I fîs de fieste di San Pieri 

a Domont

Testo in francese

E rivavin di Buje o di lì atôr dopo un lunc viaç cul treno, muse frosenade dal fum de locomotive, barconùts viarts par no piardi nuje dal panorama (tant el spetacul al jere a gratis).

Forsit qualchidun al veve scomençât a fâ modòn là di Filip Cjocjo, l’artigjan dal cuet, o forsit tal pravilegjo Calligaro-Nicoloso a Urbignà ch’e vevin el fôr Hoffmann fin dal 1877. Cemût jerino rivâts fin cà? Clamâts di un parint? Par sintût a dî? O cul treno gratis des minieres di cjarbon belghes ch’e reclutavin in Italie. Bastave dismontâju dongje Parigj di scuindon e ragiungi Domont là che ti spietave qualchi parint.

Cussì al fasè Agnul Venchiarutti el pari di Giuliana, Sergio e Checo. Si ere tal 1946, 130 ains dopo di Napoleon, al veve fat le ritirate de Russie cule Division Alpine Julie. Restât vîv parceche al veve robât i stivai fodrâts a un soldât todesc muart te nêf, schivade le fan mediant le cuesse di un purcit rus distirât a sec di un colp sul cjâf (cuete o crude, el fuc le veve viodude!). Saltât fûr de Russie al spose le sô santule di uere, une bolognese, e par dismenteâ el frêt rus al lè a infornâ suntune fornâs a Domont, là ch’al veve tre fradis pui vecjos.

Altris e rivavin cussì a Lyon, i clandestins si cjatavin ragrupâts. Un cert Agnul Conchin di Buje, uso il “Sergent recruteur” di une volte si presente e al berle: «Mi coventin tredis fornasîrs, pussibilmentri di Buje». Cussì si ripopolâ le fornâs di Puiseux Pontoise distudade bielzà di qualchi an.

L’an dopo le femine di Pieri Forte, Anute de Rosse, e le fie Olimpia e rivin di Buje par fâur di mangjâ. Qualchi an dopo intune scuele di alte cusine francese s’inçupede cun Pierre Troigros el creadôr a Roanne dongje Lyon dal rinomât Restaurant “les Troigros”. Le passion pe “nouvelle cuisine française” saressie nassude atôr des puaris pignatis macoladis di Anute de Rosse di Ursinins Piçul?

Di notâ ancje che Anute e jé le none di Frederic Forte, el rinomât zujadôr de squadre nazionâl francese di basket.

Huguette Molinaro (sposade De Bolle) e Rita Alessio (maridade cun Daniel Papinutto, el president dai furlans di Domont) si visin di vê judade Anute in cusine.

O varês capît che Huguette Molinaro si ere inçupedade daûr di un Belgjo, fornasîr ancje chel. Sposâ un Belgjo? Ma si! Furlans e Belgjos e lavin tant d’acordo.

Te fornâs, e jere une sole patrie: el fôr; un slogan sôl: «Dai, dai»; une religjon sole: el modon; le lôr braure: modon ben fat e ch’al suni come el fiêr; une bandiere uniche: un biel camin cul non dal paròn scrit lassù. Cun di pui l’orgoglio di lavorâ miôr di chês âtres fornâs...

A San pieri, si molave el lavôr a misdì, si cjantave, si beveve, si rideve, si faseve qualchi macacade.

A Sant Andree, purcìt sule bree, i fruts no lavin a scuele. E zujavin di balon cule viscìe dal purcìt. Ma ancje dut el an, le fornâs pai fruts e jere un piçul paradîs, spazi di libertât. Si zujave di platâsi tra i casons, fra mieç le jerbe alte. E jerin fra di lôr, in bande dal paîs. E podevin schivâ l’ostracisim antitalian d’in chê volte.

L’ostracisim... ce tant che i fradis Iop lu an provât! Walter, el pui vecjo al conte: «Aes cinc di buinore o judavi el pari a stampâ modon e prin des vot, une lavade di musìc e su a scuele, par pui di une volte, fâmi scufiotâ dal mestri, tal curidôr, el viâl dai picjadôrs. Viodût cussì, gno pari mi gjavà fûr di lì par metimi dai Gjesuits». Walter e Luigino Jop, brâfs ducj i doi! La vetrade regalade a Buje pal gimulament e jè opare di Luigino, sebèn che ducj i doi e sedin apassionâts di vetrades.

