I rapuarts intant cun Monsignor Mühlbacher e levin simpri plui strenginsi e deventant amicai. L’an dopo un grop di nô al visità a Stocarde une mostre d’art sacre dal len e dal ’86 une delegazion e fo ospitade a Rottenburg ae seconde sezion dal Sinodo diocesan. In chê volte si vè mût di cognossi e fâ amicizie cul Vescul di Santiago dal Soltero e cul Arcivescul di Rio de la Plata ch’al deventarà dopo Cardinâl di Buenos Aires. L’an dopo o sin lâts a celebrâ il complean di Monsignor Eberhard Mühlbacher.

Dal ’88 il Monsignor al vignarà a Buje insieme cun doi predis che assistevin i talians in Gjermanie. L’an dopo al visitarà Passarian e Cividât. L’associazion “Chei di Ursinins Pizzul” dal ’88 e sarà ricevude a Rottenburg insieme cul Sindic e in chê volte ancje il Bürgemeister de sitât al onorà la comitive. Dal ’91 po, lant a Bonn pal Congres Internazionâl di Archeologje Cristiane, passant par Rottenburg, al vignì il regâl plui grant di Monsignor Mühlbacher, i 120 milions pe glesie dal Sacro Cûr. Un regâl ch’al insiorà dute Buje alimentant la cristianitât dal paîs. L’an dopo il Vescul Monsignor Kasper, deventât Cardinâl de Curie romane, al visitarà il Domo e la glesie dal Sacro Cûr, saludant i ospits dal Centro anzians e puartant la sô peraule di fede.

E cresseve cussì l’amicizie tra Rottenburg e Buje. Tant che Monsignor Mühlbacher al fasarà di chest paîs la sô piere preziose taliane. Si à podût viodilu, par esempli, cuant che al darà la deleghe a Josef Tonino di esaminâ par cont de Diocesi di Rottenburg Stocarde la cuistion de Parochie de Sante Crôs di Aurisine cu la Curie di Triest. La relazion dal delegât e servirà a cuviergi buine part des spesis contratis dal Plevan. Al ere chest un segnâl di stime e di fiducie straordenarie.

D’in chê volte lis relazions fra Monsignor Mühlbacher e i amîs di Buje e son cressûts. E pûr tra lis tantis incombencis ch’al veve come responsabil dal Vescul di Stocarde pal Tierç Mont l’amicizie cun chei di Buje no jé mai sfantade. Ancje cumò ch’al è lât in pension pe etât al è ricuardât come un prin benefatôr par dut il mont. E ancje Buje j dîs cun dut il cûr: «Tantis graciis!».