De fornâs e son saltâts fûr artiscj, artigjans, impresaris e campions di ogni sorte.

Di Jean Claude Brondani, medae di bronç di judo tal 1972 a Monico a Isabelle Nicoloso, primatiste mondiâl e campionesse di biciclete. Ai Nicoloso Bortolotti, ch’e son vissins di cjase, ogni tant, ur plâs fâ tornâ a vivi chel passât di modòn e di sport ancje chês berghelones di femines ch’e radunavin le lôr prole cule promesse di fâi vignî el cûl in bore se no vignive sul moment!

Ma femines solidâls e di cûr che si ufrivin come comaris a ogni gravidance di qualchi vissine.

Mi plâs tornâ a viodi chês cjasutes basses e semplices là ch’e nassevin i Minisini. Bepo Minisini, el fondadôr dal “Garage Minisini” a Viarmes. Sôs sûrs gimules, si comovin anjemò vuê de lôr tenare zoventût dongje dal fôr. Dificoltâts di ogni sorte... lontan dal paîs, de scuele... cunumie esagjerade... ostracisim. Ma a pensâ parsore, al jere propit chel ostracisim che ti faseve binte par un avignì salt e ancje par une stabilitât familiâr. Un esempli pai zovins di vuê...

Di fieste, el ritrovo dai furlans al jere te ostarie-buteghe “Bigarolli” a Domont ch’e à durât dal 1947 al 1993.

Les femines e compravin le paste, el bacalà, le mortadele, les ulives, les sarideles. Odôrs... savôrs... un profum d’Italie. Cun di pui l’acent, le pronunce tipiche di chês femines ch’e tentavin in prin un furlan francesât e dopo qualchi osservazion scherzose, un francês sclipignât di talian.

Propit là di Bigarolli al è nassût el gimulament tra Domont e Buje!

Di fieste i omps si davin dongje tal curtîl de ostarie par zujâ di balis, al interno a zujâ di briscule o di mora.

Le mora... spetacul garantît. Ridades, berghelons... Doi omps, cjapiel neri in bande sul cjâf, che si frontavin cun muses spaventoses e ch’e segnavin el pont su le bree de taule cul dêt bagnât te tace dal vin. El vincidôr al complimentave chel âtri: «Tu as une biele more... tu mi plasis...». E ducj i doi a svuedâ le tace che un moment prime e servive di calamâr!

Le ostarie Bigarolli e mertarès une lapide tipo:

Ostarie Bigarolli

1947-1993

Achì e nassè le franco-furlanetât

                                                                            a Domont       

A dî il vêr, une lapide e esist sul puest de fornâs Mattioda-Passera, Carrefour de la briqueterie (crosere de fornâs) inaugurade des autoritâts civîls e culturâls di Domont e dal Dipartiment, el dì di San Pieri 2002.

Altri ritrovo, al ere sot dal frascjâr di Norine Schiratti (nassude tal borg omonim di Majan), le none di Sergio Calligaro. Norine e tignive a durmî in stanseutes vissìn di cjase, e faseve di mangjâ, e curave, e lavave, e riceveve le pueste. Dispès e procurave ancje il lavôr a chei che rivavin. Pal pui ju mandave a la “TIBE” (di Giobatta Tonino-Tite Siorcheco). Norine, in zornade di vuê, le varessin clamade “Madame Internet”. E jè stade une specie di profetesse de comunicazion, el calôr, le umanitât in pui... El so bressò al dave ogni an un 300 butiglies di un vinùt tipo Domont (nuje ce viodi cul Ramandul) di un cert colôr clarùt. Disìn ch’al distudave le sêt... e baste. El so omp e so ginar Fausto Calligaro (Lene) pari di Serge (Sigurazions “AXA”) si davin da fâ par mantignî le schirie di cunins e chel bataglion di gjalines che tignive Norine e mantignî chel leam.

Un altri lûc di radunance al jere l’hôtel di Rine Calligaro in Rue des Recollets a Parigj. Lu à tignût par 17 ains, 7 dîs par setemane. E jere rivade cul passepuart di turiste tal 1937 a 20 ains in ocasion de “Exposition Universelle” di Parigj. Par un pôc di timp e à fat di bae a Domont e sposade subit dopo. Rivade a 90 ains, e simpri in gamba, nus fevele di sô cusine Esterine le vedue di Adelmo Calligaro (Cjocjo) che cui fradis Adelio e Alceo al veve le fornâs in Australie. Fevelâ cun Rine al sarès cjatâsi dut un colp tal cûl dal mont, meti pît te storie de diaspore furlane mondiâl e costatâ che un libron nol bastarès. Fastilis e dolôrs no j son mancjâts, parfin le muart di resint dal fî Gerard, diretôr de dite “Rossi” (asfalts). Dite nassude de TIBE.

Un daûr chel âtri, chei biei cjamins e son stâts butâts jù tal fracàs e un scossòn spaventôs, un nûl di fum, une puce di cjalìm e une strente di cûr dai presints che ju vevin viodûts a fumâ e che ju veve fats vivi.

Cussì, un dopo chel âtri e jè tocjade a Domont, Ezanville, Chambly, Baillet, Viarmes, St Martin du Tertre, Villiers le Bel, Sarcelles, Montlignon, Puiseux. Dome un, chel di Allonne, al resist. Là ch’e nasserin i Minisini.

Le int de fornâs a un moment e veve nasât che les robes e stavin gambiant: blocs di siment e beton, pui facii di meti in vore, e stavin copant el modòn. Le lôr prole, i “macaronìs” come che ju clamavin un pôc pardut e vevin studiât a scuele, sopuartant ae miôr les solites bacanades, umiliazions di ogni gjenar. Par jessi rispietât a scuele tocjave classificâsi in teste. E cussì...

Bepo Minisini, mecanic, al à viert e saldo ingrandît el “Garage Minisini” a Viarmes.

Serge Calligaro e le spose Giuliana (Venchiarutti) si son stabilîts a Domont te Sigurazion (AXA).

Daniel Papinutto e Rita Alessio (di Trep) chê che judave Anute de Rosse e tegnin in te Zone Industriâl une biele stamparie cun machinaris modernons.

Serge Ganzitti e Anne Marie, marangons, al è a cjâf di un biel stabiliment di aredaments. Al à vût lavorât in tal palaç dal Elysée (là dal President Chirac) e tal Château di Versailles.

I fradis Venchiarutti Serge e Checo, a cjâf di un biel stabiliment di eletroniche.

Renzo Bortolotti al jere prototipist di automobii.

E dutes chestes  ativitâts in te Zone Industriâl propit sul puest de fornâs, propit lì che i paris e vevin sgobât.

Un’âtre riessude esemplâr, di sigûr, e sarès chê dai Tonino (Siorcheco).

Giobatta (Tite), nassût tal 1904 tal curtîl di Siorcheco, daûr de gleseute di Sant Osef, vierte nome ai 19 di març, al jere el prin fî dopo tre frutes. Di contentece so pari lu veve denunciât dopo quatri dîs... di fieste. Tite e i fradis Elio e Agnulìn e rivin a Domont “supâts” de tribù bujate stabilide lì. Tite, pui cementist che fornasîr, al svilupe le sô ativitât te edilizie e pui specialmentri tal asfalt. Un pôc a la volte, a sun di ragrupaments, le lôr societât “TIBE” e rive a un colm di plui di 1200 persones. Dopo si espatriin in Afriche e e metin sù le “TIBEA”. Int pragmatiche (come ducj i impresaris) ma int di cûr, ch’e an judât le imprese “Rossi” a svilupâsi (simpri l’asfalt).

Le int di Buje e à colonisât Domont.

El gimulament Domont-Buje al scugnive vignî fûr, al è madurît planc planc tal fôr, a scuele, lì di Bigarolli, sot dal frascjâr, mediant le biciclete, sul tatami, tal cjamp sportîf, atôr dal spolêr di Anute de Rosse, cui matrimonis miscliçâts e soredut midiant chel modòn platât tes visceris di chei ch’e an vivude cheste epopee.

Par concludi (al fevele el vecjo).

Come l’Ebreo ch’al pree ogni dì:

«Visiti dal Antenât, un Aramaic viandant»

Podaressistu, Furlan, visati:

«Dal von, vignût di Buje a Domont a cuei modòn»

inalore tu cjatarâs denant di te un biel spazi di judizi e di serenitât.

P.S.

Sul moment di sierâ... une telefonade.

O sin ai 28 di dicembar dal 2006: Lucio Comoretto (Bracent), un dai 13 reclutâts tal 1946 di Agnul Conchin a Lyon, le ultime faliscje dal fôr di Puisieux, le memorie di une epopee splendide dute di rigile, sudôr e fûc... Lucio Bracent classe 1919... al à finît di messedâ modons e remenâ fastilis.